Dawidi anamlilia Abisalomu.

¹Yoabu alipopashwa habari kwamba: Tazama, mfalme analia na kumwombolezea Abisalomu,

²ndipo, wokovu wa siku hiyo ulipowageukia watu wote kuwa uchungu, kwani watu walisikia siku hiyo kwamba: Mfalme anamsikitikia mwanawe.

³Kwa hiyo wakaingia mjini siku hiyo na kujifichaficha kama wezi, wakawa kama watu wanaotoka vitani na kujifichaficha kama wezi, kwa kuwa wametoroka vitani.

⁴Mfalme akaufunika uso wake, naye mfalme akalia na kupaza sauti sana kwa kwamba: Mwanangu Abisalomu! Abisalomu mwanangu! Mwanangu!

⁵Ndipo, Yoabu alipoingia nyumbani mwa mfalme, akasema: Leo umezitia soni nyuso za watumishi wako wote, nao wameiponya leo roho yako nazo roho zao wanao wa kiume na wa kike nazo roho zao wake zako na masuria zako.

⁶Unawapenda wakuchukiao, ukawachukia wakupendao, kwani leo umevitokeza, ya kuwa wakuu na watumishi si kitu kwako, kwani leo nimevitambua hivi: kama Abisalomu angalikuwa mzima, kama sisi sote tungaliuawa, basi, hili jambo lingenyoka machoni pako.

⁷Lakini sasa inuka, utoke, useme na watumishi wako na kuituliza mioyo yao! Kwani ninaapa na kumtaja Bwana kwamba: Usipowatokea, hakuna mtu atakayelala kwako usiku huu, nayo mabaya yatakayokupata kwa ajili hii yatakuwa mabaya zaidi kuliko yote yaliyokupata tangu utoto wako mpaka sasa.

⁸Ndipo, mfalme alipoondoka, akaja kukaa langoni; nao watu walipowatangazia watu wote kwamba: Tazameni, mfalme amekaa langoni, watu wote wakaja kumtokea mfalme.

Dawidi anarudi toka Mahanaimu.

Lakini Waisiraeli walikuwa wamekimbia kila mtu hemani kwake,

⁹Watu wote wakarudiana katika mashina yote ya Waisiraeli kwamba: Mfalme ametuponya mikononi mwa adui zetu, naye ndiye aliyetuponya mikononi mwa Wafilisti, naye hakuwa na budi kumkimbia Abisalomu na kutoka katika nchi hii.

¹⁰Naye Abisalomu, tuliyempaka mafuta, awe mfalme wetu, amekufa vitani; sasa mwakawiliaje tena kumrudisha mfalme?

¹¹Kisha mfalme akatuma kwa watambikaji Sadoki na Abiatari kwamba: Waambieni wazee wa Waisiraeli kwamba: Mbona mwataka kuwa wa mwisho wa kumrudisha mfalme nyumbani mwake? Kwa maana lile shauri la Waisiraeli lilikuwa limefika nyumbani kwa mfalme.

¹²Ninyi m ndugu zangu, mifupa yetu ni ya mmoja, nazo nyama za miili yetu ni za mmoja; mbona mnataka kuwa wa mwisho wa kumrudisha mfalme?

¹³Naye Amasa mwambieni: Kumbe wewe na mimi mifupa yetu siyo ya mmoja, nazo nyama za miili yetu sizo za mmoja? Mungu na anifanyizie hivi na hivi, wewe usipopata kwangu kuwa mkuu wa vikosi siku zote mahali pake Yoabu![#2 Sam. 17:25; 1 Mambo 2:16-17.]

¹⁴Ndivyo, alivyojipatia tena mioyo ya Wayuda wote kuwa ya mtu mmoja tu, nao wakatuma kwa mfalme kumwambia: Rudi wewe pamoja na watumishi wako wote!

