Werevu wa kweli huleta wokovu, ujinga na ukosaji huponza.

¹Jibu lenye upole hutuliza makali,

lakini neno liumizalo hukasirisha sana.

²Ndimi zao walio werevu wa kweli husema ujuzi mwema,

lakini vinywa vya wapumbavu hububujika ujinga.

³Macho ya Bwana huwa po pote,

huwatazama wabaya na wema.

⁴Upole wa ulimi ni mti wa uzima,

lakini udanganyifu uliomo huvunja moyo.

⁵Mjinga hukataa kuonywa na baba yake,

lakini aangaliaye akikanywa huerevuka.

⁶Nyumbani mwa mwongofu mna limbiko kubwa,

lakini mapato yake asiyemcha Mungu utawanyika.

⁷Midomo yao walio werevu wa kweli humwaga ujuzi,

lakini mioyo ya wapumbavu haifanyi hivyo.

⁸Vipaji vya tambiko vyao wasiomcha humtapisha Bwana,

lakini maombo yao wanyokao humpendeza.

⁹Njia yake asiyemcha humtapisha Bwana,

lakini humpenda aukimbiliaye wongofu.

¹⁰Ayaachaye mapito yampasayo hupata mapigo mabaya,

achukiaye kukanywa hufa.

¹¹Kuzimu nako, wafu wanakopotelea, kuko mbele ya Bwana;

tena je? Mioyo ya wana wa Adamu haitakuwa wazi zaidi?

¹²Mfyozaji hapendi, mtu akimkanya,

wala haendi kwao werevu wa kweli.

¹³Moyo wenye furaha huuchangamsha uso,

lakini moyo ukisikitika, roho hupondeka.

¹⁴Moyo wa mtambuzi hutafuta ujuzi,

lakini vinywa vya wapumbavu hujilisha ujinga.

¹⁵Siku zote za mtu atesekaye ni mbaya,

lakini moyo mwema hufanana na karamu ya siku zote.

¹⁶Machache yake amwogopaye Bwana ni mema

kuliko malimbiko mengi yamhangaishayo mwenyewe.

¹⁷Kula maboga na mtu wa kupendana naye ni kwema

kuliko ng'ombe ya manono, ukila na mtu wa kuchikzwa naye.

¹⁸Mtu mkali huzusha magomvi,

lakini mvumilivu hutuliza mateto.

¹⁹Njia ya mvivu hufanana na boma lenye miiba mikali,

lakini mapito yao wanyokao ni njia zilizotengenezwa.

²⁰Mwana mwerevu wa kweli humfurahisha baba yake,

lakini mtu mpumbavu humbeza mama yake.

²¹Ujinga humfurahisha aliyepotelewa na akili,

lakini mwenye utambuzi huunyosha mwenendo wake.

²²Nayo mawazo mema hayafanikiwi pasipo kupiga mashauri,

lakini wenye kuongoza wanapokuwa wengi, huendelea.

²³Mtu hufurahia jibu jema la kinywa chake,

nalo neno lisemwalo panapopasa ni zuri zaidi.

²⁴Njia yake aerevukaye ya kwenda uzimani huelekea juu,

kusudi ajiepushe kuzimuni huko chini.

²⁵Nyumba zao wenye majivuno Bwana huzibomoa,

lakini mipaka ya wajane huishupaza.

²⁶Mawazo ya wabaya humtapisha Bwana,

lakini maneno yampendezayo ndiyo yatakatayo.

²⁷Atakaye mapato ya upotovu huwavuruga waliomo nyumbani mwake,

lakini achukiaye mapenyezo hujipatia uzima.

²⁸Moyo wa mwongofu huyawaza, atakayoyajibu,

lakini vinywa vyao wasiomcha Mungu hububujika mabaya.

²⁹Bwana huwakalia mbali wasiomcha,

lakini malalamiko ya waongofu huyasikia.

³⁰Macho yakiangaza, moyo hufurahi,

habari njema huishupaza mifupa.

³¹Sikio linalosikia maonyo yanayompatia mtu uzima

hupenda kukaa kwao werevu wa kweli.

³²Akataaye kuonywa huitupa roho yake,

lakini asikiaye akikanywa hujipatia akili zaidi.

³³Amchaye Bwana huonyeka, ajipatie werevu wa kweli,

nayo macheo hutanguliwa na unyenyekevu.