Mwanzo wa mashindano.

¹Magomvi yenu ya kupigana ninyi kwa ninyi yanatoka wapi? Sipo hapo, mzichezeapo tamaa zenu zinazoshindana katika viungo vyenu?[#1 Petr. 2:11.]

²Mwakifuata kijicho, lakini hampati; mwauana kwa wivu, lakini hamwezi kuyafikia, myatakayo; mwapigana na kugombana, lakini hamna kitu, kwa sababu hamwombi.

³Mngawa mwaomba, lakini hampewi, kwa sababu mwaomba vibaya, maana mwataka tu ya kutumia katika machezo yenu.

⁴Enyi wazinzi waume na wanawake, hamjui: kuupenda ulimwengu huu ni kuchukiwa naye Mungu? Anayetaka kuwa mpenzi wa ulimwengu huu, hugeuka kuwa mchukivu wa Mungu.[#Luk. 6:26; Rom. 8:7; 1 Yoh. 2:15.]

⁵Au mwawaza, ya kuwa Maandiko yanasema bure: Roho aliyekaa ndani yetu anataka sana kushindana na wivu?[#2 Mose 20:3,5; 34:14; Mat. 6:24; Rom. 8:14.]

⁶Nayo mema, atugawiayo, ni makubwa kuushinda. Kwa hiyo maandiko yasema:

Wenye kujikweza Mungu huwapingia,

lakini wanyenyekevu huwapatia huruma.

⁷Kwa hiyo mtiini Mungu! Satani mbisheni! Ndivyo, atakavyowakimbia.[#Ef. 6:12; 1 Petr. 5:8-9.]

⁸Mkaribieni Mungu! Ndivyo, atakavyowakaribia nanyi. Enyi wakosaji, ing'azeni mikono! Enyi wenye mioyo miwili, itakaseni mioyo![#Yes. 1:16; Zak. 1:3.]

⁹Jisumbueni na kusikitika na kuomboleza! Macheko yenu yageuke kuwa vilio, nazo furaha zenu zigeuke kuwa masikitiko![#Rom. 7:24.]

¹⁰Mjinyenyekeze mbele ya Bwana! Ndivyo, atakavyowakuza ninyi.[#1 Petr. 5:6.]

¹¹Msitetane, ndugu! Anayemteta ndugu au anayemwumbua ndugu yake huyateta Maonyo na kuyaumbua Maonyo. Lakini ukiyaumbua hu mfanyaji wa Maonyo, ila muumbuzi.

¹²Mwenye kuyatoa Maonyo na mwenye kuhukumu ni mmoja, maana ni yeye anayeweza kuokoa na kuangamiza. Lakini wewe u nani ukimwumbua mwenzio?[#Mat. 7:1; Rom. 2:1; 14:4.]

Tunakuwapo kama mvuke.

¹³*Sasa tusemeane nanyi mnaosema: Leo au kesho tutakwenda mjini fulani, tukae huko mwaka mzima, tuchuuze na kuchuma![#Fano. 27:1.]

¹⁴Nanyi hamjui, itakayokuwa kesho. Kuishi kwenu ni kwa namna gani? Maana ninyi m kama mvuke unaoonekana kitambo kidogo, kisha hutoweka.[#Luk. 12:20.]

¹⁵Mngesema: Bwana akitaka, tutaishi, tufanye hivi na hivi.

¹⁶Lakini sasa mwajivunia kwa kujitutumua; majivuno yote yaliyo hivyo ni mabaya.[#Tume. 18:21.]

¹⁷Ajuaye kufanya mazuri, asiyafanye, amekwisha kukosa.*[#Luk. 12:47.]