¹⁵Ndipo, mfalme aliporudi; alipofika Yordani, Wayuda walikuwa wamefika Gilgali kumwendea mfalme njiani, wamvushe mfalme Yordani.

Simei anahurumiwa.

¹⁶Naye Mbenyamini Simei, mwana wa Gera, aliyekaa Bahurimu, akaja upesi, akashuka pamoja na watu wa Yuda kumwendea mfalme Dawidi njiani.[#1 Fal. 2:8.]

¹⁷Pamoja naye wakaja watu elfu toka nchi ya Benyamini, hata Siba, mtumishi wa nyumbani mwa Sauli, akaja na wanawe 15 na watumishi wake 20. Wao walikuwa wamevuka Yordani, mfalme alipokuwa hajaja bado.[#2 Sam. 9:2,10; 16:1-4.]

¹⁸Mtumbwi wa kuwavusha walio wa nyumbani mwa mfalme ulipofika ng'ambo ya huko, mfalme aone, wanavyomfanyizia kazi nzuri, ndipo, Simei, mwana wa Gera, alipojiangusha chini machoni pa mfalme, alipotaka kuuvuka Yordani,

¹⁹akamwambia mfalme: Bwana wangu asiniwazie kuwa mwenye uovu, wala asiyakumbuke yale mapotovu, mtumwa wako aliyoyafanya siku ile, bwana wangu mfalme alipotoka Yerusalemu, bwana wangu mfalme asiyaweke moyoni![#2 Sam. 16:5.]

²⁰Kwani mtumwa wako anajua, ya kuwa mimi nimekosa; kwa hiyo unaniona leo, ya kuwa mimi ni wa kwanza wa mlango wote wa Yosefu, aliyeshuka kumwendea bwana wangu mfalme njiani.

²¹Ndipo, Abisai, mwana wa Seruya, alipojibu na kusema: Je? Simei asiuawe kwa ajili ya hayo tu? Kwani alimtukana aliyepakwa mafuta na Bwana.

²²Lakini Dawidi akasema: Tuna bia gani mimi nanyi wana wa Seruya, mkitaka kuniwia leo Satani? Ingekuwaje, mtu akiuawa leo kwa Waisiraeli? Kwani si leo, nilipopata kujua, ya kuwa mimi ni mfalme wa Waisiraeli?[#2 Sam. 16:10.]

²³Kisha mfalme akamwambia Simei na kumwapia: Hutauwa kabisa!

Mefiboseti anajikania kwake mfalme.

²⁴Naye Mefiboseti, mwana wa Sauli, akashuka kumwendea mfalme njiani. Naye alikuwa hakuiogesha miguu yake, wala hakuzikata ndevu zake za midomoni, wala hakuzifua nguo zake tangu siku ile, mfalme alipokwenda, hata siku hiyo, aliporudi na kutengemana.[#2 Sam. 9:6.]

²⁵Ikawa, alipotoka Yerusalemu kumwendea mfalme njiani, mfalme akamwuliza: Sababu gani hukuenda pamoja na mimi, Mefiboseti?

²⁶Akasema: Bwana wangu mfalme, mtumishi wangu alinidanganya, kwani mtumishi wako alisema: Nitajitandikia punda, nimpande, nipate kwenda pamoja na mfalme, kwani mtumishi wako ni kiwete.

²⁷Lakini yule amemsingizia mtumishi wako kwa bwana wangu mfalme, lakini bwana wangu mfalme ni kama malaika wa Mungu, na ufanye yaliyo mema machoni pako![#2 Sam. 17:17; 16:3.]

²⁸Kwani wao wote wa mlango wa baba yangu walikuwa watu wa kufa tu mbele ya bwana wangu mfalme, lakini wewe walimweka mtumishi wako kwao wanaokula mezani pako; liko jambo gani tena linipasalo, nimlilie tena mfalme kwa ajili yake?[#2 Sam. 9:11.]

