Wamchao Mungu ni wachache.

¹Yamenipata! Kwani yamenijia mambo

yapatikanayo penye mwisho wa machumo ya matunda,

siku za kiangazi zikitimia, au watu wakiokotezaokoteza zabibu:

hakuna kichala cha zabibu za kula

wala kuyu tu, roho yangu inazozitunukia sana.

²Wamchao Mungu wametoweka katika nchi hii,

kwa watu wa huku hakuna mwenye moyo unyokao.

Wote huvizia, wamwage damu za watu,

kila mmoja humtegea mwenziwe tanzi.

³Kama ni kufanya mabaya,

mikono yote miwili iko tayari, yamalizike vema.

Mkuu ayatakayo, mwenye kukata mashauri huyafanya

akipenyezewa mali;

mwenye nguvu akiyasema, roho yake inayoyatamani,

basi, yayo hayo wanayafunganyafunganya.

⁴Aliye mwema kwao hufanana na mbigili,

anyokaye moyo kwao ni mbaya kuliko boma la migunga.

Siku, wapelelezi wako waliyoisema, ile siku,

utakapopatilizwa, inakuja!

Ndipo, watakapochafukwa na mioyo.

⁵Usimtegemee mwenzio!

Wala usimjetee rafiki yako umpendaye!

Ilinde midomo ya kinywa chako,

mwanamke alalaye kifuani pako asiyajue yaliyomo!

⁶Kwani mwana wa kiume anambeza baba yake,

naye mwana wa kike anamwinukia mama yake,

vilevile mkwe na mkwewe,

nao watakaomchukiza mtu ndio waliomo mwake.

Huruma za Bwana zitakazotokea.

⁷Lakini mimi nitamchungulia Bwana,

nimngojee Mungu wangu atakayeniokoa.

Mungu wangu atanisikia.

⁸Usinifurahie, uliye adui yangu! Kama ningeanguka, nitainuka tena.

Kama ninakaa gizani, Bwana ni mwanga wangu.

⁹Makali yake Bwana nitayavumilia, kwani nimemkosea:

mwisho atanigombea magomvi yangu, anikatie shauri lililo sawa,

atanitoa na kuniweka mwangani, nipate kuuona wongofu wake.

¹⁰Naye adui yangu ataviona; ndipo, soni itakapomfunika,

yeye aniulizaye sasa: Bwana Mungu wako yuko wapi?

Macho yangu yatamfurahia,

atakapokanyagwa kama taka ya barabarani.

¹¹Siku itakuja, kuta zako zitakapojengwa,

siku hiyo mipaka yako itakuwa mbali.

¹²Siku hiyo watakuja kwako watokao Asuri na miji ya Misri,

tena kutoka Misri mpaka mto huo mkubwa,

tena kutoka bahari hii mpaka bahari ya pili,

tena kutoka mlima huu mpaka mlima ule.

¹³Lakini kwanza nchi hii sharti iwe mapori tu

kwa ajili yao waikaao; hayo ndiyo mapato ya matendo yao.

¹⁴Walio ukoo wako wachunge kwa fimbo yako,

ndilo kundi lililo fungu lako.

ni wao wakaao peke yao katika mwitu huko Karmeli,

walishe hata Basani na Gileadi kama siku za kale.

¹⁵Kama siku zile, mlipotoka katika nchi ya Misri,

nitawaonyesha mambo yatakayowastaajabisha.

¹⁶Wamizimu watakapoyaona, watapatwa na soni,

nguvu zao zote zikiwa za bure,

wataweka mikono vinywani,

nayo masikio watayaziba, yasisikie.

¹⁷Watalamba mavumbi kama nyoka,

kama wadudu watambaao chini watatoka mafichoni mwao na

kutetemeka,

wamjie Bwana Mungu wetu kwa kutishika,

nawe wewe watakuogopa.

¹⁸Je? Yuko Mungu afananaye na wewe,

aondoaye maovu, ayapitaye mapotovu yao

walio masao yao waliokuwa fungu lake?

Hazishiki kale na kale nguvu za makali yake,

kwani hupendezwa na kuwaendea watu kwa upole.

¹⁹Nasi atatuhurumia tena, maovu yetu yote

atayapondaponda, yatutoke,

makosa yetu yote atayatupa vilindini mwa bahari.

²⁰Yakobo utamwendea kwa welekevu, naye Aburahamu kwa upole,

kama ulivyowaapia baba zetu tangu siku zile za kale.