Mapatilizo ya wamizimu.

¹Siku zile za huo wakati zitakapotimia,

mtaniona nikiyafungua mafungo ya Yuda na ya Yerusalemu.

²Ndipo, nitakapowakusanya wamizimu wote,

niwapeleke katika bonde la Yosafati;

ndiko, nitakakowakatia shauri

kwa ajili ya ukoo wangu wa Isiraeli ulio fungu langu,

kwa kuwa wamewatawanya kwenye wamizimu,

wakajigawanyia nchi yangu.

³Wao walio ukoo wangu wamewapigia kura,

wakitoa mtoto wa kiume, wajipatie mwanamke mgoni,

tena wamenunua mvinyo kwa mtoto wa kike, wakazinywa.

⁴Ninyi wa Tiro na wa Sidoni mwanitakiaje?

Nanyi nyote mkaao upande wa Wafilisti?

Je? Ninyi mwataka kunilipisha niliyofanyiziwa?

Au mnacho, mtakacho kunifanyizia?

Sasa hivi kwa upesi nitawarudishia matendo yenu,

yaje kuwaangukia vichwani penu.

⁵Kwani mmezichukua fedha zangu na dhahabu zangu,

nayo mapambo mazuri yaliyonipendeza

mmeyapeleka katika majumba ya miungu yenu.

⁶Nao wana wa Yuda na wa Yerusalemu mmewauzia wana wa Wagriki,

mpate kuwapeleka mbali, wasirudi mipakani kwao.

⁷Lakini mtaniona, nikiwainua mahali hapo, mlipowauzia,

nitakapowarudishia matendo yenu, yaje kuwaangukia vichwani penu.

⁸Kisha nitawauza wana wenu wa kiume na wa kike

na kuwatia mikononi mwao wana wa Yuda,

nao watawauzia Wasaba, kwa kuwa ni taifa likaalo mbali;

kwani Bwana ndiye aliyevisema.

Wokovu na utukufu wao walio ukoo wa Bwana.

⁹Yatangazeni haya kwa mataifa! Kisha eueni vita!

Wainueni wenye nguvu!

Wote walio mafundi wa vita na waje na kujipanga!

¹⁰Yafueni majembe yenu, yawe panga,

navyo visu vyenu, viwe mikuki!

Naye aliye mnyonge sharti aseme: Mimi ni mwenye nguvu!

¹¹Pigeni mbio, mje mkusanyike,

ninyi mataifa yote mkaao na kuwazunguka!

Nawe Bwana, wapeleke wanguvu wako, wawatelemkie kuko

huko!

¹²Mataifa na waimbe, waje huko bondeni kwa Yosafati!

Kwani ndiko, nitakakokaa, niwahukumu

wao wa mataifa yote wakaao na kuwazunguka.

¹³Haya! Leteni miundu! Kwani mavuno yameiva.

Njoni, mkanyage! Kwani kamulio limejaa,

mapipa nayo yanamwagikia, kwani mabaya yao ni mengi.

¹⁴Yako makundi ya watu mengi na mengi

huko bondeni kunakokatwa mashauri,

kwani siku ya Bwana iko karibu huko bondeni kunakokatwa mashauri.

¹⁵Jua na mwezi umeguiwa na giza, nazo nyota zimekoma

kuangaza.

¹⁶Ndipo, Bwana atakaponguruma mle Sioni,

ataivumisha sauti yake mle Yerusalemu,

mbingu na nchi zitetemeke.

Lakini Bwana atakuwa kimbilio lao walio ukoo wake

na ngome yao walio wana wa Isiraeli.

¹⁷Ndipo, mtakapojua, ya kuwa mimi Bwana ni Mungu wenu

akaaye Sioni penye mlima wangu mtakatifu.

Nao Yerusalemu utakuwa mji mtakatifu, msimopita wageni

tena.

¹⁸Siku ile itakuwa, milima idondoe mvinyo mbichi,

navyo vilima vitachuruzika maziwa,

navyo vijito vyote vya Yuda vitaleta maji mengi.

Kisha Nyumbani mwa Bwana mtatokea chemchemi,

italinywesha Bonde la Migunda.

¹⁹Misri itakuwa mapori tu,

nayo Edomu itakuwa nyika yenye mapori matupu,

kwa kuwa wamewakorofisha wana wa Yuda,

wakamwaga katika nchi yao damu zao wasiokosa.

²⁰Lakini Yuda itakaa watu kale na kale,

namo Yerusalemu watakaa vizazi kwa vizazi.

²¹Ndivyo, nitakavyozilipiza damu zao, ambazo sikuzilipiza

bado.

Naye Bwana atakuwa anakaa Sioni!