Kristo ni mkubwa kuliko Mose.

¹Kwa hiyo, ndugu zangu watakatifu, mlioitwa kama sisi na mwito utokao mbinguni, yaelekezeni macho kwake Yesu, tunayemwungama kuwa mtume na mtambikaji mkuu![#Ebr. 4:14.]

²Naye aliyempa kazi hiyo alimtumikia kwa welekevu, kama Mose alivyotumika katika nyumba yake yote.[#4 Mose 12:7.]

³Lakini huyu amepaswa kutukuzwa kuliko Mose; ni vivyo hivyo kama vya nyumba; mwenye kuijenga hupata cheo kuliko ile nyumba yenyewe,

⁴kwani kila nyumba hujengwa na mtu. Lakini anayevitengeneza vyote ndiye Mungu.

⁵Naye Mose alitumika kwa welekevu katika nyumba yake yote kama mtumishi; hivyo aliyashuhudia yale yatakayosemwa.

⁶Lakini Kristo alitumika kama mwana aliye mwenye nyumba yake. Nayo nyumba yake ni sisi, tunapoikaza mioyo yetu, ichangamke, tena tunapofuliza kujivunia kingojeo chetu mpaka mwisho.[#Ef. 2:19; 1 Petr. 2:5.]

Msiishupaze mioyo yenu vibaya!

⁷Kwa hiyo fanyeni, kama Roho Mtakatifu anavyosema:

Leo, mtakapoisikia sauti yake,

⁸msiishupaze mioyo yenu,

kama hapo, mioyo ilipokuwa yenye uchungu,

siku ile ya kujaribiwa kule nyikani.

⁹Ndipo, baba zenu waliponijaribu na kunipima,

tena walikuwa wameyaona matendo yangu miaka arobaini.

¹⁰Nikachafuliwa moyo nao wa kizazi hicho, nikasema:

Siku zote hupotea njia mioyoni mwao;

lakini hawakuzitambua njia zangu.

¹¹Kwa hiyo nilijiapia kwa makali yangu kwamba:

Hawataingia kamwe kwenye kituo changu!

¹²Tazameni, ndugu, pasiwe mmoja wenu mwenye moyo mbaya usiomtegemea Mungu, ukijitenga kwake yeye aliye Mwenye uzima!

¹³Ila mwonyane wenyewe siku kwa siku, pangali pakiitwa leo, kusudi kwenu kusipatikane mwenye moyo mgumu uliodanganywa na ukosaji![#1 Tes. 5:11.]

¹⁴Kwani tumekwisha kuwa wenziwe Kristo, tunapokishika kingojeo chetu cha kwanza, kisitupotelee mpaka mwisho.[#Ebr. 6:11.]

¹⁵Paliposemwa:

Leo, mtakapoisikia sauti yake, msiishupaze mioyo yenu

kama hapo, mioyo ilipokuwa yenye uchungu!

¹⁶Hapo walioyasikia na kupata mioyo yenye uchungu walikuwa akina nani? Sio hao wote waliotoka Misri wakiongozwa na Mose?

¹⁷Tena ni akina nani waliochafua moyo wake miaka 40? Sio hao waliokosa, wao waliokufa nyikani, miili yao ikiachwa hapohapo?[#1 Kor. 10:10.]

¹⁸Tena ni akina nani, aliowaapia kwamba:

Hawataingia kamwe kwenye kituo chake,

wasipokuwa wale waliokataa kutii?

¹⁹Nasi twaona, ya kuwa hawakuweza kuingia, kwa sababu hawakumtegemea.