Utambikaji wa Kristo.

¹Kwani kila mtambikaji mkuu anayechaguliwa katika watu huwekwa kwa ajili ya watu, awafanyizie kazi kwake Mungu akimtolea matoleo na vipaji vya tambiko kwa ajili ya makosa yao.

²Huyu anaweza kuwavumilia kidogo wasiojua maana, wakipotezwa, kwa sababu hata yeye ni mwenye unyonge.[#Ebr. 4:15.]

³Kwa ajili yake huo hana budi kujipatia mwenyewe kole ya makosa yake yeye vivyo hivyo, kama anavyowapatia watu.[#3 Mose 9:7; 16.]

⁴Wala hakuna ajipaye mwenyewe cheo hiki, ila huitwa na Mungu, kama naye Haroni alivyoitwa.[#2 Mose 28:1.]

⁵Vivyo naye Kristo hakujipa utukufu mwenyewe kuwa mtambikaji mkuu, ila ni yeye aliyemwambia:

Wewe ndiwe Mwanangu, siku hii ya leo mimi nimekuzaa.

⁶Ndivyo anavyosema hata pengine:

Wewe u mtambikaji wa kale na kale,

kama Melkisedeki alivyokuwa.

⁷Naye siku zile allikuwapo mwenye mwili wa kimtu, akamwomba na kumbembeleza yule aliyeweza kumwokoa katika kufa. Alipokaza kumlalamikia na kutoa machozi akasikiwa naye, kwa sababu alimcha Mungu.[#Mat. 26:39-46; Luk. 22:41-44.]

⁸Naye angawa Mwana, lakini katika kuteswa ndimo, alimojifunzia kutii.[#Fil. 2:8.]

⁹Tena hapo, mambo yake yalipotimilika, akawapatia wote wamtiio wokovu wa kale na kale.[#Yoh. 17:1,5.]

¹⁰Kwa hiyo alipewa na Mungu jina la mtambikaji mkuu, kama Melkisedeki alivyokuwa.[#Ebr. 7.]

Maziwa na chakula.

¹¹Hapo tunayo maneno mengi ya kusema, lakini ni magumu ya kuyaeleza vema, nanyi mmekuwa wavivu wa kusikia.

¹²Kwani tukizipima siku, mlizofundishwa, msingekuwa na budi kuwa wafunzi; lakini mwapaswa, mtu aanze tena kuwafundisha, maneno ya Mungu yalivyoanza; maana yawafaliayo ni maziwa, vyakula vigumu sivyo.[#1 Kor. 3:1-3.]

¹³Kwani kila anayenyonyeshwa maziwa ni mtu asiyejua bado yaongokayo, kwani ni mtoto mchanga.[#Ef. 4:14.]

¹⁴Lakini walio watu wazima hilishwa vyakula vigumu; kwani hao wameizoeza mioyo yao kujua maana, kwa hiyo hupambanua yaliyo mazuri nayo yaliyo maovu.[#Rom. 16:19; Fil. 1:10.]