Yefuta anawashinda Waefuraimu.

¹Waefuraimu wakaitwa kukusanyika, wakaenda upande wa kaskazini, wakamwambia Yefuta: Kwa sababu gani ulikwenda kupigana nao wana wa Amoni, usituite kwenda pamoja na wewe? Sasa tutaichoma moto nyumba yako juu yako.[#Amu. 8:1.]

²Lakini Yefuta akawaambia: Vita, tulivyovipiga mimi na watu wangu na wana wa Amoni, vilikuwa vikali mno, nami nilipowaita ninyi, hamkuniokoa mikononi mwao.

³Nilipoona, ya kuwa ninyi hamniokoi, nikajitoa mwenyewe, nikawaendea wana wa Amoni, naye Bwana akawatia mikononi mwangu Ni kwa sababu gani, mkinipandia leo hivi kupigana na mimi?[#Amu. 5:18; 9:1.]

⁴Kisha Yefuta akawakusanya watu wote wa Gileadi, apigane na Waefuraimu; nao watu wa Gileadi wakawapiga Waefuraimu, kwani walikuwa wamesema: Ninyi m watoro wa Efuraimu, maana Gileadi uko katikati ya nchi ya Efuraimu na ya Manase.

⁵Lakini Wagileadi walivitwaa vivuko vya Yordani vya kwenda Efuraimu. Vikawa hivyo: kila mara watoro wa Efuraimu waliposema: Na nivuke, watu wa Gileadi wakamwuliza: Wewe u Mwefuraimu? Naye aliposema: Hapana,

⁶wakamwambia: Tamka Shiboleti! Tena aliposema: Siboleti kwa kuwa hakuweza kutamka Shiboleti, wakamkamata, wakamwua hapo penye vivuko vya Yordani; ndivyo, walivyouawa wakati huo Waefuraimu 42000.

⁷Yefuta akawa mwamuzi wa Waisiraeli miaka 6, kisha Yefuta wa Gileadi akafa, akazikwa katika mmoja wao miji ya nchi ya Gileadi.

Waamuzi Ibusani na Eloni na Abudoni.

⁸Baada yake Ibusani wa Beti-Lehemu akawa mwamuzi wa Waisiraeli.

⁹Alikuwa mwenye wana wa kiume 30 na wa kike 30, ndio aliowaoza kwenda pengine, tena aliingiza wanawake wengine 30 toka pengine, wawe wake za wanawe. Akawa mwamuzi wa Waisiraeli miaka 7.

¹⁰Ibusani alipokufa akazikwa Beti-Lehemu.

¹¹Baada yake Eloni wa Zebuluni akawa mwamuzi wa Waisiraeli miaka 10.

¹²Eloni wa Zebuluni alipokufa akazikwa huko Ayaloni katika nchi ya Zebuluni.

¹³Baada yake Abudoni, mwana wa Hileli wa Piratoni, akawa mwamuzi wa Waisiraeli.

¹⁴Naye alikuwa mwenye wana 40 na wajukuu 30 waliopanda wana wa punda 70. Akawa mwamuzi wa Waisiraeli miaka 8.

¹⁵Abudoni, mwana wa Hileli wa Piratoni, alipokufa akazikwa huko Piratoni katika nchi ya Efuraimu mlimani kwa Waamaleki.