Mema, mkiwa anayoyapata kwa kumcha Mungu, nayo mabaya, wanayoyapata wajinga na wavivu na wafyozaji.

¹Mkiwa aishikaye njia yake pasipo kukosa na mwema

kuliko mpotovu wa midomo aliye mpumbavu.

²Roho ikosayo ujuzi siyo njema,

naye mwenye haraka ya kupiga mbio kwa miguu hukosa.

³Ujinga wa mtu huipotoa njia yake mwenyewe,

lakini moyo wake humkasirikia Bwana.

⁴Kuwa na mali huongeza rafiki, wawe wengi,

lakini mnyonge huachwa na rafiki zake.

⁵Shahidi ya uwongo hana budi kupatilizwa,

asemaye na kuongopa haponi.

⁶Watu wengi hulalamika usoni pa wakuu,

watu wote huwa rafiki zake awapaye matunzo.

⁷Maskini huchukiwa na ndugu zake wote,

wanaozidi ni rafiki zake, hutengana naye humwacha mbali;

akiwafuata, aseme nao, sio rafiki zake tena.

⁸Apataye akili hujipenda mwenyewe

utambuzi huona mema.

⁹Shahidi ya uwongo hana budi kupatilizwa,

asemaye na kuongopa huangamia.

¹⁰Mpumbavu hapaswi na kutumia yenye urembo,

sembuse mtumishi, hapaswi na kuwatawala wafalme.

¹¹Akili za mtu humvumilisha,

utukufu wake umo katika kuwaondolea wengine mapotovu yao.

¹²Ukali wa mfalme ni kama ngurumo ya simba,

lakini upole wake ni kama umande unyweshao majani.

¹³Mwana mpumbavu humpatia baba yake mabaya,

lakini magomvi ya mwanamke huwa mchirizi usiokoma kuchuruzika.

¹⁴Nyumba na mali watu huachiwa na baba zao,

lakini mwanamke mwenye akili hutoka kwa Bwana.

¹⁵Uvivu humpatia mtu usingizi mwingi,

nayo roho ya mtu afanyaye kazi na kulegeza mikono huona njaa.

¹⁶Aliangaliaye agizo la Mungu hujiangalia mwenyewe,

lakini azibezaye njia zake hufa.

¹⁷Ahurumiaye mnyonge humkopesha Bwana,

ndiye atakayemlipa tendo lake.

¹⁸Mpige mwanao unapoweza kumngojea, aonyeke,

lakini usiwaze moyoni mwako kumwua!

¹⁹Mwenye makali mengi hutozwa malipo,

kwani ukimwacha tu, unayazidisha makali yake.

²⁰Yasikie mashauri, unayopewa, uonyeke,

kusudi uerevuke kweli katika siku zako zijazo.

²¹Moyoni mwa mtu yamo mawazo mengi,

lakini shauri la Bwana ndilo litakalokuwa.

²²Ugawiaji wa mtu hutokea katika mapenzi yake,

naye maskini ni mwema kuliko mwenye uwongo.

²³Kumcha Bwana hupeleka uzimani,

hivyo mtu hulala na kushiba pasipo kupatwa na mabaya.

²⁴Mvivu akiutia mkono wake katika bakuli

haurudishi kinywani mwake.

²⁵Ukimpiga mfyozaji, ndipo, mjinga atakapoerevuka,

ukimwonya mtambuzi, ndipo, atakapotambua ujuzi.

²⁶Amtesaye baba yake na kumfukuza mama yake

ni mwana atiaye soni kwa kutweza.

²⁷Mwanangu, acha kuyasikiliza mafunzo,

ukitaka kuyakosea tena maneno ya ujuzi!

²⁸Shahidi asiyefaa kitu hufyoza mashauri yaliyo sawa,

navyo vinywa vyao wasiomcha Mungu hujilisha mapotovu.

²⁹Mashauri ya wafyozaji yamekwisha kutengenezwa,

nayo mapigo ya migongoni kwa wapumbavu yako tayari.