1 Mose 49

Yakobo anawabariki wanawe wote.

¹Kisha Yakobo akawaita wanawe, akawaambia: Kusanyikeni, niwaeleze, yatakayowapata siku za sasa zitakapokwisha!

²Kusanyikeni, wana wa Yakobo, msikilize!

Msikilizeni baba yenu Isiraeli!

³Wewe Rubeni, u mwana wa kwanza,

u nguvu yangu na uwezo wangu wa kwanza,

ukuu wako hutukuzwa, ukuu wako ni wa nguvu.

⁴Lakini kwa kububujika kama maji hutapata ukuu wa kweli,

kwani ulipokipanda kitanda cha baba yako,

ndipo, ulipoyachafua malalo yangu kwa kuyapandia.

⁵Simeoni na Lawi ni ndugu kweli,

panga zao ni vyombo vya ukorofi.

⁶Roho yangu isiingie penye njama yao,

wala moyo wangu usifanye bia na mikutano yao!

Kwani kwa makali yao waliua watu,

kwa majivuno yao wakakata madume ya ng'ombe mishipa.

⁷Na yaapizwe makali yao kwa kuwa yenye nguvu!

Na yaapizwe machafuko yao kwa kuwa yenye upingani!

Na niwagawanye kwao Wayakobo,

na niwatawanye kwao Waisiraeli!

⁸Wewe Yuda, ndugu zako watakusifu;

mkono wako utawakamata wachukivu wako penye kosi,

nao wana wa baba yako watakuangukia.

⁹Yuda ni mwana simba.

Mwanangu, ulipokwisha kukamata, hupanda kupumzika

na kulala kama simba au kama mamake simba;

yuko nani atakayekuamsha?

¹⁰Bakora ya kifalme haitaondoka kwake Yuda,

wala fimbo la mwenye amri halitaondoka miguuni pake,

mpaka atakapokuja mwenye kutuliza,

ambaye makabila ya watu watamtii.

¹¹Kipunda chake hukifunga mizabibuni,

naye mwana punda humlisha miche ya mizabibu mizuri,

huyafua mavazi yake katika mvinyo,

nazo nguo zake katika damu za zabibu.

¹²Macho yake huwa mekundu kwa kunywa mvinyo,

nayo meno yake huwa meupe kwa kunywa maziwa.

¹³Zebuluni atakaa pwani, Bahari Kubwa iliko,

huko pwani, merikebu zinakofikia, apakane nao Wasidoni.

¹⁴Isakari ni punda mwenye mifupa migumu,

hupenda kulala, katikati ya mazizi ya kondoo.

¹⁵Atakapoona matuo kuwa mema,

atakapoiona nayo nchi hii kuwa ya kumpendeza,

ndipo, atakapouinamisha mgongo wake kuchukua mizigo,

awe mtumishi wa kufanya kazi za nguvu.

¹⁶Dani atawaamua walio watu wake

akiwa kama wenzake walio mashina ya Isiraeli.

¹⁷Dani atakuwa nyoka njiani, atakuwa piri penye mikondo,

awaume farasi visigino, waliowapanda waanguke nyuma.

¹⁸Ninaungojea wokovu wako, Bwana![#Sh. 119:166; Hab. 2:3.]

¹⁹Gadi atashambuliwa na vikosi vya vita,

lakini naye atawashambulia na kuwanyatia.

²⁰Kwake Aseri ndiko, vyakula vya manono vitakakotoka,

naye ndiye atakayewapatia wafalme vyakula vya urembo.

²¹Nafutali ni kulungu aliyefunguliwa kukimbia,

huimba nyimbo zilizo nzuri zaidi.

²²Yosefu ni tawi la mti wa matunda,

tawi la mti wa matunda ulioko kwenye mboji,

kwa hiyo matawi yake hutambaa na kuufunika ukuta.

²³Ijapo wapiga mishale wamchokoze kwa kumgombeza

²⁴na kumchukia, upindi wake hushupaa vivyo hivyo,

nazo nguvu za mikono yake ziko tayari vivyo hivyo, yumo

mikoni mwake amtawalaye Yakobo,

hushikwa na mchungaji aliye mwamba wa Isiraeli.

²⁵Mungu wa baba yako ndiye atakayekusaidia

Mwenyezi Mungu ndiye atakayekubariki

kwa mbaraka zitokazo mbinguni juu

na kwa mbaraka zitokazo vilindini ndani ya nchi

na kwa mbaraka zitokazo maziwani na tumboni.

²⁶Mbaraka za baba yako zina nguvu

kuzishinda mbaraka zao walionizaa,

zitakupendeza kuliko matunu ya vilima vya kale na kale.

Hizo ndizo zitakazokijia kichwa chake Yosefu,

nao utosi wake yeye aliyewekwa kwa

kutengwa na ndugu zake.

²⁷Benyamini ni mbwa wa mwitu mwenye uchu wa damu,

asubuhi hula mawindo, jioni hugawanya mateka.

²⁸Haya ndiyo mashina yote kumi na mawili ya Isiraeli, nayo haya ndiyo yote, baba yao aliyowaambia alipowabariki, naye aliwabariki na kumpa kila mmoja mbaraka yake yeye.

Agizo lake Yakobo la mwisho na kufa kwake.

²⁹Kisha akawaagiza na kuwaambia: Mimi sasa nitakapochukuliwa kwenda kwao walio ukoo wangu, sharti mnizike kwa baba zangu katika lile pango, lililoko shambani kwake Mhiti Efuroni![#1 Mose 23:16-20; 47:30.]

³⁰Ndilo pango lile lililoko shambani kwa Makipela kuelekea Mamure; shamba hilo Aburahamu alilinunua kwa Mhiti Efuroni kuwa mahali pake yeye pa kuzikia.

³¹Mle pangoni ndimo, walimomzika Aburahamu na mkewe Sara, naye Isaka na mkewe Rebeka waliwazika humo, naye Lea nilimzika humo.[#1 Mose 25:9; 35:29.]

³²Ndilo lile shamba lililonunuliwa kwa wana wa Hiti pamoja na lile pango lililoko.

³³Yakobo alipokwisha kuwaagiza wanawe maneno haya akaikunja miguu yake kitandani, akazimia, akachukuliwa kwenda kwao walio wa ukoo wake.