Wokovu wa Isiraeli.

¹Wewe mwana wa mtu, ufumbulie mlima wa Isiraeli yatakayokuwa, na kuiambia milima ya Isiraeli: Sikieni neno la Bwana![#Ez. 6:2.]

²Hivi ndivyo, Bwana Mungu anavyosema: Kwa kuwa adui wamesema na kuwabeza: Aha! Vilima vya kale na kale vimekuwa vyetu, tuvichukue![#Ez. 25:3.]

³kwa hiyo yafumbue yatakayokuwa ukisema: Hivi ndivyo, Bwana Mungu anavyosema: Kweli wamewageuza ninyi vilima kuwa mapori tu na kuwafokea pande zote, mwe vyao wa mataifa waliosalia, wawachukue, habari za kwenu zikasimuliwa na vinywa vyao vyenye ndimi mbaya, watu wakazinong'onezana.

⁴Kwa sababu hiyo, ninyi milima ya Isiraeli, sikieni neno la Bwana Mungu: Hivi ndivyo, Bwana Mungu anavyoiambia milima iliyo mirefu nayo iliyo mifupi, hata makorongo na mabonde, nayo mabomoko na mapori, nayo miji iliyo mahame tu, iliyonyang'anywa na kuzomelewa na masao ya mataifa yaliyokaa na kuizunguka.

⁵Kweli hivi ndivyo, Bwana Mungu anavyosema: Kweli itakuwa kwa moto wa wivu wangu, nikisema nao walio masao ya mataifa nao Waedomu wote waliojipa wenyewe nchi yangu, waichukue, iwe yao, wakafurahi kwa mioyo yote na kwa roho zenye mabezo walipowafukuza wa kwenu na kuwanyang'anya mali zao.[#Ez. 35:15.]

⁶Kwa hiyo ifumbulie nchi ya Isiraeli yatakayokuwa ukiiambia milima mirefu na mifupi, nayo makorongo na mabonde: Hivi ndivyo, Bwana Mungu anavyosema: Mtaniona, nikisema kwa wivu na kwa makali yangu yenye moto, kwa kuwa mmejitwika yaliyowatia soni kwa wamizimu.

⁷Kwa hiyo Bwana Mungu anasema hivi: Mimi nimeuinua mkono wangu, kwa hiyo itakuwa kweli: wamizimu wanaokaa na kuwazunguka watajitwika wenyewe yanayowatia soni.

⁸Lakini ninyi, milima ya Isiraeli, mtayachipuza matawi yenu, mzae nayo matunda yenu, kwa ajili yao walio ukoo wangu wa Isiraeli, kwani hao watakuja bado kidogo.

⁹Kwani mtaniona, nikija kwenu na kuwageukia, mpate kulimwa na kupandwa.

¹⁰Hata watu wengi nitawakalisha kwenu wa milango yote pia ya Isiraeli, miji yao ikaliwe tena, nayo mabomoko yajengwe tena.

¹¹Nitakalisha kwenu watu wengi na nyama wengi, wazidi tena kwa kuzaa sana. Hivyo nitawapa kuwa wengi hapo, mtakapokaa kama siku zenu za kale, nitawafanyizia mema mengi kuliko siku za kwanza; ndipo, mtakapojua, ya kuwa mimi ni Bwana.[#Ez. 36:38.]

¹²Kwenu nitawatembeza tena walio ukoo wangu wa Isiraeli, wawachukue, mwe tena fungu lao; hamtawaua tena wana wao.

¹³Hivi ndivyo, Bwana Mungu anavyosema: Kwa kuwa watu huwaambia ninyi: Wewe ndiwe mla watu, tena ndiwe muua watoto wa kwako,

¹⁴kwa hiyo hutakula mtu tena, wala hutawaua tena watoto wa kwako; ndivyo, asemavyo Bwana Mungu.

¹⁵Sitaki, usikie kwako tena matusi ya wamizimu, wala hutajitwika tena yakutiayo soni kwa makabila ya watu, wala hutawakwaza tena watu wa kwako; ndivyo, asemavyo Bwana Mungu.

Mioyo mipya, Mungu atakayowapa Waisiraeli.

¹⁶Neno la Bwana likanijia la kwamba:

¹⁷Mwana wa mtu, walio mlango wa Isiraeli walipokaa katika nchi yao, waliitia uchafu kwa njia zao na kwa matendo yao; njia zao zilikuwa machoni pangu kama uchafu wa mwanamke mwenye siku zake.[#3 Mose 8:25,28.]

¹⁸Nikawamwagia makali yangu yenye moto kwa ajili ya damu, walipozimwaga katika nchi hiyo, tena walipojipatia uchafu na magogo yao ya kutambikia.

¹⁹Nikawatawanya kwenye wamizimu na kuwatupatupa katika hizo nchi zao nilipowahukumu kwa hivyo, njia zao na matendo yao yalivyokuwa.

