Mapigo ya Wamisri

¹Kwa hiyo, watu hao waliadhibiwa kwa viumbe hivyohivyo kama walivyostahili;

naam, waliteswa kwa makundi ya viumbe hao.

²Lakini wewe, ee Bwana, badala ya kuwaadhibu hivyo watu wako, uliwahurumia.

Uliwaweka kware tayari kwa chakula,

chakula cha kigeni na kitamu, kuridhisha hamu yao.

³Ulifanya hivyo kusudi watu wale walioabudu miungu,

wakiona njaa wapoteze hata ladha ya kula

kwa sababu ya viumbe vile vya kuchukiza walivyopelekewa.

Lakini watu wako walipata njaa kwa muda mfupi,

kisha wakapata chakula kile kitamu sana.

⁴Iliwapasa wale wadhalimu wa watu wako kuteseka kwa kupungukiwa mahitaji,

hali watu wako walishuhudia jinsi maadui zao walivyoteswa.

⁵Watu wako walipokabiliwa na wanyama wa kutisha

na nyoka wenye sumu kuwaua baadhi yao,

wewe hukuendelea kwa muda mrefu kukasirika mpaka mwisho.

⁶Walisumbuliwa kwa muda mfupi tu kama onyo kwao.

Kisha ukawapa ile ishara ya kuwaponya,

ili uwakumbushe matakwa ya sheria yako.

⁷Kama mtu akiitazama alama hiyo aliponywa,

lakini kilichomponya sio hicho kitu alichokiona,

bali wewe uliye Mwokozi wa watu wote.

⁸Naam, kwa kufanya hivyo uliwahakikishia maadui zetu

kwamba wewe ndiwe unayewaokoa watu katika baya lolote.

⁹Maadui zetu waliuawa kwa kuumwa na nzige na nzi,

wala haikuwako njia yoyote ya kuwaponya,

kwa sababu walistahili kuadhibiwa kwa viumbe hivyo.

¹⁰Lakini hata nyoka wenye sumu hawakuweza kuwaangamiza watu wako,

maana wewe ulikuja kwa huruma yako ukawaponya.

¹¹Waliumwa na nyoka wapate kuyakumbuka maagizo yako,

lakini waliokolewa upesi,

wasije wakakusahau kabisa,

na kuwa wazembe kuhusu wema wako.

¹²Waliponywa sio kwa mitishamba, wala kwa dawa yoyote ile,

bali kwa neno lako, ee Bwana, lenye kuwaponya watu wote.

¹³Wewe unao uwezo juu ya uhai na kifo;

waweza kuwaporomosha watu mpaka kuzimu na kuwarudisha tena.

¹⁴Mtu mbaya aweza kumwua mwingine,

lakini hawezi kumrudishia uhai huyo aliyekufa,

wala kuiokoa roho iliyofungwa huko kuzimu.

Balaa lililowapata Wamisri

¹⁵Hakuna mtu awezaye kukutoroka wewe.

¹⁶Wale watu waovu walikataa kukutambua wewe,

ukawaadhibu kwa nguvu za mkono wako.

Walikabiliwa na dhoruba kali, mvua ya mawe na tufani zisizokoma,

wakateketezwa kabisa kwa moto.

¹⁷Ajabu ni kwamba katika maji ambayo kawaida huzima moto,

moto huo uliwaka kwa nguvu zaidi

maana nguvu zote za maumbile huwalinda waadilifu.

¹⁸Wakati mmoja, moto huo huo ulipungua nguvu yake

ili usije ukaangamiza vile viumbe vilivyopelekwa kuwaadhibu waovu

ili watu hao waone na kutambua kwamba waliandamwa na hukumu yako.

¹⁹Tena, mara nyingine moto huo uliwaka kwa ukali zaidi ya moto katika maji,

ukateketeza mazao ya nchi walimoishi hao waovu.

Watu wa Israeli wanapewa mana

²⁰Lakini badala ya balaa hilo uliwapa watu wako chakula cha malaika;

uliwashushia mkate tayari kwa kula toka mbinguni, bila ya jasho lao,

mkate uliowafurahisha kwa kila namna na kutosheleza ladha ya kila mtu.

²¹Chakula chako kilidhihirisha unavyowaangalia kwa upendo watoto wako.

Chakula hicho kilishibisha tamaa ya kila mtu aliyekila;

tena kilijichanganya chenyewe na kumfaa kila mmoja kadiri alivyotaka.

²²Chakula chenyewe ingawa kilifanana na theluji au barafu,

hakikuyeyushwa na ule moto;

hiyo iliwafundisha watu wako kwamba ule moto ulioangamiza mazao ya maadui zao

wakati wa tufani na mvua ya mawe,

²³ulijiachilia nguvu yake ili watu wako waadilifu wapate chakula.

²⁴Ulimwengu uliouumba uko chini ya amri yako,

na hutumia nguvu yake kuwaadhibu watu waovu;

lakini hupungua nguvu yake ili kuwafaa wanaokutegemea.

²⁵Kwa hiyo, wakati ule, ulimwengu ulijirekebisha namna kwa namna,

kuonesha jinsi unavyohifadhi kwa ukarimu mahitaji ya wote wanaokuomba.

²⁶Ilifanyika hivyo ili watoto wako uwapendao, ee Bwana,

wajifunze kwamba hatulishwi kwa mazao tunayolima,

bali neno lako ndilo linalowahifadhi wale wanaokutumainia.

²⁷Chakula kile ambacho hakikuharibiwa katika ule moto,

kiliyeyuka asubuhi kilipopata joto hafifu la jua.

²⁸Na hiyo ilitufundisha kwamba tunapaswa kuamka kabla ya pambazuko kutoa shukrani zetu kwako

na kusali wakati jua linapochomoza.

²⁹Maana tumaini la mtu asiye na shukrani huyeyuka kama umande,

hutoweka kama maji yasiyo na faida.