Abimeleki anajipatia ufalme kwa kuwaua ndugu zake.

¹Abimeleki, mwana wa Yerubaali, akaenda Sikemu kwa ndugu za mama yake, akawaambia wao nao wote walio wa ukoo wa mlango wa baba ya mama yake kwamba:[#Amu. 8:31.]

²Semeni masikioni mwao wote walio wenyeji wa Sikemu: Lililo jema lenu ni lipi? Watu 70 walio wote wana wa Yerubaali wawatawale, au awatawale mtu mmoja? Tena kumbukeni, ya kuwa huyu ni mwenzenu kwa mifupa na kwa nyama za mwili wake.

³Nao ndugu za mama yake walipoyasema maneno hayo yote kwa ajili yake masikioni mwao wenyeji wote wa Sikemu, mioyo yao ikageuka kumfuata Abimeleki, kwani walisema: Yeye ni ndugu yetu!

⁴Wakampa fedha 70, walizozitoa nyumbani mwa Baali la agano, naye Abimeleki akazitumia kujipatia watu wenye ukorofi wasiokuwa na kitu cho chote, wafuatane naye.[#Amu. 8:33.]

⁵Kisha akaenda Ofura nyumbani mwa baba yake, akawaua ndugu zake, wana wa Yerubaali, wote 70 juu ya jiwe moja, akasalia tu Yotamu, mwanawe mdogo Yerubaali, kwa kuwa alijificha.

⁶Kisha wenyeji wote wa Sikemu wakakusanyika nao wote waliokaa bomani, wakaenda, wakamfanya Abimeleki kuwa mfalme huko kwenye huo mvule wa ngomeni ulioko Sikemu.[#Yos. 24:26.]

Fumbo la Yotamu.

⁷Watu walipompasha Yotamu habari hizi, akaenda, akasimama juu ya mlima wa Gerizimu, akapaza sauti yake, akawaitia kwamba: Nisikilizeni, ninyi wenyeji wa Sikemu, Mungu naye awasikie!

⁸Miti ilikwenda kupaka mmoja mafuta, awe mfalme wao, ikauambia mchekele: Ututawale wewe!

⁹Lakini mchekele ukaiambia: Niache kuzaa mafuta, nayo ndiyo, wanayoniheshimia Mungu na watu? Nitawezaje kwenda kuning'inia juu ya miti?

¹⁰Ndipo, miti ilipouambia mkuyu: Haya! Wewe ututawale sisi!

¹¹Mkuyu nao ukaiambia: Niache kuzaa matunda yangu matamu yaliyo mazuri mno? Nitawezaje kwenda kuning'inia juu ya miti?

¹²Ndipo, miti ilipouambia mzabibu: Haya! Wewe ututawale sisi!

¹³Lakini mzabibu nao ukaiambia: Niache kuzaa mvinyo zangu mbichi zinazowafurahisha wote, Mungu na watu? Nitawezaje kwenda kuning'inia juu ya miti?

¹⁴Ndipo, miti yote ilipouambia mchongoma: Haya! Wewe ututawale sisi![#2 Fal. 14:9.]

¹⁵Mchongoma ukaiambia miti: Kama mnataka kweli kunipaka mafuta, niwe mfalme wenu, njoni, mkae pasipo woga kivulini pangu! Kama hamtaki, moto na utoke katika mchongoma, uile miangati ya Libanoni.

¹⁶Sasa ninyi je? Mmejitokeza kuwa wenye kweli na welekevu mlipomfanya Abimeleki kuwa mfalme? Au Yerubaali nao walio wa mlango wake mmewatendea mema na kuwafanyizia, kama mikono yake ilivyowafanyizia ninyi?

¹⁷Kwani baba yangu aliwapigia vita na kujitoa mwenyewe, apate kuwaponya mikononi mwa Wamidiani.

¹⁸Lakini ninyi mmeuinukia leo mlango wa baba yangu mkiwaua wanawe 70 juu ya jiwe moja, mkamfanya Abimeleki, mwana wa kijakazi wake, kuwa mfalme wa wenyeji wa Sikemu, kwa kuwa ni ndugu yenu.