²⁹Mfalme akamwambia: Unayasemaje haya maneno yako tena? Basi, mimi ninatoa amri hii: Wewe na Siba mgawane mashamba![#2 Sam. 9:9-10; 16:4.]

³⁰Ndipo, Mefiboseti alipomwambia mfalme: Na ayachukue yote yeye! Kwa kuwa bwana wangu mfalme amefika nyumbani kwake na kutengemana.

Dawidi na Barzilai.

³¹Naye Barzilai wa Gileadi alikuwa ameshuka toka Roglimu, akapita naye mfalme kufika Yordani, apate kumvusha huko Yordani.[#1 Fal. 2:7.]

³²Naye Barzilai alikuwa mzee mwenye miaka 80, naye ndiye aliyemtunza mfalme, alipokaa Mahanaimu, kwani alikuwa mtu mkuu sana.[#2 Sam. 17:27.]

³³Mfalme akamwambia Barzilai: Wewe fuatana na mimi, nami nikutunze kwangu Yerusalemu!

³⁴Lakini Barzilai akamwambia mfalme: Siku za miaka yangu ya kuwapo ni ngapi, nipande kwenda Yerusalemu pamoja na mfalme?

³⁵Mimi ni mwenye miaka 80 leo, nitawezaje kupambanua yaliyo mema nayo yaliyo mabaya? Au mtumishi wako atawezaje kuuona utamu wa vilaji, ninavyovila, nao wa vinywaji, ninavyovinywa? Au nitawezaje kuzisikiliza sauti zao waimbaji wa kiume na wa kike? Kwa hiyo mtumishi wako atatakaje kukulemea tena, bwana wangu mfalme?

³⁶Kidogo tu mtumishi wako atamsindikiza mfalme, akiisha kuuvuka Yordani. Sababu gani mfalme anataka kunirudishia tendo hili kwa njia ile?

³⁷Mwache mtumishi wako, arudi, nipate kujifia mjini kwangu kwenye kaburi la baba yangu na la mama yangu. Lakini tazama, huyu ni mtumishi wako Kimuhamu; yeye atakwenda huko pamoja na bwana wangu mfalme, umfanyizie yaliyo mema machoni pako.

³⁸Mfalme akajibu: Basi, Kimuhamu atakwenda huko pamoja na mimi, nami nitamfanyizia yaliyo mema machoni pangu, nayo yote, utakayonitakia, nitakufanyizia.

³⁹Watu wote walipokwisha kuuvuka Yordani, mfalme naye akavuka; kisha mfalme akamnonea Barzilai, naye akambariki, kisha akarudi mahali pake.

⁴⁰Mfalme alipoendelea kwenda Gilgali, Kimuhamu akaenda naye. Watu wote wa Yuda walikuwa wamevuka pamoja na mfalme, hata nusu ya watu wa Waisiraeli.

Waisiraeli nao wanamjia Dawidi.

⁴¹Mara watu wote wa Waisiraeli wakaja kwa mfalme, wakamwambia mfalme: Mbona ndugu zetu Wayuda wamekuiba, wakimvusha mfalme nao wa mlango wako kule Yordani nao watu wote wa Dawidi waliokuwa naye.

⁴²Ndipo, watu wote wa Yuda walipowajibu Waisiraeli: Maana mfalme ni karibu kwetu; kwa sababu gani mnalichafukia jambo hili? Je? Tumekula mali za mfalme? Au ametupa tunzo lo lote?[#2 Sam. 19:11-12.]

⁴³Ndipo, Waisiraeli walipowajibu Wayuda kwamba: Mafungu yetu sisi yaliyoko kwa mfalme ni kumi, kwa hiyo naye Dawidi ni wetu kuliko wenu. Mbona mmetubeua? Je? Shauri hilo la kumrudisha mfalme halikutupasa kwanza sisi? Lakini maneno yao Wayuda yalikuwa magumu kuliko yao Waisiraeli.