Mafundisho yampasayo mtu amchaye Mungu.

¹Ukikaa chakulani kwa mtawalaji

sharti umtambue yeye aliopo usoni pako.

²Jibandikie kisu kooni pako

wewe ukiwa mwenye tamaa ya kula sana!

³Usivitamani vilaji vya urembo vya mwingine!

Kwani ni vyakula vya udanganyifu.

⁴Usijisumbue kupata mali nyingi,

ukaacha kuutumia utambuzi wako kwa ajili ya hizo mali!

⁵Au sivyo? Ukizitupia macho yako, basi, haziko tena,

nazo hujitengenezea mabawa kama ya tai ya kurukia kwenda mbinguni.

⁶Usile chakula chake mwenye jicho baya,

wala usivitamani vyakula vyake vya urembo!

⁷Kwani yeye ni kama mtu ahesabuye yote rohoni mwake;

hukuambia: Haya! Ule, unywe! lakini moyo wake hauko kwako.

⁸Kwa hiyo utakitapika kitonge, ulichokila,

nayo maneno yako yapendezayo yatakuwa umeyasema bure tu.

⁹Usiseme masikioni pa mpumbavu!

Kwani atayabeza maneno yako, uliyoyasema kwa akili.

¹⁰Usisogeze mawe ya mipaka ya kale,

wala usiingie mashambani kwao waliofiwa na wazazi wao!

¹¹Kwani mkombozi wao ni mwenye nguvu,

yeye huwagombea, wakigombezwa na wewe.

¹²Ushurutishe moyo wako, uonyeke,

nayo maskio yako, yasikie maneno ya ujuzi!

¹³Usimnyime mtoto mapigo!

ukimpiga kwa fimbo, hatakufa.

¹⁴Wewe ukimpiga kwa fimbo

utaiokoa roho yake kuzimuni.

¹⁵Mwanangu, moyo wako ukierevuka kweli,

moyo wangu mimi utafurahi nao.

¹⁶Maini yangu yatashangilia,

midomo yako ikisema yanyokayo.

¹⁷Moyo wako usione wivu kwa ajili ya wakosaji,

ila kaa tu na kumcha Bwana siku zote!

¹⁸Kwani yote yako na mwisho wao,

lakini kingojeo chako hakitaangamia.

¹⁹Wewe mwanangu, sikiliza, uereuke kweli,

kauongoze moyo wako katika njia hii!

²⁰Usiwe mwenzao wanywaji wa mvinyo,

wala wao walao nyama kwa ulafi!

²¹Kwani mnywaji na mlafi watachukuliwa mali zao,

kwani usingizi mwingi huvika watu vitambaa vichakavu.

²²Msikie baba yako aliyekuzaa!

Usimbeze mama yako, akiwa mzee!

²³Inunue kweli! Lakini usiiuze tena!

Hata werevu wa kweli na usikivu na utambuzi!

²⁴Babake mwana mwongofu hupiga shangwe nyingi,

aliyezaa mwana mwerevu wa kweli humfurahia.

²⁵Naye baba yako na mama yako na wakufurahie hivyo,

yeye aliyekuzaa na apige shangwe!

²⁶Mwanangu, nipe moyo wako,

njia zangu ziyapendeze macho yako!

²⁷Kwani mwanamke mgoni ni shimo refu sana,

naye aliye mwanamke wa mwingine ni kisima chembamba.

²⁸Naye huotea kama mpokonyi,

awaongoze kuwa wengi, wao wavunjao maagano kwa watu.

²⁹Ni nani aliaye? Ni nani apigaye kite?

Ni nani apatwaye na magomvi? Ni nani aombolezaye?

Ni nani ajiumizaye bure? Ni nani aliye na macho mekundu?

³⁰Ndio wao wanaokunywa mvinyo usiku kucha,

ndio wao watembeao kutafuta vileo vikali.

³¹Usiitazame mvinyo, jinsi wekundu wake unavyopendeza,

jinsi inavyometuka katika bilauri, inavyozidi utamu, ukiinywa!

³²Mwisho huuma kama nyoka,

huchoma kama pili;

³³ndipo, macho yako yatakapoona mambo mageni,

nao moyo wako utakaposema mapotovu;

³⁴nawe utakuwa kama mtu alalaye chini baharini,

au kama mtu alalaye pembeni juu ya mlingoti;

³⁵utasema: Walinipiga, lakini sikuumia,

walinichapa, lakini sikusikia.

Nitaamka lini? Ndipo, nitakapokwenda kuitafuta tena.