Mbaraka ya kutafuta ujuzi.

¹*Mwanangu, ukiyapokea maneno yangu

na kuyashika maagizo yangu moyoni mwako,

²ukiutegea werevu wa kweli sikio lako,

ukauelekezea utambuzi moyo wako,

³ukiziita akili na kuipaza sauti yako, upate utambuzi,[#Yak. 1:5.]

⁴ukiutafuta, kama unavyotafuta fedha,

ukiuchunguza, kama unavyochunguza mali zilizofichwa:

⁵ndipo, utakapoitambua maana ya kumcha Bwana,

tena ndipo, utakapopata kumjua Mungu.

⁶Kwani Bwana huerevusha kweli,

kinywani mwake hutoka ujuzi na utambuzi.

⁷Wanyokao aliwawekea wokovu,

ni ngao yao waendeleao pasipo kukosa,

⁸ayalinde mapito yaliyo sawa

na kuzingalia njia zao wamchao.*

⁹Ndipo, utakapotambua wongofu na mashauri yaliyo sawa

nayo yanyokayo na kila njia njema,

¹⁰kwani werevu wa kweli utaingia moyoni mwako,

nao ujuzi utaupendeza roho yako.

¹¹Mawazo mema ya moyo yatakuangalia,

nao utambuzi utakulinda,

¹²yakuponye, usiishike njia ya wabaya,

usiwafuate watu wasemao mapotovu,

¹³walioziacha njia zinyokazo,

waende katika njia zenye giza.

¹⁴Wanaofurahiwa na kufanya mabaya,

wanaoshangilia mapotovu ya wabaya,

¹⁵njia zao nazo ni za upotovu,

nayo mikondo yao hainyoki.

¹⁶Nayo yale mawazo mema ya moyo yatakuponya,

usimchukue mwanamke mgoni aliye wa mwingine,

ijapo akubembeleze kwa maneno mazuri;

¹⁷kwa kuwa alimwacha mpendwa wa ujana wake

na kulisahau agano la Mungu wake,

¹⁸nyumba yake inatumbukia penye kifo,

nayo mapito yake humwongoza kwenda kwao wazimu.

¹⁹Wote walioingia mwake hakuna atakayerudi,

wala hakuna atayezifikilia njia za kwenda uzimani.

²⁰Huku na kwamba: Uende katika njia ya watu wema

na kuyashika mapito yao walio waongofu.

²¹Kwani wanyokao ndio watakaokaa katika nchi,

nao wamchao Mungu watasazwa huku;

²²lakini wasiomcha Mungu watang'olewa katika nchi,

nao waliomwacha Bwana watapokonywa huku.