²⁰Walipofika kwenye wamizimu wakalipatia Jina langu takatifu uchafu po pote, walipofika, watu wakisema kwa ajili yao: Hawa ndio walio ukoo wake Bwana, wametolewa katika nchi yao.[#Yes. 52:5.]

²¹Nikaona uchungu kwa ajili ya Jina langu takatifu, wale wa mlango wa Isiraeli walilolipatia uchafu kwenye mataifa po pote, walipofika.[#Ez. 20:9.]

²²*Kwa hiyo uambie mlango wa Isiraeli: Hivi ndivyo, Bwana Mungu anavyosema: Si kwa ajili yenu, ninyi na mlango wa Isiraeli, nikiwafanyizia hivyo, ila kwa ajili ya Jina langu takatifu, mlilolipatia uchafu kwenye wamizimu po pote, mlipofika.[#Sh. 115:1; Yer. 14:7.]

²³Nitalitakasa tena Jina langu kuu lililopatiwa uchafu kwenye wamizimu, mlilolipatia uchafu kwao; ndipo wamizimu watakapojua, ya kuwa mimi ni Bwana, nitakapotakasika kwenu machoni pao; ndivyo, asemavyo Bwana Mungu.[#Ez. 37:28.]

²⁴Nitawachukua kwenye wamizimu nikiwakusanya na kuwatoa katika hizo nchi, niwarudishe katika nchi yenu.

²⁵Nami nitawanyunyizia maji safi, ndipo, mtakapokuwa mmesafishwa; nitawasafisha, yawaondokee makosa yenu yote nayo magogo yenu yote, mliyoyatambikia.[#Zak. 13:1; Ebr. 10:22.]

²⁶Nitawapa mioyo mipya, namo ndani yenu nitatia roho mpya, nitaitoa miilini mwenu ile mioyo iliyo migumu kama mawe, niwape mioyo iliyolegea kama nyama.[#Ez. 11:19.]

²⁷Nayo roho yangu nitaitia ndani yenu, niwageuze kuwa watu wanaoyafuata maongozi yangu, wayashike mashauri yangu, wayafanye.[#Ez. 37:24; 39:29; Yes. 44:3.]

²⁸Nanyi mtakaa katika hiyo nchi, niliyowapa baba zenu, mkiwa ukoo wangu, mimi nami nitakuwa Mungu wenu.*[#Ez. 11:20.]

²⁹Nami nitawaokoa katika machafu yenu yote, kisha nitaziita ngano, nizizidishe kuwa nyingi, sitaleta tena njaa kwenu.

³⁰Nayo matunda ya miti nitayazidisha kuwa mengi nayo mazao ya mashamba, kusudi msitiwe soni tena kwa wamizimu mkipatwa na njaa.[#Yoe. 2:17,19.]

³¹Mtakapozikumbuka njia zenu mbaya na matendo yenu yasiyokuwa mazuri, ndipo, mtakapojichukia wenyewe machoni penu kwa ajili ya maovu yenu na machukizo yenu, mliyoyafanya.[#Ez. 16:61,63.]

³²Ndivyo, asemavyo Bwana: Na ijulike kwenu, ya kuwa siwafanyizii hivyo kwa ajili yenu; sharti mwone soni na kuiva nyuso kwa ajili ya njia zenu, ninyi wa mlango wa Isiraeli.[#Ez. 36:22.]

³³Hivi ndivyo, Bwana Mungu anavyosema: Siku, nitakapowasafisha na kuwaondolea manza zote, mlizozikora, ndipo, nitakapoipatia miji yenu watu wa kukaa humo, nayo mabomoko yatajengwa tena.

³⁴Nayo nchi iliyokuwa majani tu italimwa hapohapo palipokuwa mapori matupu machoni pao wote waliopapita.

³⁵Ndipo, watakaposema: Nchi hii iliyokuwa mapori tu imegeuka kuwa kama bustani ya Edeni, nayo miji iliyokuwa mabomoko na mahame kwa kuvunjwa kwao sasa iko na maboma, nayo inakaa watu.

³⁶Ndipo, wamizimu watakaosalia kwao wakaao na kuwazunguka watakapojua, ya kuwa mimi Bwana nimeyajenga yaliyovunjwa, nikayapanda yaliyokuwa mapori tu. Mimi Bwana nimeyasema, nami nitayafanya.[#Ez. 17:24.]

³⁷Hivi ndivyo, Bwana Mungu anavyosema: Nalo hili nitawaitikia wao wa mlango wa Waisiraeli wakiniomba, niwafanyizie: Nitawazidisha kuwa watu wengi kama kondoo.[#Mika 2:12.]

³⁸Kama kondoo wa kutambika walivyo wengi, au kama mle Yerusalemu makundi ya watu yanavyokuwa mengi siku za sikukuu, ndivyo, miji iliyo mabomoko tu itakavyojaa makundi ya watu; ndipo, watakapojua, ya kuwa mimi ni Bwana.