Mkono wa kupooza.

¹Alipoingia tena katika nyumba ya kuombea, mle mlikuwa na mtu mwenye mkono uliokuwa umekaukiana.

²Wakamtunduia, kama atamponya siku ya mapumziko, wapate kumsuta.

³Akamwambia yule mwenye mkono uliokaukiana: Inuka, uje hapa katikati!

⁴Kisha akawauliza: Iko ruhusa siku ya mapumziko kufanya mema au kufanya maovu? kuponya roho ya mtu au kuiua? Waliponyamaza,

⁵ukali ukamjia, akawatazama waliokuwako, akausikitikia ugumu wa mioyo yao, akamwambia yule mtu: Unyoshe mkono wako! Alipounyosha, huo mkono wake ukageuka kuwa mzima.[#Yoh. 11:33.]

⁶Mafariseo wakatoka, papo hapo wao pamoja na watu wa Herode wakamlia njama ya kumwangamiza.[#Mar. 6:14; Mat. 22:16.]

Kuponya watu wengi.

⁷Yesu akaondoka pamoja na wanafunzi wake kwenda upande wa baharini. Kundi la watu wengi sana waliotoka Galilea likamfuata. Tena wengi waliotoka Yudea

⁸na Yerusalemu na Idumea na ng'ambo ya Yordani na upande wa Tiro na Sidoni, wakamwendea, kwani waliyasikia yote, aliyoyafanya.[#Mat. 4:25.]

⁹Akawaambia wanafunzi wake, wamtengenezee chombo kidogo kwa ajili ya makundi ya watu, wasije kumsongasonga.

¹⁰Kwa kuwa aliponya wengi, wote walioteseka wakamwangukiaangukia, wapate kumgusa tu.

¹¹Hata pepo wachafu, kila walipomwona, wakamwangukia wakipiga kelele wakisema: Wewe ndiwe Mwana wa Mungu![#Luk. 4:41.]

¹²Akawatisha sana, wasimtangaze.[#Mar. 1:34.]

Kuwachagua Mitume 12.

¹³Kisha akapanda mlimani, akawaita, aliowataka mwenyewe; wakaja kwake.

¹⁴Akawaweka kumi na wawili, wawe pamoja naye, apate kuwatuma kupiga mbiu,

¹⁵wakiisha kupewa nguvu za kufukuza pepo.

¹⁶Akawaweka hao kumi na wawili: Simoni akampa jina la Petero.[#Yoh. 1:42.]

¹⁷Yakobo, mwana wa Zebedeo, na Yohana, nduguye Yakobo, akawapa jina la Boanerge, ni kwamba: Wana wa Ngurumo.[#Luk. 9:54.]

¹⁸Akawaweka nao akina Anderea na Filipo na Bartolomeo na Mateo na Toma na Yakobo, mwana wa Alfeo, na Tadeo na Simoni wa Kana

¹⁹na Yuda Iskariota aliyemchongea halafu.

Mateka ya mwenye nguvu.

²⁰Alipoingia nyumbani, ndipo, kundi la watu lilipokusanyika tena, wenyewe wasiweze hata kula mkate.

²¹Lakini ndugu zake walipoyasikia wakatoka, waje kumchukua, kwa maana walisema: Amepatwa na kichaa.[#Yoh. 7:20; 8:48,52; 10:20.]

²²Nao waandishi waliokuwa wametelemka toka Yerusalemu walisema: Ana Belzebuli. Tena wakasema: Nguvu ya huyo mkuu wa pepo ndiyo, anayofukuzia pepo.

²³Akawaita, akawaambia kwa mifano: Satani awezaje kumfukuza Satani mwenziwe?

²⁴Ufalme unapogombana wao kwa wao, ufalme huo hausimamiki.

²⁵Nayo nyumba inapogombana wao kwa wao, nyumba hiyo haitaweza kusimama.

²⁶Naye Satani anapojiinukia mwenyewe na kujigombanisha hawezi kusimama, ila ataishiwa.

²⁷Hakuna mtu awezaye kuingia katika nyumba ya mwenye nguvu, aviteke vyombo vyake, asipomfunga kwanza yule mwenye nguvu; kisha ataweza kuiteka nyumba yake.

²⁸Kweli nawaambiani: Wana wa watu wataondolewa yote, hata maneno yote ya kumbeza Mungu.

²⁹Lakini mtu atakayembeza Roho Mtakatifu hapati kuondolewa kale na kale, ila kosa lake litamkalia pasipo mwisho.

³⁰Aliwaambia hivyo kwa vile walivyosema: Ana pepo mchafu.[#Mar. 3:22.]

Mama na ndugu.

³¹Kisha mama yake na ndugu zake wakaja, wakasimama nje, wakatuma mtu kwake, amwite.

³²Kundi la watu likawamo likimzunguka, wakamwambia: Tazama, mama yako na ndugu zako wako nje, wanakutafuta.

³³Akajibu akiwaambia: Aliye mama yangu ni nani? Ndugu zangu ni akina nani?

³⁴Akawatazama waliokaa huko na huko, wakimzunguka pande zote, akasema: Watazameni walio mama yangu na ndugu zangu!

³⁵Mtu ye yote atakayeyafanya, Mungu ayatakayo, huyo ndiye ndugu yangu na dada yangu na mama yangu.