Mifano 24

Vumilia na kupatana!

¹Usione wivu kwa ajili ya watu wabaya,

wala usitamani kuwa mwenzao!

²Kwani mioyo yao huwaza mwangamizo,

nayo midomo yao husema makorofi.

³Nyumba hujengwa kwa werevu wa kweli

ikishikizwa kwa utambuzi.

⁴Kwa ujuzi vyumba vyake hujazwa

vitu vyote vyenye kima vipendezavyo.

⁵Mtu mwerevu wa kweli ni mwenye nguvu,

naye mwenye ujuzi huzidisha uwezo.

⁶Kwani kwa kuzitumia akili utapiga vita,

wokovu nao huja kwa kupiga mashauri yaliyo mema.

⁷Werevu wa kweli humkalia mjinga juu sana, asiufikie,

hakifunui kinywa chake mlangoni penye mashauri.

⁸Awazaye kufanyia wengine mabaya tu

huitwa mtunga maovu.

⁹Mawazo ya mjinga ni ya ukosaji,

naye mfyozaji huwatapisha watu.

¹⁰Ukilegea siku ya kusongwa,

nguvu zako ni chache.

¹¹Waponye wanaopelekwa kuuawa,

nao wanokumbwakumbwa kwenda kuchinjwa sharti uwaopoe!

¹²Ukisema: Hatukuyajua,

je? Yeye aijaribuye mioyo haitambui?

Je? Yeye ailindaye roho yako haijui?

Naye ndiye atakayemlipisha kila mtu matendo yake.

¹³Mwanangu, ule asali, kwani ni njema,

ile asali iliyo safi yenyewe, kwani ni tamu, ukiitia kinywani.

¹⁴*Nao werevu wa kweli uujue, ya kuwa ni utamu wa roho;

ukiupata, basi, mwisho utafanikiwa,

nacho kingojeo chako hakitang'oleka.

¹⁵Wewe usiyemcha Mungu, usiotee penye kao la mwongofu,

wala usipabomoe pake pa kulalia!

¹⁶Kwani mwongofu akianguka mara saba huinuka,

lakini wasiomcha Mungu hujikwaza penye mabaya.

¹⁷Mchukivu wako akianguka, usifurahi,

wala moyo wako usipige shangwe, akijikwaa.

¹⁸Bwana asivione, maana ni vibaya machoni pake,

akaacha kumtolea yule makali yake.

¹⁹Usijichafushe moyo kwa ajili yao watendao mabaya

wala usiwaonee wivu wasiomcha Mungu!

²⁰Kwani mwisho wake mbaya hautakuwa mwema,

nazo taa zao wasiomcha Mungu huzimika.*

²¹Mwanangu, mwogope Bwana, hata mfalme!

Usifanye bia nao wanaoigeuzageuza mioyo!

²²Kwani mara utatokea mwangamizo wao,

tena yuko nani ajuaye, mabaya yatakapowapata nyote wawili?

Upendeleo haufai kabisa shaurini.

²⁴Amwambiaye mkosaji: Hukukosa,

ndiye, makabila ya watu watakayemwapiza,

koo zote watamtakia mabaya.

²⁵Lakini wao wanaomchapa hupendeza,

mbaraka ya kuwapatia mema huwajia.

²⁶Kama mwenye kunonea midomo ya mwingine alivyo,

ndivyo, alivyo mtu ajibuye maneno yaliyo sawa.

²⁷Fanya kazi zako za huko nje, kajitengenezee mashamba yako,

kisha jijengee nyumba yako!

²⁸Usiwe shahidi ya kumshinda mwenzio bure!

Je? Huko hutadanganya kwa midomo yako?

²⁹Usiseme: Kama alivyonitendea mimi, ndivyo, nitakavyomtendea naye,

nitamlipisha kila mtu matendo yake.

³⁰Nilipopita penye shamba la mvivu

napo penye mizabibu ya mtu aliyepotelewa na akili,

³¹nikapaona, pote palikuwa miiba tu,

pote palikuwa pamefunikwa na viwawi,

nacho kitalu chake cha mawe kilikuwa kimebomoka.

³²Nilipoyaona nikayashika na kuyaweka moyoni mwangu mimi,

niyatumie ya kunionya.

³³Ukitaka kulala bado kidogo na kupumzika bado kidogo

na kukunja mikono kitandani bado kidogo,

³⁴kisha umaskini wako utakujia na kupiga mbio

pamoja na ukosefu ulio kama mtu aliyevaa mata.