¹⁹Bai, kama mmejitokeza kuwa wenye kweli na welekevu katika mambo haya, mliyomfanyizia leo Yerubaali nao walio wa mlango wake, na mmfurahie Abimeleki, naye na awafurahie ninyi!

²⁰Lakini kama sivyo, moto na utoke kwake Abimeleki, uwale wenyeji wa Sikemu nao wakaao bomani! Tena moto na utoke kwao wenyeji wa Sikemu nako kwao wakaao bomani, umle Abimeleki![#Amu. 9:57.]

²¹Kisha Yotamu akapiga mbio kukimbia, akafika Beri, akakaa huko na kujificha, ndugu yake Abimeleki asimwone.

Kufa kubaya kwa Abimeleki.

²²Abimeleki alipowatawala Waisiraeli miaka mitatu,

²³Mungu akatuma roho mbaya, Abimeleki na wenyeji wa Sikemu wakosane, nao wenyeji wa Sikemu wakamdanganya Abimeleki na kuyavunja maagano yao.

²⁴Yakafanyika hayo kwamba makorofi, wale wana 70 wa Yerubaali waliyotendewa, yalipizwe, nazo damu zao zimjie ndugu yao Abimeleki aliyewaua, ziwajie nao wenyeji wa Sikemu walioishupaza mikono yake, apate nguvu za kuwaua ndugu zake.[#Amu. 9:5.]

²⁵Kwa kumtakia mabaya wenyeji wa Sikemu wakaweka washambuliaji juu ya milima, wawanyang'anye mali zao wote waliopita njiani hapo, walipokuwa. Naye Abimeleki akapashwa habari hizi.

²⁶Kisha Gali, mwana wa Ebedi, akaja na ndugu zake, akapita kuingia Sikemu, nao wenyeji wa Sikemu walikuwa wanamjetea.

²⁷Walipotoka kwenda shambani kuvuna zabibu na kuzikamua, wakafanya sikukuu, wakaingia nyumbani mwa mungu wao, wakala, wakanywa, kisha wakamwapiza Abimelei.

²⁸Ndipo, Gali, mwana wa Ebedi, aliposema: Abimeleki ni nani? nasi Wasikemu tu wa nani, tumtumikie? Siye mwana wa Yerubaali? Naye Zebuli siye msimamizi wake? Watumikieni watu wa Hamori aliye baba yao Wasikemu! Kwa nini sisi tumtumikie yeye?[#1 Mose 34:2.]

²⁹Kama mtu angewatia watu hawa mkononi mwangu, ningemwondoa Abimeleki. Kisha akamwambia Abimeleki: Haya! Ongeza vikosi vyako, utoke!

³⁰Zebuli, mkuu wa mji, alipoyasikia haya maneno ya Gali, mwana wa Ebedi, makali yake yakawaka moto.

³¹Kwa ujanja wake akatuma wajumbe kwenda kwa Abimeleki kwamba: Tazama, Gali, mwana wa Ebedi, na ndugu zake wamekuja Sikemu, nao hujulikana, ya kuwa wanawahimiza watu wa mji, wakukatae.

³²Sasa ondoka usiku huu, wewe na watu wako walioko kwako, uvizie shambani!

³³Tena asubuhi, jua litakapokucha, ujidamke, uushambulie mji huu! Hapo utakapomwona, akikutokea yeye pamoja nao wote walioko kwake, utamfanyizia, mkono wako utakayoyaona.

³⁴Ndipo, Abimeleki alipoondoka usiku pamoja na watu wote waliokuwa kwake, wakauvizia Sikemu kwa vikosi vinne.

³⁵Gali, mwana wa Ebedi, alipotoka na kusimama hapo pa kuliingilia lango la mji, Abimeleki akaondoka hapo, alipokuwa anavizia pamoja na wale watu waliokuwa kwake.

³⁶Gali alipowaona hao watu akamwambia Zebuli: Tazama! Wako watu wanaotelemka toka milimani juu! Lakini Zebuli akamwambia: Vivuli vya milima unaviona kuwa kama watu.

³⁷Naye Gali akasema tena kwamba: Tazama! Ni watu wanaotelemka kutoka katikati ya nchi hii, nacho kikosi kimoja kinatoka na kushika njia ya kwenda kenye mvule, wanakotambikia.

