Maangamizo ya Gogi.

¹Nawe mwana wa mtu, mfumbulie Gogi yatakayompata na kusema: Hivi ndivyo, Bwana Mungu anavyosema: Utaniona, nikikujia, Gogi uliye mkuu wa Rosi na wa Meseki na wa Tubali![#Ez. 38:2.]

²Nitakugeuza na kukushika kwa kamba, nikutoe huko kaskazini mbali na kukupandisha, uende, mpaka nikufikishe kwenye milima ya Isiraeli.

³Nitakupiga, upindi wako uanguke mkononi mwako mwa kushoto, nayo mishale yako nitaiangusha mkononi mwako mwa kuume.

⁴Milimani kwa Waisiraeli utaanguka wewe na vikosi vyako vyote nayo makabila, uliyo nayo; nitakutoa, uliwe nao ngusu na wote wenye mabawa na nyama wa porini.[#Ez. 39:17.]

⁵Utaanguka penye mapori, kwani mimi nimeyasema; ndivyo, asemavyo Bwana Mungu.

⁶Nayo nchi ya Magogi nitaitupia moto nao wakaao salama katika visiwa; ndipo, watakapojua, ya kuwa mimi ni Bwana.

⁷Lakini Jina langu takatifu watalijulisha kwao walio ukoo wangu wa Isiraeli, nami sitanyamaza tena, Jina langu takatifu likipatiwa uchafu; ndipo, wamizimu watakapojua, ya kuwa mimi ni Bwana aliye Mtakatifu kwao Waisiraeli.

⁸Ndivyo, asemavyo Bwana: Hayo mtayaona, yakija kutimia siku ileile, niliyoisema.

⁹Ndipo, wakaao katika miji ya Waisiraeli watakapotoka, wavitumie vile vyombo vya vita kuwa kuni za kuwasha moto, zile ngao ndogo na kubwa, nazo pindi na mishale, nazo rungu na mikuki, wataitumia kuwa kuni za moto miaka saba.[#Sh. 46:10.]

¹⁰Hawataokota kuni za moto mashambani, wala hawatazikata misituni, kwani vyombo vya vita vitakuwa kuni zao. Hivyo watateka vitu kwao walioviteka vitu vyao na kuwanyang'anya mali zao; ndivyo, asemavyo Bwana Mungu.

¹¹Siku hiyo nitampa Gogi mahali pa kaburi kwao Waisiraeli katika bonde la wapitaji lililoko upande wa maawioni kwa jua kwenye bahari, nayo makaburi hayo yatawakinga wapitaji; ndiko, watakakomzika Gogi nao watu wake waliokuwa wengi, kisha watapaita Bonde la Wingi wa Gogi.

¹²Nao wa mlango wa Isiraeli watawazika muda wa miezi saba, kusudi waondoe uchafu katika nchi hiyo.

¹³Nao watu wote wa nchi hiyo watakuwa wakizika; hivyo watajipatia jina la kuwasifu siku ile, nitakapojitukuza; ndivyo, asemavyo Bwana Mungu.

¹⁴Kisha watachagua watu wa kushika kazi hiyo siku zote, watembee katika nchi, wawazike wapitaji wale waliosazwa juu ya nchi, wauondoe uchafu huo. Ile miezi saba itakapopita, ndipo, watakapochunguza,

¹⁵watembezi wakitembea katika hiyo nchi; napo hapo, watakapoona mifupa ya mtu, watapajenga kando yake kichuguu, mpaka wazishi wamzike katika Bonde la Wingi wa Gogi.

¹⁶Hata mji utakaokuwako utaitwa Hamona (Wingi wa Watu). Hivyo ndivyo, watakavyoundoa huo uchafu wa hiyo nchi.

¹⁷Hivi ndivyo, Bwana Mungu anavyosema: Nawe mwana wa mtu, waambie ndege wote wenye mabawa nao nyama wote wa porini: Kusanyikeni! Njoni mkitoka pande zote, mkutane penye ng'ombe zangu za tambiko, nitakazowachinjia kuwa karamu kubwa ya nyama za tambiko milimani kwa Waisiraeli, mle nyama na kunywa damu![#Ufu. 19:17-18.]

¹⁸Mtakula nyama za wapiga vita wenye nguvu, mtakunywa damu za wakuu wa nchi, ndio madume ya kondoo na wana kondoo na mbuzi na ng'ombe, wote ni manono ya Basani.

¹⁹Mtakula mafuta, mshibe, mtakunywa damu, mlewe kwa hizo ng'ombe zangu za tambiko, nitakazowachinjia.

²⁰Mtashiba mezani pangu kwa nyama za farasi nazo zao waliowapanda, kwa nyama za wapiga vita wenye nguvu nazo zao wote waliojiendea tu kupigana; ndivyo, asemavyo Bwana Mungu.

²¹Ndivyo, nitakavyoutokeza utukufu wangu kwa wamizimu, nao wamizimu wote watayaona mapatilizo yangu, nitakayowapatia, nao mkono wangu, nilioutoa kuwakamata.

²²Ndipo, walio mlango wa Isiraeli watakapojua, ya kuwa mimi ni Bwana Mungu wao, tangu siku ile hata siku zitakazokuja.

²³Nao wamizimu watajua, ya kuwa walio mlango wa Isiraeli walihamishwa kwa ajili ya manza, walizokora walipoyavunja maagano yangu; kwa hiyo naliuficha uso wangu, wasiuone, nikawatia mikononi mwao waliowasonga, wao wote wauawe kwa panga.[#Yes. 54:8.]

²⁴Hivyo, walivyojipatia uchafu kwa mapotovu yao, ndivyo, nilivyowafanyizia nilipouficha uso wangu, wasiuone.

Kurudi kwao Waisiraeli.

²⁵Kweli hivi ndivyo, Bwana Mungu anavyosema: Sasa nitayafungua mafungo yake Yakobo, niwahurumie wote walio mlango wa Isiraeli kwa kutenda wivu kwa ajili ya Jina langu takatifu.[#Ez. 16:53-63.]

²⁶Nao watashikwa na soni iwapasayo kwa hivyo, walivyoyavunja maagano yangu yote, watakapokaa salama katika nchi yao, kwani hatakuwako atakayewastusha.

²⁷Nitakapowarudisha kwao na kuwatoa kwenye makabila mengine na kuwakusanya, wazitoke nchi za adui zao, ndipo, nitakapojitokeza kwao kuwa Mtakatifu machoni pa wamizimu wengi;

²⁸nao watajua, ya kuwa mimi Bwana Mungu wao kweli naliwahamisha kwenda kwa wamizimu, lakini nitawakusanya tena, warudi katika nchi yao, sitasaza hata mmoja wao huko.

²⁹Wala sitauficha uso wangu tena, wasiuone, kwani nitawamwagia walio mlango wa Isiraeli Roho yangu; ndivyo, asemavyo Bwana Mungu.[#Ez. 36:26-27; Yes. 44:3.]