Uamuzi wa Yefuta.

¹Kulikuwa na fundi wa vita mwenye nguvu, ndiye Yefuta wa Gileadi; naye alikuwa mwana wa mwanamke mgoni, naye Gileadi ndiye aliyemzaa Yefuta.

²Naye mkewe Gileadi alikuwa amemzalia wana; hao wana wa huyu mwanamke walipokua wakamfukuza Yefuta wakimwambia: Haifai, ukipata urithi nyumbani mwa baba yetu, kwani wewe u mwana wa mwanamke mwingine.[#1 Mose 21:10.]

³Ndipo, Yefuta alipowakimbia ndugu zake, akakaa katika nchi ya Tobu, wakakusanyika kwake watu wasiokuwa na kitu cho chote, nao hutoka naye kwenda huko na huko.[#Amu. 9:4; 1 Sam. 22:2.]

⁴Siku zilipopita, wana wa Amoni wakaja kupigana na Waisiraeli.

⁵Ikawa, wana wa Amoni walipokuja kupigana na Waisiraeli, ndipo, wazee wa Gileadi walipokwenda kumchukua Yefuta katika nchi ya Tobu,

⁶wakamwambia Yefuta: Njoo, uwe kiongozi wetu, tupate kupigana na wana wa Amoni!

⁷Lakini Yefuta akawaambia wazee wa Gileadi: Je? Ninyi ham wachukivu wangu? Hamkunifukuza nyumbani mwa baba yangu? Mbona sasa mnaposongwa mwanijia mimi?

⁸Ndipo, wazee wa Gileadi walipomwambia Yefuta: Kweli ni kwa sababu hii, tukirudi kwako; sasa nenda pamoja na sisi, tupate kupigana na wana wa Amoni, nawe uwe kichwa chetu sisi sote tukaao Gileadi![#Amu. 10:18.]

⁹Naye Yefuta akawauliza wazee wa Gileadi: Mkinirudisha kwenu, nipigane nao wana wa Amoni, naye Bwana akiwatoa, waangamie mbele yangu, mimi nitakuwa kweli kichwa chenu?

¹⁰Wazee wa Gileadi wakamwambia Yefuta: Bwana ndiye anayeyasikia, tunayoyasemeana; na atuhukumu, tusipoyafanya uliyoyasema.

¹¹Ndipo, Yefuta alipokwenda pamoja na wazee wa Gileadi, nao watu wakamweka kuwa kichwa chao na kiongozi wao. Naye Yefuta akasema maneno yake yote kule Misipa masikioni pa Bwana.[#Amu. 20:1.]

¹²Kisha Yefuta akatuma wajumbe kwa mfalme wa wana wa Amoni kwamba: Tuko na mapitano gani mimi na wewe, ukinijia kupiga vita katika nchi yangu?

¹³Mfalme wa wana wa Amoni akawajibu wajumbe wa Yefuta: Kwa kuwa Waisiraeli wameichukua nchi yangu kutoka Arnoni mpaka Yaboko na Yordani, walipotoka Misri kuja huku; sasa hizi nchi zirudishe pasipo kupiga vita!

¹⁴Ndipo, Yefuta alipotuma mara ya pili wajumbe kwa mfalme wa wana wa Amoni,

¹⁵akamwambia: Hivi ndivyo, Yefuta anavyosema: Waisiraeli hawakuchukua nchi ya Wamidiani wala nchi ya wana wa Amoni.[#5 Mose 2:9,19.]

¹⁶Kwani walipotoka Misri kuja huku, Waisiraeli walishika njia ya nyikani mpaka kufika kwenye Bahari Nyekundu, wakaingia Kadesi.

¹⁷Ndipo, Waisiraeli walipotuma wajumbe kwa mfalme wa Edomu kwamba: Na tupite katika nchi yako! Lakini mfalme wa Edomu hakuwasikia; naye mfalme wa Moabu akakataa, walipotuma kwake. Kwa hiyo Waisiraeli wakakaa kwanza Kadesi,[#4 Mose 20:14-21.]

¹⁸kisha wakapita nyikani na kuizunguka nchi ya Edomu na nchi ya Moabu. Walipoifikia nchi ya Moabu upande wa maawioni kwa jua wakapiga makambi ng'ambo ya Arnoni pasipo kuingia mipakani kwa Moabu, kwani Arnoni ndio mpaka wa Moabu.[#4 Mose 21:13.]

¹⁹Ndipo, Waisiraeli walipotuma wajumbe kwa Sihoni, mfalme wa Waamori, aliyetawala Hesiboni, nao Waisiraeli wakamwambia: Na tupite katika nchi yako, tufike mahali petu![#4 Mose 21:21-31; 5 Mose 2:26-37.]

