¹Ilipokuwa asubuhi, watambikaji wakuu wote na wazee wa kwao wakamlia Yesu njama, kwamba wamwue.[#Luk. 23:1; Yoh. 18:31-32.]

²Wakamfunga, wakaenda naye, wakamtia mikononi mwa Pilato aliyekuwa mtawala nchi.

Kufa kwa Yuda.

³Hapo Yuda aliyemchongea akamwona, ya kuwa amekwisha kuhukumiwa, akajuta, akazirudisha zile fedha 30 kwa watambikaji wakuu na kwa wazee[#Mat. 26:15.]

⁴akisema: Nimekosa nilipotoa mtu asiyepaswa na kumwagwa damu yake. Wale wakasema: Jambo hilo hatumo, litazame mwenyewe!

⁵Ndipo, alipozitupa zile fedha Jumbani mwa Mungu, akaondoka, akaenda zake, akajinyonga.[#2 Sam. 17:23; Tume. 1:18.]

⁶Kisha watambikaji wakuu wakaziokota zile fedha, wakasema: Ni mwiko kuzitia katiaka sanduku ya vipaji, kwa kuwa ni fedha za damu.[#Mar. 12:41.]

⁷Wakazipigia shauri, wakazinunua shamba la mfinyanzi, liwe la kuzikia wageni.

⁸Kwa hiyo shamba lile linaitwa hata leo Shamba la Damu.[#Tume. 1:19.]

⁹Ndipo, yalipotimia, mfumbuaji Yeremia aliyoyasema: Wamezichukua fedha 30, ni upato wa mtu aliyeuzwa, waliomnunua kwa wana wa Isiraeli;[#Yer. 18:2; 32:6-9; Zak. 11:12,13.]

¹⁰wakazitoa kununua shamba la mfinyanzi, kama Bwana alivyoniambia.

Yesu mbele ya Pilato.

¹¹Yesu alipopelekwa mbele ya mtawala nchi, mtawala nchi akamwuliza akisema: Wewe ndiwe mfalme wa Wayuda? Yesu akamwambia: Wewe unavyosema, ndivyo.

¹²Tena aliposutwa nao watambikaji wakuu na wazee hakujibu neno.[#Mat. 26:63; Yes. 53:7.]

¹³Pilato alipomwambia: Husikii yote, wanayokusimangia?

¹⁴hakumjibu hata neno moja. Ikawa, mtawala nchi akastaajabu sana.[#Yoh. 19:9.]

¹⁵*Kwa desturi ya sikukuu mtawala nchi alikuwa amezoea kuwafungulia mfungwa mmoja, watu wengi waliyemtaka.

¹⁶Siku zile palikuwa na mfungwa aliyejulikana kwa ubaya, jina lake Baraba.

¹⁷Walipokusanyika, Pilato akawauliza: Mwamtaka yupi, niwafungulie? Baraba au Yesu anayeitwa Kristo?

¹⁸Kwani aliwajua, ya kuwa wamemtoa kwa wivu.[#Mat. 21:38; Yoh. 11:47-48; 12:19.]

¹⁹Naye alipoketi katika kiti cha uamuzi, mkewe akatuma kwake kumwambia: Usijitie katika jambo la yule mwongofu! Kwani nimeteseka mengi kwa ajili yake katika ndoto za usiku wa leo.

²⁰Lakini watambikaji wakuu na wazee wakawashurutisha makundi ya watu, wamtake Baraba, wamwangamize Yesu.

²¹Mtawala nchi akajibu akiwaambia: Katika hawawawili mwamtaka yupi, niwafungulie? Wakasema: Baraba!

²²Pilato akamwambia: Basi, Yesu anayeitwa Kristo nimfanyie nini? Wakasema wote: Na awambwe msalabani!

²³Aliposema: Ni kiovu gani, alichokifanya? wakakaza kupiga makelele wakisema: Na awambwe msalabani!

²⁴Pilato alipoona, ya kama hakuna linalofaa, ila matata yatakuwako mengi, akatwaa maji, akanawa mikono yake machoni pa watu, akasema: Mimi simo katika damu ya mtu huyu mwongofu, tazameni, ni shauri lenu![#5 Mose 21:6.]

²⁵Ndipo, watu wote walipojibu wakisema: Damu yake itujie sisi na watoto wetu![#Mat. 23:35; Tume. 5:28.]

²⁶Kisha akawafungulia Baraba, lakini Yesu akamtoa, apigwe viboko, kisha awambwe msalabani.

Kilemba cha miiba.

²⁷Ndipo, askari wa mtawala nchi walipompeleka Yesu bomani, wakakita kikosi chote cha askari, waje hapo, alipokuwa.

²⁸Wakamvua nguo zake, wakamvika kanzu nyekundu ya kifalme.

²⁹Wakasuka kilemba cha miiba, wakamvika kichwani, wakampa mwanzi mkononi mwake mwa kuume, wakampigia magoti, wakamfyoza na kusema: Pongezi, mfalme wa Wayuda!

³⁰Kisha wakamtemea mate, wakaushika ule mwanzi, wakampiga kichwani.[#Yes. 50:6.]

³¹Walipokwisha kumfyoza wakamvua kanzu ya kifalme, wakamvika tena nguo zake, wakampeleka, wamwambe msalabani.*

Kuwambwa msalabani.

³²Walipotoka wakaona mtu wa Kirene, jina lake Simoni; huyu wakamshurutisha, amchukulie msalaba wake.

³³Walipofika mahali panapoitwa Golgota, maana yake: Fuvu la Kichwa,

³⁴wakampa mvinyo iliyochanganyika na maji ya nyongo, anywe. Naye alipoyaonja hakutaka kunywa.[#Sh. 69:22.]

