Anwani.

¹Sisi Paulo na Timoteo tulio watumwa wake Kristo Yesu tunawaandikia ninyi watakatifu nyote mlio naye Kristo Yesu, mkaao huko Filipi, pamoja nanyi watumishi:[#1 Kor. 1:2; 1 Tim. 3:1-3,8.]

²Upole uwakalie na utengemano unaotoka kwa Mungu Baba yetu na kwa Bwana Yesu Kristo![#Rom. 1:7.]

Paulo huwaombea.

³*Namshukuru Mungu wangu, kila ninapowakumbuka,

⁴kwani kila mara nikiwaombea ninyi nyote ninaomba na kufurahi.

⁵Kwani mwashikamana na Utume mwema tangu siku ile ya kwanza mpaka sasa hivi.

⁶Kwa hiyo moyo umenitulia, nikijua: Yeye aliyeanza mwenu kazi njema ataimaliza hata siku ya Kristo Yesu.[#Fil. 2:13; 1 Kor. 1:6-8.]

⁷Ndivyo, inavyonipasa kuwawazia ninyi nyote, kwa sababu ninyi hamtoki moyoni mwangu, ikiwa nafungwa na ikiwa naukania Utume mwema na kuutangaza kwa nguvu; hapo po pote ninyi m wenzangu waliogawiwa kipaji kilekile.

⁸Kwani Mungu huona, ninavyowatunukia ninyi nyote kwa hivyo, tulivyo moyoni mwake Yesu Kristo.

⁹Neno, niwaombealo, ni hili: upendo wenu uendelee kukua na kuongezeka, kama mlivyoendelea kutambua na kujua maana yote,

¹⁰mpate kuyapambanua yasiyopatana, mtokee siku ya Kristo wenye ung'avu wa mioyo wasiokwaza wengine,[#Rom. 12:2; 1 Tes. 5:23.]

¹¹mkawa wenye mapato yote ya wongofu, anayotupatia Yesu Kristo, Mungu atukuzwe na kusifiwa.*[#Ef. 5:9.]

Kumvumisha Kristo.

¹²*Basi, ndugu, nataka, mtambue, ya kuwa mambo yangu yaliyonipata yamegeuka kuwa ya kuuendesha Utume mwema.[#2 Tim. 2:9.]

¹³Maana hapa bomani pote nako kwao wengine minyororo yangu imejulikana, ya kwamba nimefungwa kwa ajili yake Kristo.[#Fil. 4:22.]

¹⁴Tena minyororo yangu imeshikiza ndugu wengi walio wake Bwana, wakajipa mioyo nao ya kulisema Neno la Mungu pasipo woga.

¹⁵Kweli wako wamtangazao Kristo kwa ajili ya wivu na uchokozi, lakini tena wako wanaomtangaza kwa kupendezwa kweli.

¹⁶Hao ndio wanaonipenda, kwani wamejua, ya kuwa nimefungwa, niukanie Utume mwema.

¹⁷Lakini wale humtangaza Kristo, kwamba wanichokoze, lakini mioyo haiwang'ai, maana hutaka kuyaongeza maumivu yangu, niliyo nayo humu kifungoni.[#Fil. 1:7.]

¹⁸Basi, haidhuru; inafaa, Kristo atangazwe tu kwa njia zozote, ikiwa za uwongo, au ikiwa za kweli; kwa hiyo nafurahi. Hata siku zitakazokuja nitafurahi.[#Fil. 2:17-18.]

¹⁹Kwani najua: hili nalo timizo lake ni wokovu wangu, maana ninyi huniombea, nao Roho wake Kristo hunisaidia.[#Iy. 13:16.]

²⁰Hiki nacho ni kingojeo changu, nitumikiacho, kitimie: hakuna neno lo lote, ambalo nitatiwa soni nalo, ila kama vilivyokuwa kale, ndivyo, vitakavyokuwa hata sasa: Kristo atatukuzwa waziwazi po pote mwilini mwangu, ikiwa kwa njia ya kuishi au ya kufa.[#1 Petr. 4:16.]

Kufa ni kupata.

²¹Kwani kwangu mimi kuishi ni Kristo, hata kufa ni kupata.*[#Gal. 2:20.]

²²Lakini kuishi mwilini kunanifaa, niyaone machumo ya kazi yangu; kwa hiyo sikutambui, nitakakokuchagua.[#Rom. 1:13.]

²³Kwani nashindana na haya mambo mawili: ninatunukia kuaga nchini, nipate kuwa pamoja na Kristo; nako ni kuzuri kuliko yote.[#1 Fal. 19:4; 2 Kor. 5:8.]

²⁴Lakini kuishi humu mwilini kunafaa zaidi kwa ajili yenu ninyi.

²⁵Kwa hiyo moyo umenitulia, nikijua, ya kuwa nitakaa nchini, nako kwenu nitakaa nanyi nyote, mwendelee kumtegemea Mungu na kufurahiwa ndiko,[#Fil. 2:24.]

²⁶majivuno yenu ya kuwa wake Kristo Yesu yaongezeke kwa ajili yangu, mkiniona, nikifika tena kwenu.

Simameni kwa nguvu ya Kiroho!

²⁷*Tena neno moja: sharti mwongozane, kama iwapasavyo wenye Utume mwema wa Kristo! Maana ikiwa nafika kwenu, sharti niwaone, au ikiwa niko huku mbali, sharti niwasikie kwamba: Mko mmesimama kwa nguvu ya kutenda roho moja, nayo mioyo ni mmoja tu wa kuja vitani pamoja, mkugombee kuutegemea Utume mwema.[#Tume. 4:32; Kol. 1:10; 1 Tes. 2:12.]

²⁸Hivyo halitapatikana neno lo lote, wapigani wenu wanaloweza kuwatisha; napo ndipo, wanapojulika kuwa wenye upotevu, nanyi kuwa wenye wokovu, naye mwenye kuwajulisha kuwa hivyo ni Mungu.

²⁹Kwani ninyi kwa hivyo, mnavyomtumikia Kristo, siko kumtegemea tu mlikopewa, ila mmepewa hata kuteseka kwa ajili yake yeye,[#Tume. 5:41-42.]

³⁰mkapatwa na kondo ileile, mliyoiona kwangu kale, tena mnayoisikia, ya kuwa hata sasa ninayo.[#Tume. 16:22.]