Ezekieli anaitwa kuwa mfumbuaji.

¹Akaniambia: Wewe mwana wa mtu, simama kwa miguu yako, niseme na wewe!

²Aliposema na mimi, roho ikanijia, ikanipa kusimama kwa miguu yangu, nikamsikia aliyesema na mimi.

³Akaniambia: Wewe mwana wa mtu, mimi ninakutuma kwa wana wa Isiraeli walio mataifa makatavu, walionikataa mimi, wao wenyewe na baba zao wamenikosea mpaka leo.

⁴Hawa wana nao ni wenye nyuso zishupaazo na wenye mioyo migumu. Sasa mimi ninakutuma kwao, uwaambie: Hivi ndivyo, Bwana Mungu anavyosema!

⁵Nao ikiwa wanasikia, au ikiwa wanaacha kusikia, kwani ndio mlango mkatavu, lakini watajua, ya kuwa yuko mfumbuaji katikati yao.[#Ez. 3:11,27.]

⁶Nawe mwana wa mtu, usiwaogope! Wala maneno yao usiyaogope! Ijapo miiba ikuchome, ijapo ukae penye nge, usiyaogope maneno yao! Wala usizistuke nyuso zao! Kwani ndio mlango mkatavu.

⁷Sharti uwaambie maneno yangu, ikiwa wanasikia, au ikiwa wanaacha kusikia, kwani ndio wakatavu.

⁸Nawe mwana wa mtu, yasikie, mimi ninayokuambia! Usiwe mkatavu kama mlango huu mkatavu! Kifumbue kinywa chako, ule, mimi nitakachokupa!

⁹Nilipotazama nikaona mkono nilionyosewa mimi, namo mwake nikaona kitabu kilichozingwa.[#Ufu. 10:8-11.]

¹⁰Akakizingua, nacho kilikuwa kimeandikwa upande wa mbele na wa nyuma; nayo yaliyoandikwa humo yalikuwa maombolezo na masikitiko na vilio.