Mapatilizo ya mji wa Yerusalemu.

¹Nawe mwana wa mtu, jipatie upanga mkali, uutumie kuwa wembe wa kinyozi wa kunyolea kichwa chako na udevu wako! Kisha jipatie mizani, uzigawanye hizo nywele!

²Fungu la tatu uliteketeze kwa moto mjini katikati, siku za kusongwa zitakapomalizika! Fungu la tatu jingine lichukue, ulitapanye na kupigapiga kwa upanga ukizunguka mjini po pote! Nalo fungu la tatu jingine utalitupatupa kwenye upepo, nami nitauchomoa upanga, uzifuata nyuma.

³Nawe hizo nywele zichukue chache tu, uzifungue pembeni katika vazi lako!

⁴Namo uchukue tena kidogo, uzitupe penye ule moto unaowaka mjini katikati, uziteketeze mle motoni! Ndimo, utakamotoka moto wa kuula mlango wote wa Isiraeli.

⁵Hivi ndivyo, Bwana Mungu anavyosema: Huu ndio Yerusalemu! Nimeuweka kwenye wamizimu katikati, ukazungukwa na nchi zao.

⁶Lakini kwa kuwa haukunicha, uliyakataa mashauri yangu kuliko hao wamizimu, ukayakataa nayo maongozi yangu kuliko hizo nchi ziuzungukazo, kwani mashauri yangu wakayabeua, hawakuyafuata maongozi yangu.

⁷Kwa sababu hii Bwana Mungu anasema hivi: Kwa kuwa mnafanya matata kuliko wamizimu wanaowazunguka, msipoyafuata maongozi yangu, wala msipoyafanya mashauri yangu, wala msipoyafanya maamuzi yangu, wamizimu wawazungukao wanayoyafanya,

⁸kwa hiyo Bwana Mungu anasema hivi: Utaniona, mimi nami nikikujia, nifanye katikati yako mashauri machoni pa wamizimu.

⁹Nitakufanyizia mambo, nisiyoyafanya bado, wala sitayafanya mara nyingine yaliyo hivyo kwa ajili ya machukizo yako yote.

¹⁰Nayo ni haya: katikati yako baba watakula wana, nao wana watakula baba zao! Haya ndiyo mashauri, nitakayokufanyizia, kisha masao yako nitayatupiatupia pande zote za upepo.[#5 Mose 28:53-55; Omb. 4:10.]

¹¹Kweli ndivyo, asemavyo Bwana Mungu: Hivyo nilivyo Mwenye uzima, kwa kuwa umepachafua Patakatifu pangu kwa matapisho yako yote na kwa machukizo yako yote, kwa hiyo mimi nami nitaliondoa jicho langu, lisikuonee uchungu, nami mwenyewe sitakuhurumia.[#Ez. 8:6-18.]

¹²Fungu lako la tatu watakufa kwa magonjwa mabaya wakizimia kwa njaa katikati yako, fungu la tatu jingine watauawa kwa panga kwenye pande zako zote; fungu la tatu jingine nitawatupiatupia pande zote za upepo, kisha nitauchomoa upanga, uwafuate.[#Ez. 5:2.]

¹³Hivyo makali yangu yatakwisha, hivyo nitayapoza machafuko yangu yenye moto kwao nikiwalipisha. Ndipo, watakapotambua, ya kuwa mimi Bwana nimesema kwa wivu wangu, nikawatimilizia machafuko yangu yenye moto.[#Ez. 16:42.]

¹⁴Kisha nitakugeuza kuwa mabomoko ya kuzomelewa kwa wamizimu wote wakuzungukao, kila atakayepapita ayaone.

¹⁵Hivyo itakuwa, uwe wa kuzomelewa na wa kufyozwa, tena uwe kitisho cha kuwashangaza wamizimu wakuzungukao, nitakapokufanyizia mashauri na kukutolea makali na machafuko yenye moto na mapigo yenye moto. Mimi Bwana nimeyasema.[#Yer. 24:9.]

¹⁶Ndipo, nitakapowapigia mishale mibaya ya njaa ya kuangamiza; hiyo ndiyo, nitakayoipiga kweli, iwaangamize ninyi, nitakapoizidisha njaa na kulivunja kabis shikizo lenu la chakula.[#Ez. 4:16; 5 Mose 32:23.]

¹⁷Pamoja na hiyo njaa nitawapelekea nyama wabaya, wawaue watoto wako, nayo magonjwa mabaya ya kuozesha damu yatapita kwako, kisha nitaleta nazo panga na kukuua. Mimi Bwana nimeyasema.[#Ez. 14:21.]