Mapatilizo ya Wamisri na ya Farao.

¹Neno la Bwana likanijia la kwamba:

²Mwana wa mtu, fumbua yatakayokuwa, ukisema: Hivi ndivyo, Bwana Mungu anavyosema: Pigeni vilio kwamba: Ni siku gani hii?

³Kwani siku iko karibu, kweli siku ya Bwana iko karibu! ni siku yenye mawingu, itakuwa wakati wa wamizimu.[#Yoe. 1:15.]

⁴Panga zitaingia Misri, nayo nchi ya Nubi itatetemeka, watu waliopigwa kwa panga wakianguka huko Misri, wengine wakizichukua mali zao, tena wakiibomoa misingi yao.

⁵Wanubi na Waputi na Waludi nao wote waliochanganyika nao na Wakubu na wenyeji wa nchi, waliofanya maagano nao, wote pia watauawa kwa panga.

⁶Hivi ndivyo, Bwana anavyosema: Nao walioiegemea nchi ya Misri wataangushwa, majivuno ya nguvu zake yakinyenyekezwa; kuanzia Migidoli kufikisha Siwene watauawa kwao kwa panga; ndivyo, asemavyo Bwana Mungu.

⁷Nchi zao zitakuwa peke yao katikati ya nchi nyingine zilizo peke yao nazo, nayo miji yao itakuwa vivyo hivyo katikati ya miji iliyo mabomoko tu.

⁸Ndipo, watakapojua, ya kuwa mimi ni Bwana; nitakapowasha moto katika Misri, nao wasaidiaji wake wote watavunjwa.

⁹Siku ile watatoka kwangu wajumbe kwenda katika merikebu kuwastusha nao Wanubi wakaao na kutulia; ndipo, watakapotetemeka, ile siku ya Misri itakapokuja, kwani wataiona, inavyokuja.[#Yes. 18:2; 20:3-4.]

¹⁰Hivi ndivyo, Bwana Mungu anavyosema: Nitawakomesha wale watu wengi wa Misri kwa mkono wa Nebukadinesari, mfalme wa Babeli.

¹¹Yeye na watu wake, alio nao, ni wakali kuliko mataifa mengine; watapelekwa kuiangamiza hiyo nchi, watazichomoa panga zao kuwapiga Wamisri, waijaze hiyo nchi watu walioumizwa na panga.

¹²Nayo majito yake nitayakausha, nayo nchi hiyo nitaiuza mikononi mwa watu wabaya, niiangamize kwa mikono ya wageni pamoja nayo yote yaliyomo. Mimi Bwana nimeyasema.

¹³Hivi ndivyo, Bwana Mungu anavyosema: Nitayapoteza magogo ya kutambikia mle Nofu, hata vinyago nitavikomesha, pasiwe tena mkuu atokaye katika nchi ya Misri, tena nitaitisha nchi ya Misri.

¹⁴Patirosi nitaigeuza kuwa mapori tu, mle Soani nitawasha moto, namo No nitawahukumu waliomo.

¹⁵Mji wa Sini ulio boma lake Misri nitaumwagia makali yangu yenye moto, nao watu wengi waliomo No nitawaangamiza.

¹⁶Nitawasha moto katika Misri: Sini utaona machungu makuu, No utavunjwa kwa kubomolewa, Nofu utapata wanaousonga mchana.

¹⁷Vijana wa Oni na wa Pi-Beseti watauawa kwa panga, watu wao wengine watatekwa na kuhamishwa.

¹⁸Namo Tehafunesi mchana utageuka kuwa giza, nitakapozivunja mle bakora za kifalme za Misri; namo ndimo, nitakamoyakomesha majivuno ya nguvu zao; mji wenyewe wingu litaufunika, navyo vijiji vyake vya shambani vitatekwa na kuhamishwa.

¹⁹Hivyo ndivyo, nitakavyokata mashauri huko Misri; ndipo, watakapojua, ya kuwa mimi ni Bwana.

²⁰Ikawa katika mwaka wa 11 siku ya saba ya mwezi wa kwanza, ndipo, neno la Bwana liliponijia la kwamba:

²¹Mwana wa mtu, mkono wa Farao, mfalme wa Misri, nimeuvunja, lakini tazama, haukufungwa, upate kupona, hawakuutakia kitambaa tu, kwamba waufunge, wautie nguvu tena, upate kushika upanga.

²²Kweli hivi ndivyo, Bwana Mungu anavyosema: Utaniona, nikimjia Farao, mfalme wa Misri, nitaivunja mikono yake, ule ulio na nguvu bado nao ule uliokwisha kuvunjika, niuangushe upanga chini uliomo mkononi mwake.

²³Nao Wamisri nitawatawanya kwenye mataifa mengine na kuwatupatupa katika hizo nchi.

²⁴Lakini mikono ya mfalme wa Babeli nitaitia nguvu, nao upanga wangu nitampa mkononi mwake, niivunje mikono ya Farao, ampigie yeye kite kama mtu mwenye vidonda.[#Ez. 29:20.]

²⁵Mikono ya mfalme wa Babeli nitaitia nguvu, lakini mikono ya Farao itaanguka; ndipo, watakapojua, ya kuwa mimi ni Bwana, nitakapompa mfalme wa Babeli upanga wangu mkononi mwake, aichomolee nchi ya Misri.

²⁶Nao Wamisri nitawatawanya kwenye mataifa mengine na kuwatupatupa katika hizo nchi. Ndipo, watakapojua, ya kuwa mimi ni Bwana.