Matendo mengine ya werevu na ya wajinga.

¹Mwana mwerevu wa kweli hutaka kuonywa na baba,

lakini mfyozaji hasikii akikemewa.

²Kila mtu hula mema, kinywa chake kilichoyazaa,

lakini roho zao wavunja maagano hula makorofi.

³Akilindaye kinywa chake huilinda roho yake,

lakini aifunuaye midomo yake hujiangamiza.

⁴Roho yake mvivu hutamani vingi pasipo kupata kitu,

lakini roho zao wajihimizao kufanya kazi hushibishwa sana.

⁵Mwongofu huchukia neno la uwongo,

lakini asiyemcha Mungu hufanya yachukizayo nayo yatwezayo.

⁶Mwongofu humlinda ashikaye njia isiyokosesha,

lakini kuacha kumcha Mungu humwangusha mkosaji.

⁷Wako wanaojitendekeza kuwa wenye mali, lakini hawana kitu,

tena wako wanaojitendekeza kuwa maskini, lakini wana mali nyingi.

⁸Makombozi ya roho ya mtu ni mali zake nyingi,

lakini maskini hasikii makemeo yo yote.

⁹Mwanga wa waongofu huangaza kwa furaha,

lakini taa zao wasiomcha Mungu huzimika.

¹⁰Hakuna mengine, majivuno yanayoyaleta, ila ugomvi tu,

lakini kwao wanaotaka mashauri mema uko werevu wa kweli.

¹¹Mali zilizopatikana bure tu hupunguka upesi,

lakini azikusanyaye kwa kazi za mkono wake huziongeza.

¹²Uliyoyangojea yakikawia sana huuguza moyo,

lakini kuyapata, uliyoyatamani, ni mtu wa uzima.

¹³Alibezaye Neno hupatiwa mwangamizo nalo,

lakini aogopaye kulikosea agizo hupata malipo.

¹⁴Maonyo ya mwerevu wa kweli ni kisima cha uzima,

maana ni kuepuka penye matanzi ya kifo.

¹⁵Ujuzi mwema huleta mapendeleo,

lakini njia zao walioacha kumcha Mungu hushupaza.

¹⁶Mwerevu hufanya yote kwa ujuzi,

lakini mpumbavu hujikuza kwa mapumbavu yake.

¹⁷Mjumbe asiyemcha Mungu huanguka kwa ubaya,

lakini mtume mwelekevu huponya.

¹⁸Ukiwa na matusi humpata akataaye kuonyeka,

lakini aangaliaye akikanywa hupata heshima.

¹⁹Kuyapata, mtu aliyoyatamani, huipendeza roho yake,

lakini yanayowatapisha wapumbavu ni kuacha mabaya.

²⁰Atembeaye na werevu wa kweli huerevuka kweli,

lakini rafiki ya wapumbavu hupata mabaya.

²¹Mabaya huwakimbiza wakosaji,

lakini waongofu Mungu huwalipa mema.

²²Mwema huwaachia wanawe na wana wao mali zake,

lakini mapato ya mkosaji hulimbikiwa mwongofu.

²³Shamba, waliloanza kulilima, huwapatia wakiwa vilaji vingi,

lakini wengine hupokonywa kwa kufanya yasiyo sawa.

²⁴Amnyimaye mwanawe fimbo humchukia,

lakini ampendaye hakawii kabisa kumchapa.

²⁵Mwongofu hupata kula, hata aishibishe roho yake,

lakini matumbo yao wasiomcha Mungu huona njaa.