Waisiraeli wanatishwa.

¹Ndipo, malaika wa Bwana alipotoka Gilgali, akaja kupanda Bokimu, akasema: Naliwatoa Misri, nikawaleta katika nchi hii, niliyoapa kuwapa baba zenu, nikasema: Agano, nlilolifanya nanyi, sitalivunja kale na kale.

²Ninyi msifanye maagano na wenyeji wa nchi hii! Ila pabomoeni pao pa kutambikia! Lakini hamkuisikia sauti yangu; maana yao haya, mliyoyafanya, ndio nini?[#5 Mose 7:2-5.]

³Kwa hiyo nasema nami: Sitawafukuza mbele yenu, wapate kuwasonga mbavuni, nayo miungu yao iwanase kama tanzi.[#Yos. 23:13.]

⁴Malaika wa Bwana alipowaambia wana wote wa Isiraeli maneno haya, watu wakazipaza sauti zao, wakalia.

⁵Kwa hiyo wakaliita jina la mahali hapo Bokimu (Vilio), kisha wakamtambikia Bwana.

Jinsi Waisiraeli walivyokuwa siku za kwanza za waamuzi.

⁶Hapo Yosua alipowapa watu wa ukoo huu ruhusa kwenda kwao, wana wa Isiraeli walikwenda kila mtu kwenye fungu lake la nchi, alichukue.

⁷Watu wakamtumikia Bwana siku zote, Yosua alizokuwapo, nazo siku zote, walizokuwapo wale wazee waliokaa siku nyingi kuliko Yosua, ndio wale walioyaona matendo makuu yote, Bwana aliyowatendea Waisiraeli.[#Yos. 24:31.]

⁸Naye Yosua, mwana wa Nuni, mtumishi wa Bwana, akafa mwenye miaka 110.

⁹Wakamzika katika mipaka ya fungu lake huko Timunati-Heresi milimani kwa Efuraimu upande wa kaskazini wa mlima wa Gasi.[#Yos. 24:29-30.]

¹⁰Watu wote wa kizazi hicho walipokwisha kukusanywa kwenda kwa baba zao, wakaondokea watu wengine wa kizazi kingine wasiomjua Bwana wala matendo, aliyowatendea Waisiraeli.

¹¹Ndipo, wana wa Isiraeli walipoyafanya yaliyo mabaya machoni pake Bwana kwa kuyatumikia Mabaali.

¹²Wakamwacha Bwana Mungu wa baba zo aliyewatoa katika nchi ya Misri, wakafuata miungu mingine miongoni mwao miungu ya makabila yaliyowazunguka, wakaiangukia. Ndivyo, walivyomkasirisha Bwana.

¹³Walipomwacha Bwana wakamtumikia Baali, nayo Maastaroti.

¹⁴Kwa hiyo makali ya Bwana yakawawakia waisiraeli, akawatia mikononi mwa wanyang'anyi, wawanyang'anye mali zao, namo mikononi mwa adui zao waliowazunguka, akawauza, wasiweze tena kusimama usoni pao adui zao.

¹⁵Po pote walipotokea, mkono wa Bwana ukawapatia mabaya, kama Bwana alivyowaambia, kama Bwana alivyowaapia; kwa hiyo wakasongeka sana.[#3 Mose 26:17; 5 Mose 28:20.]

¹⁶Ndipo, Bwana alipowainulia waamuzi, wawaokoe mikononi mwao waliowanyang'anya mali zao.

¹⁷Lakini nao waamuzi hawakuwasikia, kwani walivunja maagano kama wagoni waliofuata miungu mingine na kuiangukia; ndivyo, walivyoondoka upesi katika njia, baba zao waliyoishika, ni ile ya kuyasikia maagizo ya Bwana. Hawakuyafanya hayo.

¹⁸Bwana alipowainulia waamuzi, Bwana alikuwa na yule mwamuzi, awaokoe mikononi mwa adui zao siku zote za huyu mwamuzi, kwani Bwana aliwaonea uchugu, walipompigia kite kwa ajili yao waliowatesa na kuwasukumasukuma.

¹⁹Lakini huyo mwamuzi alipokufa, wakafanya tena mabaya kuliko baba zao wakifuata miungu mingine, waitumikie na kuiangukia; hawakuacha kabisa kuyafanya hayo matendo yao na kuishika hiyo njia yao iliyokuwa ngumu sana.

²⁰Ndipo, makali ya Bwana yalipowawakia Waisiraeli, akasema: Kwa kuwa watu hawa wamelikosea Agano langu, nililowaagiza baba zao, wakikataa kuisikia sauti yangu,

²¹mimi nami sitaendelea kufukuza mbele yao watu wa hayo mataifa, Yosua aliowaacha alipokufa.

²²Ila nitawatumia kuwajaribu Waisiraeli, kama wataiangalia njia ya Bwana, waishike, kama baba zao walivyoishika, au kama wataiacha.[#Amu. 3:1-4; 5 Mose 8:2.]

²³Kwa hiyo Bwana akayaacha hayo mataifa, wakae, asiwafukuze upesi. Kwa hiyo hakuyatia mikononi mwa Yosua.