Mji, Masiya atakamozaliwa, mema ya ufalme wake.

¹*Wewe Beti-Lehemu wa Efurata,

ijapo uwe mdogo katika miji yenye maelfu ya Yuda,

mwako ndimo, atakamonitokea yeye

atakayekuwa mtawala Waisiraeli;

matokeo yake ni ya siku nyingi za mbele,

kweli ni ya siku za kale na kale.

²Kwa hiyo atawatoa, siku zitimie,

yule atakayezaa atakapokuwa amezaa;

ndipo, wazao wa ndugu zao watakaporudi kwao kwa wana wa

Isiraeli.

³Ndipo, atakapotokea na kusimama, awachunge kwa nguvu za

Bwana,

kwa ukuu wa Jina la Bwana Mungu wake,

nao watakaa, kwani hapo ndipo, atakapokua,

awe mkuu mpaka mapeoni kwa nchi.

⁴Naye yeye atakuwa utengemano wetu.*

Kama Waasuri wataingia katika nchi yetu,

wakanyage namo majumbani mwetu,

tutaweka wachungaji wetu saba, wawazuie,

pamoja na watu wanane wa kifalme.

⁵Hao watailisha nchi ya Asuri kwa panga

nayo nchi ya Nimurodi malangoni kwake.

Ndivyo, atakavyotuponya mikononi mwa Waasuri,

kama wanaingia katika nchi yetu na kukanyaga mipakani

kwetu.

Utukufu wa Isiraeli.

⁶Nao masao ya Isiraeli watakuwa kati ya makabila mengi

kama umande utokao kwa Bwana,

au kama manyunyu yanyeayo majani

yasiyomngojea mtu, yasiyokalii wana wa watu.

⁷Kweli masao ya Yakobo watakuwa kwa wamizimu kati ya

makabila mengi,

kama simba alivyo katika nyama wa porini,

au kama mwana wa simba alivyo katika makundi ya kondoo,

akiwapita huwakanyaga pamoja na kuwararua, asipatikane

mponya.

⁸Hivyo mkono wako utakuwa mkuu kwao wakusongao,

nao adui zako watatoweshwa wote.

⁹Ndivyo, asemavyo Bwana:

Siku hiyo itakuwa, nitakapotowesha kwako farasi wako,

nayo magari yako ya vita nitayapoteza.

¹⁰Nayo miji ya nchi yako nitaitowesha,

nayo maboma yako yote nitayabomoa.

¹¹Nazo hirizi nitazitowesha mikononi pako,

nao waaguaji hawatakuwako kwako.

¹²Tena ndipo, nitakapovitowesha kwako

vinyago vyako na nguzo zako za mawe za kutambikia,

usiangukie tena yaliyo kazi za mikono yako.

¹³Hata mifano yenu ya mwezi nitaing'oa kwako,

nayo miji yako nitaiangamiza.

¹⁴Kwa makali yenye moto nitawalipisha wamizimu wasiosikia.