¹Mtu akijaribu kukuambia neno, litakukasirisha?

²Lakini yuko nani awezaye kujizuia, asiseme?

³Tazama, uliowaonya ni wengi, ukashupaza mikono iliyokuwa imelegea.

⁴Maneno yako yakawainua waliojikwaa, nayo magoti yaliyokuwa yamechoka ukayatia nguvu.

⁵Lakini sasa mambo yakikufikia wewe, unazimia; yakikugusa wewe nawe, unastuka.

⁶Hivyo, unavyomcha Mungu, sivyo unavyoviegemea? tena hivyo, njia zako zinavyomwelekea Mungu, sivyo unavyovingojea?

⁷Kumbuka, kama yuko aliyeangamia akiwa hakukosa? tena wako wapi wanyokao waliotoweshwa?

⁸Nilivyoviona ni hivi: wenye kulima mapotovu nao wenye kupanda masumbuko, huyavuna yayo hayo.[#Fano. 22:8.]

⁹Mungu akiwapuzia, huangamia; akiwafokea kwa ukali wake humalizika.

¹⁰Sauti zake simba huwa zenye ukali, akinguruma; lakini meno yao wana wa simba yakivunjika,

¹¹nao hukosa nyama za kula; ndivyo, naye simba anavyoangamia, nao watoto wa simba mke hutawanyika.

¹²Liko neno lililonijia kama mwizi, sikio langu likalipokea, liliponong'onezwa.

¹³Usiku uliponitia mawazo mengine kwa kuniotesha, ilikuwa hapo, watu wanapoangukiwa na usingizi mzito;

¹⁴ndipo, kistusho kiliponipata na kunitetemesha, mifupa yangu yote ikafa ganzi,[#1 Mose 15:12.]

¹⁵upepo ukapita usoni pangu, mara nywele za mwili wangu zikajisimamisha,

¹⁶kwani pakasimama mfano machoni pangu, nami sikuweza kuutambua vema, jinsi ulivyokuwa; lakini kwa kuwa kimya nikasikia sauti ya kwamba:

¹⁷Je? yuko mtu aongokaye kuliko Mungu? Je? yuko wa kiume atakataye kuliko yeye aliyemwumba?

¹⁸Tazama! Watumishi wake hawezi kuwategemea, nao malaika zake huwaona, wakikosa.[#Iy. 15:15.]

¹⁹Sembuse wao wakaao katika nyumba za udongo, ambazo waliziwekea misingi uvumbini? Wao ndio wanaopondwa, kama ni nondo tu.[#2 Kor. 5:1.]

²⁰Toka asubuhi mpaka jioni husetwasetwa; nao wakiangamia kale na kale, hakuna aviwekaye moyoni.

²¹Kamba za mahema yao hakatwa, wakingali wamo; kwa kukosa werevu wa kweli hujifia tu.