Mapatilizo ya wakuu wa Yuda.

¹Roho ikanichukua, ikanipeleka kwenye lango la Nyumba ya Bwana la mashariki lielekealo maawioni kwa jua. Hapo pa kulilingilia lile lango nikapaona waume 25; katikati yao nikamwona Yazania, mwana wa Azuri, na Pelatia, mwana wa Benaya, walio wakuu wa ukoo huu.[#Ez. 3:12.]

²Akaniambia: Mwana wa mtu, hawa waume ndio wanaowaza yaliyomaovu na kuwapigia watu mashauri mabaya humu mjini.

³Ndio wanaosema: Kujenga nyumba siko karibu; mji huu ndio nyungu, nasi ndio nyama.

⁴Kwa hiyo wafumbulie yatakayokuwa! Wafumbulie, mwana wa mtu!

⁵Ndipo, Roho ya Bwana iliponiangukia, ikaniambia: Sema: Hivi ndivyo, Bwana anavyosema: Ndivyo, mlivyosema, mlio wa mlango wa Isiraeli, nayo mawazo yainukayo rohoni mwenu mimi nimeyajua.

⁶Wenzenu, mliowaua humu mjini, ni wengi, mkajaza barabara za mji mizoga yao.

⁷Kweli hivi ndivyo, Bwana Mungu anavyosema: Wenzenu, mliowaua na kuwalaza humu mjini, hao ndio nyama, nao mji huu ndio nyungu, lakini ninyi watawatoa humu mjini.

⁸Panga mnaziogopa, lakini nitawaletea panga; ndivyo, asemavyo Bwana Mungu.

⁹Kisha nitawatoa humu mjini, niwatie mikononi mwa wageni; ndipo, nitakapowakatia mashauri.

¹⁰Mtauawa kwa panga, kwenye mipaka ya Isiraeli ndiko, nitakakowapatiliza; ndipo, mtakapojua, ya kuwa mimi ni Bwana.[#2 Fal. 25:20-21.]

¹¹Mji huu hautakuwa nyungu yenu, mkiwa nyama humu mjini, ila kwenye mipaka ya Isiraeli ndiko, nitakakowapatiliza.

¹²Ndipo, mtakapojua, ya kuwa mimi ni Bwana; hamkuyafuata maongozi yangu, wala hamkuyafanya mashauri yangu, ila mmefanya, kama wamizimu wawazungukao wanavyopiga mashauri.

¹³Ikawa, nilipowafumbulia haya, ndipo, Pelatia, mwana wa Benaya, alipokufa; nikaanguka kifudifudi na kulia kwa sauti kuu nikisema: E Bwana Mungu, wewe utalimaliza sao lake Isiraeli![#Ez. 9:8.]

Matulizo ya roho zao waliotekwa.

¹⁴Neno la Bwana likanijia la kwamba:

¹⁵Mwana wa mtu, ndugu zako, hawa ndugu zako, ambao mlitekwa pamoja nao, hata mlango wote wa Isiraeli, hawa wote ndio, wenyeji wa Yerusalemu waliowaambia: Nendeni mbali mkitoka kwake Bwana! Sisi tumepewa nchi hii, iwe yetu!

¹⁶Kwa hiyo sema: Hivi ndivyo, Bwana Mungu anavyosema kwamba: Kweli nimewapeleka mbali kwenye wamizimu na kuwatawanya katika hizo nchi siku hizi zilizo chache, nikawa mwenyewe patakatifu pao katika nchi hizo, walikopelewa.[#Ez. 6:8-10; Yer. 24:5-6.]

¹⁷Kwa hiyo sema: Hivi ndivyo Bwana Mungu anavyosema: Nitawakusanya ninyi na kuwatoa katika hayo makabila, kweli nitawaunganisha ninyi na kuwatoa katika nchi hizo, nilikowatawanya, niwape ninyi nchi ya Isiraeli.[#Yer. 29:14.]

¹⁸Napo watakapoiingia watayaondoa huko matapisho yake yote na machukizo yake yote.

¹⁹Nami nitawapa kuwa moyo mmoja, tena nitatia roho moja mioyoni mwao; namo miilini mwao nitaitoa mioyo iliyo migumu kama mawe nikiwatia mioyo inayolegea kama nyama.[#Ez. 36:26; Yer. 24:7.]

²⁰Ndivyo, watakavyoyafuata maongozi yangu na kuyashika mashauri yangu, wayafanye. Watakuwa ukoo wangu, nami nitakuwa Mungu wao.[#Yer. 31:33.]

²¹Lakini wenye mioyo iyaelekeayo matapisho yao na machukizo yao, mioyo yao ikayafuata, basi, nitawapatilizia njia zao vichwani pao.

²²Ndipo, Makerubi walipoyakunjua mabawa yao, nayo magurudumu yakawa kando yao, nao utukufu wa Mungu wa Isiraeli ukawa juu yao.[#Ez. 1:4-28.]

²³Kisha utukufu wa Bwana ukapanda ukiondoka mle mjini katikati, ukasimama juu ya mlima ulioko karibu ya mji upande wa maawioni kwa jua.

²⁴Roho ikanichukua, ikanipeleka katika nchi ya Wakasidi kwenye mateka kwa nguvu ya hayo maono ya Roho ya Mungu. Kisha hayo maono, niliyoyaona, yakaniondokea.[#Ez. 3:12.]

²⁵Nikawaambia waliotekwa mambo yote ya Bwana, aliyonionyesha.