Wakristo wasitahiriwe!

¹*Kristo ametukomboa, tuwe waungwana. Kwa hiyo simameni, msijitie tena katika mafungo ya utumwa![#Gal. 4:5,8-11,31; Mar. 7:3-4; Tume. 15:10.]

²Tazameni, mimi Paulo nawaambiani: Kristo hatawafaa kitu, mkitahiriwa.

³Tena namshuhudia kila mtu aliyetahiriwa, ya kuwa ni mdeni wa kuyafanya Maonyo yote.

⁴Ninyi mtakao kupata wongofu kwa kuyafanya Maonyo mmetengwa na Kristo, mmeanguka na kuyaacha magawio.

⁵Kwani sisi kwa nguvu ya Roho twakishika kingojeo cha kwamba: Tutapata wongofu kwa kumtegemea Mungu.

⁶Maana tukiwa naye Kristo Yesu, kunakotupa nguvu siko kutahiriwa, wala kutotahiriwa, ila kumtegemea Mungu kutimilikako katika kupendana.[#Gal. 6:15; Rom. 2:26; 1 Kor. 7:19.]

⁷Mlianza kushika njia nzuri; yuko nani aliyewakwaza, msiyatii yaliyo ya kweli?

⁸Kazi hii ya kuwavutavuta hivyo haikutoka kwake yeye aliyewaita.[#Gal. 1:6.]

⁹Chachu kidogo hulichachusha donge lote.[#1 Kor. 5:6.]

¹⁰Hivyo, mlivyo naye Bwana, mimi huwawazia kuwa welekevu kwamba: Hamtaigeuza mioyo. Lakini aliyewahangaisha hivyo ataiona hukumu yake, awaye yote.[#Gal. 1:7; 2 Kor. 11:15.]

¹¹Lakini mimi, ndugu, kama ningetangaza hata sasa, watu watahiriwe, ningekuwa mwenye kufukuzwa? Nayo makwazo ya msalaba yangekuwa yameondolewa.[#Gal. 6:12; 1 Kor. 1:23.]

¹²Ingefaa, wale wenye kuwatukusa wakatwe na kutengwa.[#Sh. 12:4.]

Matendo ya mwili nayo matendo ya Roho.

¹³Ndugu, ninyi mliitiwa kuwa waungwana. Lakini uungwana huo msiugeuze kuwa tokeo la tamaa za miili yenu, ila mtumikiane na kupendana!

¹⁴Kwani Maonyo yote hutimilika katika neno moja, ndilo hili:

Umpende mwenzio,

kama unavyojipenda mwenyewe!

¹⁵Lakini mkiumana, mkilana ninyi kwa ninyi, angalieni, msimezwe kabisa kwa kule kulana.*

¹⁶*Lakini nasema, mwendelee Kiroho! Hivyo hamtaweza kuzitimiza tamaa za miili.[#Gal. 5:25.]

¹⁷Kwani miili huyatamani yanayokataliwa na Roho, naye Roho huyatamani yanayokataliwa na miili; hawa wawili hupingana, msipate kuyafanya, myatakayo.[#Rom. 7:15,23.]

¹⁸Lakini mkiongozwa na Roho ham tena watumwa wa Maonyo.

¹⁹Nayo matendo ya miili yako waziwazi, ndiyo ugoni, uchafu, uasherati,[#1 Kor. 6:9-10.]

²⁰kutambikia vinyago, uchawi, uchukivu, ugomvi, wivu, mifundo ya mioyo, machokozi, matengano, vyama,

²¹kijicho, ulevi, ulafi, nayo mambo mengine yaliyofanana nayo. Kama nilivyowaambia kale, vivyo hivyo nawaambia tena: Wafanyizao mambo kama hayo hawataurithi ufalme wa Mungu.[#Ef. 5:5; Ufu. 22:15.]

²²Lakini mazao ya Roho ndiyo haya: upendano, furaha, utengemano, uvumilivu, utu, wema, welekevu,[#Ef. 5:9.]

²³utulivu, kuzishinda tamaa. Mambo kama hayo hayakataliwi na Maonyo.[#1 Tim. 1:9.]

²⁴Lakini wa Kristo Yesu huiua miili na kuiwamba msalabani pamoja na mawazo mabaya na tamaa.*[#Rom. 6:6; 8:9; Kol. 3:5.]

Kusaidiana na kupokeana.

²⁵*Tukiwa wa Kiroho na tuendelee Kiroho![#Gal. 5:16; Rom. 8:4.]

²⁶Tusitafute utukufu ulio wa bure, tukichokozana, tena tukioneana kijicho![#Fil. 2:3.]