Ufumbuo wa mabaya yatakayompata mfalme.

¹Neno la Bwana likanijia la kwamba:

²Mwana wa mtu, utegee mlango wa Isiraeli kitendawili na kuuambia fumbo!

³Sema: Hivi ndivyo, Bwana Mungu anavyosema: Kulikuwako tai mkubwa mwenye mabawa makubwa na manyoya marefu mabawani ya kumwendesha, nayo mengi mno yalikuwa yenye rangi; huyo akaja Libanoni, akajichukulia kilele cha mwangati.

⁴Chipuko lake la juu penyewe akalivunja, akalipeleka katika nchi yenye biashara, akalitia mjini, wachuuzi wakaamo.[#Ez. 16:29.]

⁵Kisha akachukua nayo mbegu ya hiyo nchi, akaipanda shambani panapopandwa mbegu, kwenye maji mengi, iwe kijiti, akaitunza kama mbula.

⁶Ikaota, ikawa mzabibu uliotambaa wenye kisiki kifupi, kwani matawi yake yalimgeukia mwenyewe, nayo mizizi yake ilikuwa chini yake yeye; ukawa mzabibu wa kweli, ukapata matawi yaliyochipuza majani mazuri.[#Ez. 19:10.]

⁷Kukawa na tai mkubwa mwingine mwenye mabawa makubwa yenye manyoya mengi; mara ule mzabibu ukampindukia yeye, mizizi yake imtwetee kwa kumtamani, nayo matawi yake ukamwelekezea yeye, aunyweshe kuliko hayo matuta, ulikopandwa.

⁸Nao ulikuwa umepandwa katika shamba zuri lenye maji mengi, uchipuke matawi yatakayoleta matunda, uwe mzabibu wenye utukufu.

⁹Basi, sema: hivi ndivyo, Bwana Mungu anavyosema: Je? Utafanikiwa? Yule hataing'oa mizizi yake na kuyakata matunda yake, ukauke? Kweli majani yote ya machipuko yake yatakauka; hautatakiwa mkono wenye nguvu wala watu wengi wa kuung'oa kwenye mizizi yake.

¹⁰Kweli ulikuwa umepandwa, lakini utafanikiwa? Hautakauka kabisa, upepo utokao upande wa maawioni kwa jua utakapouvumia? Utakauka kweli hapo hapo matutani, ulikochipukia.

¹¹Neno la Bwana likanijia la kwamba:

¹²Uambie mlango huu mkatavu: Je? Hamwijui maana yake hayo? Sema: Mwemwona mfalme wa Babeli, akija Yerusalemu, akimchukua mfalme wake na wakuu wake na kuwapeleka kwake Babeli.[#2 Fal. 24:10,15.]

¹³Kisha alichukua mmoja wa kizazi cha kifalme, akafanya naye agano na kumwapisha. Lakini wenye nguvu wa nchi hii akawachukua,[#2 Fal. 24:17.]

¹⁴ufalme ukae chini tu, usijikweze, usimamike tu kwa kulishika agano lake.

¹⁵Kisha huyo akakataa kumtii, akatuma wajumbe kwenda Misri, wampe farasi na watu wengi. Aliyeyafanya hayo atawezaje kufanikiwa na kujiokoa? Kwa kulivunja agano ataponaje?

¹⁶Ndivyo, asemavyo Bwana Mungu: Hivyo, nilivyo Mwenye uzima, kweli atakufa mle Babeli, mle mjini, mfalme akaamo aliyempa ufalme, kwa kuwa alikibeza kiapo chake na kulivunja agano lake.

¹⁷Naye Farao hataleta vikosi vikubwa vyenye watu wengi amfalie kitu vitani, watakapomzungushia ukingo wa mchanga na kujenga minara, kusudi waangamize watu wengi na kuwaua.

¹⁸Kwa kuwa alikibeua kiapo na kulivunja agano, aliloliinulia mkono, kwa hiyo ataona: kwa kuyafanya hayo yote hataokoka.

¹⁹Kwa sababu hii ndivyo, Bwana Mungu anavyosema: Hivyo, nilivyo Mwenye uzima, kiapo changu alichokibeua, na agano langu, alilolivunja, nitamtwika kichwani.

²⁰Nami nitamtegea wavu wangu, anaswe katika tanzi langu kisha nitampeleka Babeli; ndiko, nitakakomkatia shauri kwa kuyavunja maagano yangu.[#Ez. 12:13.]

²¹Nao watoro wake wote katika vikosi vyake vyote wataangushwa kwa panga, nao watakaosalia watatawanywa pande zote za upepo. Ndipo, mtakapojua, ya kuwa mimi Bwana nimesema.

²²Hivi ndivyo, Bwana Mungu anavyosema: Mimi nitachukua tawi la kilele cha mwangati mrefu, nilipande; pake juu penyewe katika mlima mrefu ulioinuka sana.[#Yes. 11:1; 53:2.]

²³Katika huo mlima mrefu wa Isiraeli nitalipanda, lichupuke matawi yatakayozaa mbegu, nalo litakuwa mwangati wenye utukufu; chini yake watakaa ndege wa kila namna wenye manyoya mbalimbali, chini kivulini mwa matawi yake watajenga matundu yao.[#Ez. 20:40; Dan. 4:12; Mat. 13:32.]

²⁴Ndipo, miti yote ya shambani itakapojua, ya kuwa mimi Bwana hunyenyekeza mti mrefu, tena hukuza mti mfupi, ya kuwa mimi hukausha mti mbichi, tena huchipuza mti mkavu. Mimi Bwana niliyeyasema nitayafanya.[#Ez. 21:26.]