Panga za Wakasidi zitawajia Wayudana Waamoni.

¹Neno la Bwana likanijia la kwamba:

²Mwana wa mtu, uelekeze uso wako kuutazama Yerusalemu, upatangazie Patakatifu na kuifumbulia nchi ya Isiraeli yatakayokuwa!

³Iambie nchi ya Isiraeli: Hivi ndivyo, Bwana anavyosema: Utaona, nikikujia na kuuchomoa upanga wangu alani mwake, niangamize waongofu na wapotovu, watoweke kwako.

⁴Kwa kuwa nitaangamiza waongofu na wapotovu, watoweke kwako, kwa hiyo upanga wangu utachomolewa alani mwake, uwapige wote wenye miili toka kusini hata kasikazini.

⁵Ndipo, wote wenye miili watakapojua, ya kuwa mimi ni Bwana, ya kuwa nimeuchomoa upanga wangu alani mwake, usirudi humo tena.

⁶Lakini wewe mwana wa mtu, piga kite! Kwa viuno vilivyovunjika na kwa uchungu ulio mkali piga kite, wakuone!

⁷Tena wakikuuliza: Unapiga kite? uwaambie: Kwa hayo, niliyoyasikia, ya kuwa yatakuja, moyo wote umeyeyuka, nayo mikono ikalegea, nayo roho yote ikazimia, nayo magoti yakaja kugeuka kuwa kama maji. Mtaona, yakija kutimia; ndivyo, asemavyo Bwana Mungu.

⁸Neno la Bwana likanijia la kwamba:

⁹Mwana wa mtu, yafumbue yatakayokuwa ukisema: Hivi ndivyo, Bwana anavyosema: Sema: Uko upanga, ni upanga mwenyewe, umenolewa na kusuguliwa vema.[#Ez. 32:20.]

¹⁰Umenolewa, kusudi uchinje machinjo, ukasuguliwa, kusudi ukatuke kama umeme. Au tuufurahie? Fimbo ya kumpigia mwanangu haishindwi na mti wo wote.

¹¹Aliutoa, usuguliwe vema, apate kuushika mkononi; nao ukanolewa ule upanga, ukasuguliwa vema, mwuaji apewe mkononi.

¹²Piga yowe na kupaza sauti, mwana wa mtu! Kwani huo ndio unaowajia walio ukoo wangu, ndio unaowajia nao wakuu wa Isiraeli; wametupwa kwenye upanga pamoja nao walio ukoo wangu. Kwa hiyo jipige mapaja!

¹³Kwani walijaribiwa, lakini imewafaliaje? Sasa je? Fimbo nayo ikatae kuwapiga? Haitakuwa; ndivyo, asemavyo Bwana Mungu.[#Yes. 1:5.]

¹⁴Nawe mwana wa mtu, yafumbue yatakayokuwa ukiyapiga makofi! Kwani huo upanga utakuja mara mbili, hata mara tatu, ndio upanga upigao madonda kabisa, kweli ndio upanga mkubwa upigao madonda, ndio utakaowazunguka,

¹⁵kusudi mioyo iyeyuke, tena wengi waanguke kwa kukwazwa; malangoni pao po pote nitatoa matisho ya huo upanga. A! Umefanywa, umerimete kama umeme! Umenolewa, upate kuchinja!

¹⁶Jitege kupiga kuumeni! Jiweke tayari kupiga kushotoni! Piga po pote, makali yako yatakapoelekea!

¹⁷Mimi nami nitayapiga makofi yangu nitakapoyatuliza makali yangu yenye moto; mimi Bwana nimeyasema.

¹⁸Neno la Bwana likanijia la kwamba:

¹⁹Wewe mwana wa mtu, jitengenezee njia mbili, upanga wa mfalme wa Babeli utakazozishika! Zote mbili zitatoka katika nchi moja; hapo njia pembeni pachore mkono, uelekezee mji, ndivyo uuchore![#Ez. 4:1.]

²⁰Tengeneza njia, upanga utayoishika kwenda Rabati ya wana wa Amoni, tena nyingine kwenda Yuda katika Yerusalemu ulio na boma.

²¹Kwani mfalme wa Babeli atasimama hapo penye njia panda, zile njia mbili zinapoanzia, apate kuagua uaguaji, akisukasuka mishale au akipiga bao au akitazama maini.

²²Kuumeni kwake kutaanguka kura ya Yerusalemu kwamba: aweke magogo ya kuvunjia boma, afumbue kinywa kupiga kelele, apaze sauti kupiga yowe, aweke magogo ya kuvunjia penye malango, azungushe ukingo wa mchanga, ajenge minara.

²³Nao uaguaji kama huo utakuwa uwongo machoni pao, ijapo wauapie viapo; lakini yeye atawakumbusha manza, walizozikora, kusudi watekwe.

²⁴Kwa hiyo Bwana Mungu anasema hivi: Kwa kuwa mnanikumbusha manza, mlizozikora, mapotovu yenu yakifunuliwa, makosa yenu yakitokea waziwazi kwa matendo yenu yote, kwa kuwa mnakumbukwa hivyo, basi, mtakamatwa kwa mikono.

²⁵Lakini wewe mkuu wa Isiraeli uliyejipatia uchafu kwa kuacha kunicha, siku yako imetimia, kwa kuwa ni wakati wa mwisho wa kukora manza.

²⁶Hivi ndivyo, Bwana Mungu anavyosema: Kiondoe kilemba cha kifalme! Ivue nayo taji! Haya ya sasa siyo yatakayokuwa tena. Yaliyoko chini ndiyo, watakayoyakweza, nayo yaliyoko juu ndiyo, watakayoyanyenyekeza.[#Ez. 17:24; 2 Mose 28:4; Luk. 18:14.]

²⁷Mabomoko na mabomoko na mabomoko ndiyo, nitakayoyaweka huku; lakini nayo siyo yatakayokuwa vivyo hivyo, mpaka aje, ambaye ni haki yake; yeye ndiye, nitakayempa.[#1 Mose 49:10.]

²⁸Nawe mwana wa mtu, yafumbue yatakayokuwa ukisema: Haya ndiyo Bwana Mungu anayowaambia wana wa Amoni kwa ajili ya matusi yao, sema: Upanga ulio upanga kweli umechomolewa, nao umesuguliwa, upate kuchinja na kuua kabisa, kusudi uwe kama umeme.[#Ez. 25:2-7.]

²⁹Lakini wamekutazamia maono yasiyokuwa, wakakuagulia uwongo, wakuvute, uje kuwapiga shingo zao waliojipatia uchafu na kuacha kunicha, kwamba siku yao imetimia, kwa kuwa ni wakati wa mwisho wa kukora manza.

³⁰Lakini urudishe huo upanga alani mwake! Mahali, ulipoumbwa katika nchi, ulikozaliwa, nitakukatia shauri.

³¹Nitakumwagia makali yangu, kwa moto wa machafuko yangu nitakufokea, kisha nitakutia mikononi mwa watu wasio wa kimtu, walio mafundi wa maangamizo.

³²Utakuwa chakula cha moto, damu yako itamwagwa katika nchi yako katikati, hutakumbukwa tena, kwani mimi Bwana nimeyasema.