¹Maneno kama haya nimeyasikia mara nyingi,

²ninyi nyote mwatuliza moyo na kuusumbua!

³Maneno yaliyo kama upepo yamekwisha? Au kuna nini kinachokuchochea, ukinijibu hivyo?

⁴Mimi nami ningeweza kusema kama ninyi; kama roho zenu zingekuwa mahali pake roho yangu, nami ningeweza kukusanya maneno mazuri ya kuwaambia pamoja na kuwatingishia kichwa changu.[#Sh. 22:8.]

⁵Lakini kwa maneno ya kinywa changu ningewatia nguvu, nayo midomo yangu ingewatuliza mioyo kwa kuwakingia maovu.

⁶Lakini maumivu yangu hayazuiliki, ijapo niseme; tena kuna nini ninayopungukiwa, nikiacha kusema?

⁷Kwa kuuangamiza mlango wangu wote amenichokesha sasa.

⁸Wewe ukanikunjamanisha, upate ushahidi wa kunishinda, nako kukonda kwangu kwaniinukia, kunisute usoni pangu.

⁹Ukali wake ukaninyafua kwa kunionea tu, nayo meno yake huyatumia ya kunikerezea, akanikazia macho yake makali, yeye mpingani wangu.[#Sh. 35:16; 112:10.]

¹⁰Wako wanaoniasamia vinywa vyao, wakanipiga mashavu na kunitukana, wote pia wakakusanyika kunijia mimi.[#Sh. 22:8.]

¹¹Mungu akanifunga, kisha akanitoa, wao wanipotoe, akanitia mikononi mwao wasiomcha.

¹²Nalikaa na kutengemana, mara akaniponda, akanikamata shingoni, akanibwaga mwambani, kisha akanisimamisha tena, niwe shabaha yake.[#Omb. 3:12.]

¹³Wapigaji wake wa mishale wakanizunguka, wakanipasua mafigo yangu pasipo huruma, nayo maji yangu ya nyongo wakayamwaga chini.

¹⁴Kwa kunitia kidonda kwa kidonda akaniumiza vibaya, kama fundi wa vita akanijia na kupiga mbio sana.

¹⁵Gunia la kuifunika ngozi ya mwili wangu ndilo, nililojishonea, nayo pembe yangu nikaichomeka uvumbini.[#1 Mose 37:34.]

¹⁶Uso wangu ukaiva sana kwa kulia, napo penye kope zangu kiko kivuli kama cha kifo.

¹⁷Tena mikononi mwangu hamna ukorofi, nayo maombo yangu hutakata.

¹⁸Usiifunike damu yangu, wewe nchi, wala malalamiko yangu yasipate kituo![#1 Mose 4:10.]

¹⁹Jueni: Hata sasa yuko shahidi wangu kule mbinguni, huko juu yuko atakayenitetea.

²⁰Rafiki zangu wananifyoza, lakini macho yangu hivyo, yanavyojaa machozi, humtazamia Mungu.[#Omb. 3:14.]

²¹Yeye Mungu amwamulie mtu, ijapo ashindane naye, hata mwana wa Adamu akishindana na mwenzake, amkatie shauri.

²²Kwani miaka imekwisha hesabiwa itakayokuja; nayo itakapokwisha, sina budi kuishika ile njia isiyo na kurudi.[#Iy. 10:21.]