³⁵Walipokwisha kumwamba msalabani wakazigawanya nguo zake na kuzipigia kura, kusudi yatimie yaliyosemwa na mfumbuaji kwamba:

Wakajigawanyia nguo zangu, nalo vazi langu wakalipigia

kura.

³⁶Wakakaa wakimlinda palepale.

³⁷Juu ya kichwa chake wakabandika andiko la mashtaka yake ya kwamba: HUYU NI YESU, MFALME WA WAYUDA.

³⁸Pamoja naye wakawambwa misalabani wanyang, anyi wawili, mmoja kuumeni, mmoja kushotoni.[#Yes. 53:12.]

³⁹Waliopita wakamtukana, wakavitingisha vichwa vyao[#Sh. 22:8; 109:25.]

⁴⁰wakisema: Wewe unayelivunja Jumba la Mungu na kulijenga tena kwa siku tatu, jiokoe mwenyewe! Ukiwa Mwana wa Mungu shuka msalabani![#Mat. 26:61; Yoh. 2:19.]

⁴¹Vilevile nao watambikaji wakuu pamoja na waandishi na wazee wakamfyoza wakisema:

⁴²Wengine aliwaokoa, lakini mwenyewe hawezi kujiokoa. Kama ndiye mfalme wa Waisiraeli, ashuke sasa hivi msalabani! Ndivyo, tutakavyomtegemea nasi.

⁴³Alimtegemea Mungu, na amwokoe sasa, kama anamtaka! kwani alisema: Mimi ni Mwana wa Mungu.[#Sh. 22:9.]

⁴⁴Vivyo hivyo wakamtukana hata wale wanyang'anyi waliowambwa misalabani pamoja naye.

Kufa.

⁴⁵Tangu saa sita pakawa na giza katika nchi yote mpaka saa tisa.

⁴⁶Ilipokuwa kama saa tisa, Yesu akapaza sauti sana akisema: Eli, Eli, lama sabaktani? Ni kwamba: Mungu wangu, Mungu wangu, mbona umeniacha?[#Sh. 22:2.]

⁴⁷Wengine wao waliosimama hapo walipoyasikia wakasema: Huyu anamwita Elia.

⁴⁸Papo hapo mmoja wao akapiga mbio, akachukua mwani, akauchovya sikini na kuutia katika utete, akamnywesha.[#Sh. 69:22.]

⁴⁹Wengine wakasema: Acha, tuone, kama Elia anakuja kumwokoa!

⁵⁰Kisha Yesu akapaza tena sauti sana, akakata roho.

⁵¹Papo hapo ndipo, pazia la Jumbani mwa Mungu lilipopasuka toka juu mpaka chini, likawa vipande viwili. Nchi ikatetemeka, miamba ikapasuka,[#2 Mose 26:31; Ebr. 10:19-20.]

⁵²makaburi yakafunuka, ikafufuka miili mingi ya watu watakatifu waliolala,

⁵³wakatoka makaburini mwao, yeye alipokwisha kufufuka, wakauingia mji mtakatifu, wakatokea wengi, wawaone.[#Dan. 12:2; Tume. 26:23.]

⁵⁴Lakini bwana askari nao waliokuwa pamoja naye wakimlinda Yesu walipoliona lile tetemeko na yale mambo yaliyokuwapo, wakaogopa sana, wakasema: Kweli, huyu alikuwa Mwana wa Mungu!

⁵⁵Pale palikuwa na wanawake wengi, walisimama mbali wakitazama; ndio waliomfuata Yesu toka Galilea wakimtumikia.[#Luk. 8:1-3.]

⁵⁶Kati yao walikuwapo Maria Magadalene na Maria, mama yao Yakobo na Yosefu, tena mama yao wana wa Zebedeo.[#Mat. 20:20.]

Kuzikwa.

⁵⁷Ilipokuwa jioni, akaja mtu mwenye mali nyingi wa Arimatia, jina lake Yosefu; naye mwenyewe alikuwa mwanafunzi wa Yesu.[#2 Mose 34:25.]

⁵⁸Huyo akaenda kwa Pilato, akataka kupewa mwili wa Yesu; ndipo, Pilato alipoagiza, apewe.

⁵⁹Yosefu akauchukua ule mwili, akaufunga kwa sanda nyeupe,

⁶⁰akauweka katika kaburi lake jipya, alilokuwa amelichonga mwambani. Akafingirisha jiwe kubwa mlangoni pa kaburi, akaenda zake.[#Yes. 53:9.]

⁶¹Nao akina Maria Magadalene na Maria yule mwingine, walikuwa wamekaa hapa wakilielekea kaburi.

⁶²Kulipokucha, ni siku inayofuata maandalio ya kondoo ya Pasaka, watambikaji wakuu na Mafariseo wakamkusanyikia Pilato,

⁶³wakamwambia: Bwana, tumekumbuka, ya kuwa yule mdanganyifu alisema alipokuwa anaishi bado: Baada ya siku tatu nitafufuka.[#Mat. 12:40; 20:19; 27:40; 2 Kor. 6:8.]

⁶⁴Kwa hiyo agiza, kaburi lilindwe mpaka siku ya tatu, wanafunzi wake wasije, wamwibe, wakawaambia watu: Amefufuka katika wafu! madanganyo hayo ya mwisho yakawa mabaya kuliko yale ya kwanza.

⁶⁵Pilato akawaambia: Chukueni askari wa kulinda! Nendeni, mkalilinde kaburi, kama mnavyojua!

⁶⁶Nao wakaenda, wakaitia muhuri yao juu ya lile jiwe, wakawaweka askari hapo, walilinde kaburi.[#Dan. 6:17.]