³⁸Zebuli akamwambia: Sasa kiko wapi kinywa chako kilichosema: Abimeleki ni nani, tumtumikie? Kumbe hao watu sio, uliowabeua? Haya! Toka sasa, upigane nao!

³⁹Ndipo, Gali alipotoka akiwatangulia wenyeji wa Sikemu, akapigana na Abimeleki.

⁴⁰Lakini Abimeleki akamkimbiza, naye akamkimbia, wakaumizwa watu wengi, wakaanguka hapohapo mpaka pa kuingia langoni penye mji.

⁴¹Abimeleki akakaa Aruma, lakini Zebuli akamfukuza Gali na ndugu zake, wasikae Sikemu tena.

⁴²Kesho yake watu walipokwenda shambani, naye Abimeleki alipopata habari,

⁴³akawachukua watu wake, akawagawanya kuwa vikosi vitatu, akawavizia hapo shambani. Alipochungulia, mara akaona, watu wakitoka mjini, akawainukia, akawapiga.

⁴⁴Mara Abimeleki na kikosi kilichokuwa naye wakavuka kwenda mbele, wakasimama pa kuingia langoni penye mji, navyo vikosi viwili vikawarukia wote waliokuwako mashambani, vikawaua.

⁴⁵Abimeleki alipopigana nao wa mjini mchana kutwa, akauteka huo mji, nao watu waliokuwamo akawaua, nao mji akaubomoa kabisa, kisha akaumwagia chumvi.

⁴⁶Wote waliokaa katika mnara wa Sikemu walipoyasikia wakajificha shimoni mle nyumbani mwa mungu wao wa agano.[#Amu. 8:33; 9:4.]

⁴⁷Abimeleki alipopata habari, ya kuwa wote waliokaa katika mnara wa Sikemu wamekusanyika,

⁴⁸Abimeleki akaupanda mlima wa Salmoni yeye pamoja na watu wote waliokuwa kwake, naye Abimeleki akachukua shoka mkononi mwake, akakata matawi ya miti, akayachukua na kujitwika mabegani, akawaambia wale watu waliokuwa naye: Mtakayoyaona, ya kuwa nimeyafanya, yafanyeni nanyi upesi kama mimi!

⁴⁹Kwa hiyo nao watu wote wakakata matawi wakimfuata Abimeleki, wakayaweka juu ya lile shimo, wakayachoma moto juu yao waliomo shimoni; ndivyo, walivyokufa nao watu wote waliokaa katika mnara wa Sikemu, ni kama watu 1000 wanawaume na wanawake.

⁵⁰Kisha Abimeleki akaenda Tebesi, akapiga makambi kule Tebesi, kisha akauteka.

⁵¹Katikati ya mji palikuwa na mnara wenye nguvu; ndimo, walimokimbilia wanawaume na wanawake wote na wenyeji wote wa huo mji, wakafunga nyuma yao, wakapaa kipaani pa mnara.

⁵²Abimeleki alipofika penye mnara huo kupiga vita huko, akaukaribia mlango wa mnara, auchome moto.

⁵³Ndipo, mwanamke mmoja alipomtupia Abimeleki kichwani pake jiwe la sago, likakivunja kichwa chake.

⁵⁴Naye akamwita upesi kijana aliyemchukulia mata yake, akamwagiza: Uchomoe upanga wako, uniue, watu wasiseme, ya kama mwanamke ameniua![#1 Sam. 31:4.]

⁵⁵Ndipo, kijana wake alipomchoma upanga, kisha akafa.

⁵⁶Waisiraeli walipoona, ya kuwa Abimeleki amekufa, wakaenda zao kila mtu mahali pake.[#Amu. 9:5.]

⁵⁷Ndivyo, Mungu alivyoyalipiza yale mabaya ya Abimeleki, aliyomfanyizia baba yake na kuwaua ndugu zake 70.[#Amu. 9:20.]

⁵⁸Nayo mabaya ya watu wa Sikemu Mungu aliwarudishia vichwani pao; ndivyo, kiapizo cha Yotamu, mwana wa Yerubaali, kilivyowajia.