Ndoa ya mwana wa mfalme.

¹Yesu akaendelea kusema tena kwa mifano akiwaambia:[#Yoh. 3:29.]

²Ufalme wa mbingu umefanana na mtu mfalme aliyemfanyia mwanawe arusi.

³Akawatuma watumwa wake, wawaite walioalikwa arusini; nao hawakutaka kuja.

⁴Akatuma watumwa wengine akisema: Waambieni walioalikwa: Tazameni, nimekwisha kuiandaa karamu yangu, ng'ombe na vinono vimechinjwa, vyote viko tayari, njoni arusini![#Mat. 21:36.]

⁵Lakini wale wakavibeza, wakaenda zao, mmoja shambani kwake, mmoja kwa uchuuzi wake.

⁶Nao waliosalia wakawakamata watumwa wake, wakawapiga, wakawaua.

⁷Lakini mfalme akachafuka, akawatuma askari wake, akawaangamiza wauaji wale, akauteketeza mji wao.[#Mat. 24:2.]

⁸Hapo akawaambia watumwa wake: Arusi iko tayari, lakini walioalikwa hawakufaa.

⁹Basi, nendeni, mfike kwenye njia panda mwalikie arusini wo wote, mtakaowaona![#Mat. 13:47; 21:43.]

¹⁰Wale watumwa wakatoka, wakaenda njiani, wakawakusanya wote, waliowaona, wabaya na wema; arusi ikajaa wageni.

¹¹Lakini mfalme alipoingia kuwatazama wageni akaona mle mtu asiyevaa nguo inayopasa arusini.

¹²Akamwambia: Mwenzangu, uliingiaje humo, nawe hukuvaa nguo inayopasa arusini? Yule akanyamaza kimya.

¹³Ndipo, mfalme alipowaambia watumishi: Mfungeni miguu na mikono, mmtupe penye giza lililoko nje! ndiko, kitakakokuwa kilio na kukereza meno.[#Mat. 8:12.]

¹⁴Kwani waalikwao ni wengi, lakini wachaguliwao ni wachache tu!*[#Mat. 20:16.]

Shilingi ya kodi.

¹⁵Mafariseo wakaenda zao, wakala njama ya kumtega kwa maneno yake.

¹⁶Wakatuma kwake wanafunzi wao pamoja na watu wa Herode, wakasema: Mfunzi, tumekujua, ya kuwa wewe ni mtu wa kweli, nayo njia ya Mungu unaifundisha, ilivyo kweli, tena humwuliziulizi mtu ye yote, kwani hutazami nyuso za watu.[#Mar. 3:6; Yoh. 3:2; 5:41.]

¹⁷Tuambie, unaonaje wewe? Iko ruhusa ya kumtolea Kaisari kodi au haiko?

¹⁸Kwa kuutambua ubaya wao Yesu akasema: Enyi wajanja, mwanijaribiaje? Nionyesheni fedha ya kodi! Walipomletea shilingi,

¹⁹akawauliza: Chapa hiki cha nani? Maandiko nayo ya nani?

²⁰Wakasema: Ni yake Kaisari.[#Rom. 13:7.]

²¹Ndipo, alipowaambia: Basi, yaliyo yake Kaisari mtoleeni Kaisari, naye Mungu yaliyo yake Mungu!

²²Walipoyasikia wakastaajabu, wakamwacha, wakaenda zao.*[#Yoh. 8:9.]

Kufufuka.

²³Siku ileile wakamjia Masadukeo wanaosema: Hakuna ufufuko, wakamwuliza[#Tume. 23:6,8.]

²⁴wakisema: Mfunzi, Mose alisema: Mtu akifa asipokuwa na wana, nduguye amwingilie mkewe, amzalie mkubwa wake mwana![#1 Mose 33:8; 5 Mose 25:5-6.]

²⁵Kwetu kulikuwa na waume saba walio ndugu. Wa kwanza akaoa, akafa; kwa sababu hakuwa na mwana, alimwachia nduguye mkewe.

²⁶Vilevile na wa pili na wa tatu na wale saba wote.

²⁷Mwisho wao wote akafa naye mwanamke.

²⁸Basi, katika ufufuko atakuwa mke wa yupi wa hao saba? Kwani wote waliokuwa naye.

²⁹Yesu akajibu, akawaambia: Mwapotelewa, kwani hamyajui Maandiko wala nguvu ya Mungu.

³⁰Kwani katika ufufuko hawataoa, wala hawataolewa, ila watakuwa, kama malaika walivyo mbinguni.

³¹Lakini kwa ajili ya ufufuko wa wafu hamkusoma, mliloambiwa na Mungu aliposema:

³²Mimi ni Mungu wa Aburahamu na Mungu wa Isaka na Mungu wa Yakobo? Basi, Mungu siye wa wafu, ila wao walio hai.[#Mat. 8:11; 2 Mose 3:6.]

³³Watu walipoyasikia wakastushwa kwa ufundisho wake.[#Mat. 7:28.]

Agizo kubwa.

³⁴*Mafariseo waliposikia, ya kuwa amewashinda Masafukeo na kuwafumba vinywa, wakakusanyika pamoja.

³⁵Mmoja wao aliyekuwa mjuzi wa Maonyo yake Mungu akamwuliza kwa kumjaribu akisema:

³⁶Mfunzi, agizo lililo kubwa katika Maonyo yake Mungu ni lipi?[#5 Mose 6:5.]

³⁷Naye akamwambia: Umpende Bwana Mungu wako kwa moyo wako wote na kwa roho yako yote na kwa mawazo yako yote!

³⁸Hili ndilo agizo lililo kubwa, tena ni la kwanza. Nalo la pili limefanana nalo,

³⁹ndilo hili: Umpende mwenzio, kama unavyojipenda mwenyewe![#3 Mose 19:18; Rom. 13:9.]

⁴⁰Katika haya maagizo mawili yamo Maonyo yote ya Mungu pamoja na Wafumbuaji.[#Mat. 7:12; Rom. 13:10; Gal. 5:14.]

Mwana wa Dawidi.

⁴¹Wao Mafariseo walipokusanyika, Yesu akawauliza[#Rom. 1:3.]

⁴²akisema: Mwamwonaje Kristo kuwa ni mwana wa nani? Wakamwambia: Wa Dawidi.

⁴³Akawauliza: Tena Dawidi alimwitaje Bwana kwa nguvu ya Roho aliposema:

Bwana alimwambia Bwana wangu: Keti kuumeni kwangu,

⁴⁴mpaka niwaweke adui zako chini miguuni pako?[#Mat. 26:64; Sh. 110:1.]

⁴⁵Basi Dawidi akimwita Bwana, anakuwaje mwana wake?

⁴⁶Hata mmoja hakuweza kumjibu neno, wala toka siku ile hakuwako mtu aliyejipa moyo wa kumwuliza neno tena.*