²⁰Lakini Sihoni hakuwategemea Waisiraeli, hakuacha, wapite mipakani kwake, ila Sihoni akawakusanya watu wake wote, wakapiga makambi kule Yasa. Lakini alipopigana na Waisiraeli,

²¹Bwana Mungu wa Isiraeli akamtia Sihoni pamoja na watu wake wote mikononi mwa Waisiraeli, wakawapiga. Ndipo, Waisiraeli walipoichukua nchi yote nzima ya Waamori waliokaa katika nchi hii, iwe yao.

²²Wakaichukua nchi yote iliyokuwa mipakani kwa Waamori, iwe yao toka Arnoni mpaka Yaboko, tena toka nyikani mpaka Yordani.

²³Bwana Mungu wa Isiraeli alipokwisha kuwafukuza Waamori mbele yao walio ukoo wake wa Waisiraeli, sasa wewe unataka kuwafukuza?

²⁴Kumbe Mungu wako Kamosi anayokupa kuwa mali zako huyachukui, yawe yako? Nayo yote, Bwana Mungu wetu anayotupa machoni petu kuwa yetu, basi, sisi huyachukua.[#4 Mose 21:29.]

²⁵Sasa je? Wewe u mwema kuliko Balaka, mwana wa Sipori, mfalme wa Moabu? Aligombana nao Waisiraeli, apige vita nao?[#4 Mose 22:2.]

²⁶Nao Waisiraeli hawakukaa Hesiboni na katika mitaa yake, hata Aroeri na katika mitaa yake na katika miji yote iliyoko pande zote mbili za Arnoni miaka 300? Mbona wakati huo hamkutaka kuipokonya?

²⁷Mimi sikukukosea wewe, lakini wewe unanifanyizia vibaya ukija kupigana na mimi. Bwana aliye mwamuzi wa kweli na atuamue leo sisi wana wa Isiraeli nanyi wana wa Amoni.

²⁸Lakini mfalme wa wana wa Amoni hakuyasikia maneno ya Yefuta, aliyotuma kumwambia.

Kiapo cha Yefuta.

²⁹Ndipo, roho ya Bwana ilipomjia Yefuta, akaenda kupita katika nchi ya Gileadi na ya Manase, kisha akaenda Misipe wa Gileadi, toka Misipe wa Gileadi akawaendea wana wa Amoni.[#Amu. 6:34.]

³⁰Ndipo, Yefuta alipomwapia Bwana kiapo kwamba: Kama utawatia wana wa Amoni mikononi mwangu,

³¹nami nikirudi salama katika vita vya wana wa Amoni, ndipo, yule atakayetoka wa kwanza milangoni mwa nyumbani mwangu, anijie njiani, atakuwa wake Bwana, nami nitamtoa kuwa ng'ombe ya tambiko ya kuteketezwa nzima.

Yefuta anawashinda Waamoni, kisha anakitimiza kiapo chake.

³²Kisha Yefuta akawaendea wana wa Amoni kupigana nao, naye Bwana akawatia mikononi mwake.

³³Akawapiga kutoka Aroeri, mpaka mtu akifika Miniti kwenye miji ishirini hata Abeli-keramimu (Mbuga ya Mizabibu), pigo hilo likawa kubwa sana. Ndivyo, wana wa Amoni walivyonyenyekezwa mbele yao wana wa Isiraeli.

³⁴Yefuta alipofika Misipa kwenye nyumba yake, mara mwanawe wa kike akatoka kumwendea njiani akipiga patu na kuchezacheza, naye alikuwa mwanawe wa pekee, kuliko yeye hakuwa na mwana mwingine, wala wa kiume, wala wa kike.

³⁵Ikawa, alipomwona akazirarua nguo zake akilia: E mwanangu! Unaninyenyekeza sana! Kumbe wewe nawe u mmoja wao wanaonisikitisha! Mimi nimekifumbua kinywa changu kusema na Bwana, siwezi kuyarudisha niliyoyasema.[#4 Mose 30:3.]

³⁶Naye akamwambia: Baba yangu, kama umekifumbua kinywa chako kusema na Bwana, nifanyizie, kama kinywa chako kilivyosema! Kwa kuwa Bwana amekupa kuwalipiza adui zako, hao wana wa Amoni.

³⁷Kisha akamwambia baba yake: Hili moja tu nilipate: Niache miezi miwili, niende kutembea milimani, niuombolezee uwanawali wangu, mimi pamoja na wenzangu.

³⁸Akamwambia: Basi, nenda kwanza! akampa ruhusa kujiendea miezi miwili. Naye akaenda na wenzake, akauombolezea uwanawali wake huko milimani.

³⁹Hiyo miezi miwili ilipokwisha, akarudi kwa baba yake, naye akamtimilizia kiapo chake, alichokiapa; naye alikuwa hajatambua mtu mume. Tangu hapo ikawa desturi kwao Waisiraeli,

⁴⁰vijana wa kike wa Waisiraeli waende mwaka kwa mwaka kumwimbia matukuzo binti Yefuta wa Gileadi siku nne.