Kristo atarudi.

¹Wapendwa, barua hii ni ya pili, ninayowaandikia ninyi. Nami katika zote mbili nayakeshesha mawazo yenu yaliyo ya kweli kwa kuwakumbusha:[#2 Petr. 1:13.]

²yakumbukeni maneno yaliyosemwa kale na wafumbuaji watakatifu! Tena mlikumbuke nalo agizo la Bwana na mwokozi, mliloambiwa na mitume wenu!

³*Kwanza litambueni neno hili: siku za mwisho patatokea wafyozaji wenye mafyozi mabaya wanaoendelea na kuzifuata tamaa zao wenyewe[#1 Tim. 4:1.]

⁴wakisema: Kiagio cha kurudi kwake kiko wapi? Kwani tangu hapo, baba zetu walipolala, vyote viko vivyo hivyo, kama vilivyokuwa mwanzoni vilipoumbwa.[#Yes. 5:19; Ez. 12:22; Mat. 24:48.]

⁵Nao walio hivyo hawataki kuliona neno hili: mbingu zilikuwako toka kale, nayo nchi ilikuwa imetoka majini kwa neno la Mungu ilishikizika mlemle majini.[#1 Mose 1:2,6,9; Sh. 24:2; Mat. 24:48.]

⁶Kisha ule ulimwengu wa kale uliangamia, ulipofurikiwa na maji.[#2 Petr. 2:5; 1 Mose 7:21.]

⁷Nazo mbingu za sasa pamoja na nchi zikalimbikwa kwa neno lilelile, zikawekwa, ziteketezwe na moto siku ile, watu wasiomcha Mungu watakapohukumiwa, waangamie.[#2 Petr. 3:10.]

Siku moja kama miaka elfu.

⁸Lakini wapendwa, neno hili moja msilisahau:

Kwa Bwana siku moja ni kama miaka elfu,

nayo miaka elfu ni kama siku moja!

⁹Bwana hakawii kukitimiza kiagio, kama wengine wanavyowaza kwamba: Hukawia. Ila huwavumilia ninyi, kwani hataki, wengine waangamie, ila anataka, wote wageuke na kujuta.[#Hab. 2:3; 1 Tim. 2:4.]

Mwisho wa ulimwengu huu.

¹⁰Lakini siku ya Bwana itakuja kama mwizi; ndipo, mbingu zitakapotoweka kwa shindo kuu, nayo yaliyoko tangu mwanzo yatayeyuka kwa kuchomwa na moto, hata nchi za kazi zilizomo zitateketezwa.[#2 Petr. 3:7; Mat. 24:29,35; 1 Tes. 5:2-3; Ufu. 20:11.]

¹¹Hizi zote zikienda kuyeyuka hivyo, je? Haiwapasi kuutakasa mwenendo wenu kwa kumcha Mungu?

¹²Kisha mwingoje siku ya Bwana, itakapokutia, mpate kumkimbilia, mbingu zitakapoyeyuka kwa kuunguzwa na moto, yaliyoko tangu mwanzo yatakapoteketea kwa kuchomwa na moto!

¹³Lakini twatazamia mbingu mpya na nchi mpya zitakazokaa wongofu, kama tulivyoagiwa naye.[#Yes. 65:17; 66:22; Ufu. 21:1,27.]

Uvumilivu wa Bwana ni wokovu wetu.

¹⁴Kwa hiyo, wapendwa, mkiyatazamia hayo jikazeni, mpate kuonekana kuwa wenye utengemano pasipo kilema wala pasipo doadoa!*[#1 Kor. 1:7-8.]

¹⁵Tena uvumilivu wa Bwana wetu mwuwazie kuwa wokovu, kama naye ndugu yetu mpendwa Paulo alivyowaandikia ninyi kwa ujuzi wake, aliopewa.[#2 Petr. 3:9; Rom. 2:4; 2 Tes. 2:2.]

¹⁶Ndivyo, anavyoandika katika barua zote akiyasema mambo hayo; lakini mle baruani mwake yamo maneno mengine yaliyo magumu ya kuyajua maana. Nao wasiofundishwa vema nao wasiomtegemea Mungu vema huyapindua, kama wanavyoyapindua hata Maandiko mengine; ndivyo, wanavyojiangamiza wenyewe.

¹⁷Basi, ninyi wapendwa mlioanza kuyatambua hayo, jiangalieni, nanyi msipotezwe na upotevu wao wasioonyeka, mkaanguka na kuiacha ngome yenu wenyewe![#Mar. 13:5,9,33.]

¹⁸Ila endeleeni kukuwa mkigawiwa mema, tena mkimtambua Bwana na mwokozi wetu Yesu Kristo! Yeye atukuzwe sasa mpaka siku isiyo na mwisho! Amin.