Makosa ya ulimi.

¹Ndugu zangu, haifai, wengi wakiwa wafunzi. Jueni: hukumu, tutakayoipata sisi, itakuwa kuliko ya wengine!

²Kwani sisi sote hukosa mengi. Mtu asipokosa kwa kusema, huyo ni mume mtimilifu anayeweza kuuongoza hata mwili wote.

³Tazameni, farasi twawatia hatamu vinywani, watutii sisi; nasi hivyo huwaongoza miili yao yote kwenda huko, tunakopenda.

⁴Tazameni, hata merikebu zilivyo kubwa sana, tena zinavyochukuliwa na pepo zenye nguvu! Nazo huongozwa na sukani iliyo ndogo sana, mwenye kuishika anakotaka.

⁵Vivyo hivyo nao ulimi ni kiungo kidogo, nao hujivunia makuu! Tazameni, moto ulio mdogo huchoma pori kubwa!

⁶Nao ulimi ni moto, ni ulimwengu wenye upotovu. Katika viungo vyetu ndio ulimi unaouchafua mwili wote, unavichoma vyote vilivyoumbwa, wenyewe ukiwashwa na moto ulioko kuzimuni.[#Fano. 16:26-27; Mat. 12:36-37; 15:11,18-19.]

⁷Kwani nyama wo wote, kama nyama wa porini na ndege na nyoka na nyama wa baharini, wote hufugika, nao wamekwisha fugwa na nguvu za watu.

⁸Lakini huo ulimi hakuna mtu hata mmoja anayeweza kuufuga; ni uovu usiotulia, umejaa sumu yenye kuua.[#Sh. 140:4.]

⁹Ndio, unaotutukuzisha Bwana aliye Baba, tena ndio, unaotuapizisha watu walioumbwa kwa mfano wa Mungu.[#1 Mose 1:27.]

¹⁰Matukuzo na maapizo hutoka katika kinywa kilekile kimoja. Ndugu zangu, mambo haya hayapasi kuwa hivyo.

¹¹Je? Iko chemchemi inayotoa maji matamu na machungu katika kisima kilekile kimoja?

¹²Ndugu zangu, uko mkuyu unaoweza kuzaa chikichi, au mzabibu unaoweza kuzaa kuyu? Napo penye chumvi hapatoki maji matamu.

Ujuzi utokao juu.

¹³Kwenu yuko nani aliye mwerevu wa kweli wa kujua mambo? Ajionyeshe kuwa mwenye mwenendo mzuri, nazo kazi zake zijulike kuwa zenye upole utokao katika huo werevu wa kweli![#Yak. 2:18.]

¹⁴Lakini mkiwa wenye wivu ulio na uchungu na wenye uchokozi mioyoni mwenu msijivune, wala yaliyo ya kweli msiyageuze kuwa uwongo![#Ef. 4:31.]

¹⁵Kwani werevu huu haukutoka mbinguni juu, ila nchini, ni wa kimtu na wa Kisatani.

¹⁶Kwani wivu na uchokozi ulipo, ndipo palipo penye matata na mambo maovu yo yote.[#Yak. 1:5,17; Rom. 16:19.]

¹⁷Lakini werevu wa kweli utokao mbinguni juu kwanza ni wenye ung'avu, kisha ni wenye utengemano na upole na unyenyekevu, huwahurumia wote na kuwapatia mazao mema; haupendelei, maana hukataa ujanja.

¹⁸Nalo tunda la kuzaa wongofu hupandwa nao wenye utengemano panapotengemana.[#Yes. 32:17; Mat. 5:9.]