¹Ninyi mabwana, wapeni watumwa wenu yawapasayo, mwalinganishe! Jueni, nanyi mko na Bwana mbinguni![#3 Mose 25:43,53.]

Paulo anawahimiza, wamwombee.

²Fulizeni kumwomba Mungu! Kesheni kuomba na kushukuru![#1 Tes. 5:17.]

³Na sisi vilevile tuombeeni, Mungu atufungulie mlango wa kuingizamo Neno lake, tupate kulisema fumbo la Kristo, ni lilelile, nililofungiwa,[#Kol. 1:26; Rom. 15:30; Ef. 6:19; 2 Tes. 3:1; 1 Kor. 16:9.]

⁴nipate kulifumbua, kama inavonipasa kulisema!

⁵Walioko nje waendeeni kwa werevu wa kweli! Siku mlizopewa, mzitumie vema![#Ef. 5:15-16; 1 Tes. 4:12.]

⁶Maneno yenu yawe po pote ya kupendeza yakiwa matamu kama yenye chumvi, mpate kujua yanayofaa ya kumjibu mtu awaye yote![#Ef. 4:29; Mar. 9:50.]

⁷Mambo yangu yote yalivyo, atawatambulisha Tikiko aliye ndugu mpendwa na mtumishi mwelekevu na mtumwa mwenzangu, kwa kuwa wake Bwana.

⁸Nami nimemtuma kwenu kwa ajili ya neno lili hili, mpate kuyatambua mambo yetu, naye ataituliza mioyo yenu.[#Ef. 6:22.]

⁹Anaye Onesimo, ni ndugu mwelekevu, nimpendaye, ni mtu wa kwenu. Watawatambulisha, yote ya huku yalivyo.[#File. 10.]

Salamu.

¹⁰Aristarko, mfungwa mwenzangu, na Marko, mpwae Barnaba, wanawasalimu ninyi; kwa ajili yake yeye mmepata maagizo; atakapokuja kwenu, mpokeeni![#Tume. 12:12,25; 19:29; 27:2.]

¹¹Naye Yesu anayeitwa Yusto anawasalimu. Kwao Wakristo wa Kiyuda ni hao watatu tu walio wenzangu wa kazi ya kuujenga ufalme wa Mungu, ndio walionituliza moyo.

¹²Epafura aliye wa kwenu anawasalimu; ni mtumwa wa Kristo Yesu, naye huwagombea kila siku na kuwaombea, mpate kusimama wenye kuyatimiza na kuyatambua yote, Mungu ayatakayo.[#Kol. 1:7.]

¹³Kwani namshuhudia kwamba: Hujisumbua sana kwa ajili yenu na kwa ajili yao walioko Laodikia na Hierapoli.

¹⁴Luka aliye mganga mpendwa na Dema wanawasalimu.[#2 Tim. 4:10-11; File. 24.]

¹⁵Wasalimieni ndugu walioko Laodikia, naye Nimfa nao wateule waliomo nyumbani mwake!

¹⁶Barua hii, ikiisha kusomwa kwenu, angalieni, isomwe hata kwao wateule wa Laodikia, nanyi mwisome ile ya Laodikia!

¹⁷Tena mwambieni Arkipo: Uangalie utumishi wako, ulioupokea wa kumtumikia Bwana, uutimize vema![#File. 2.]

¹⁸Salamu hii naiandika kwa mkono wangu mimi Paulo. Ikumbukeni hii minyororo yangu! Upole uwakalie! Amin.[#1 Kor. 16:21; 2 Tes. 3:17.]