Mifano 25

Macheo ya kweli ni mshahara wa werevu wa kweli.

²Utukufu wake Mungu ni kufunika jambo,

utukufu wao wafalme ni kufunua jambo.

³Kama mbingu zilivyoko juu, kama nchi ilivyoko nako kuzimuni,

ndivyo, mioyo ya wafalme inavyotushinda, isichunguzike.

⁴Mtu akiondoa mitapo katika fedha

hutengeneza chombo kinachomfaa mwenye kuyeyusha.

⁵Mtu akimwondoa asiyemcha Mungu machoni pake mfalme,

kiti chake cha kifalme hupata nguvu kwa wongofu.

⁶Usijitukuze mbele ya mfalme,

wala usisimame mahali, wakuu walipo!

⁷Kwani kuambiwa: Sogea hapa mbele! ni kwema

kuliko kunyenyekezwa penye macho ya mkuu yaliyokutazama.

⁸Usitokee upesi kugombana na mtu!

Kwani mwisho utafanya nini, mwenzio akikutia soni?

⁹Kama yako ya kupigania na mwenzio, yapiganie!

Lakini usifunue shauri la njama ya mwingine,

¹⁰mtu aisikiaye asikuapize,

uchongezi wako ukakurudia.

¹¹Kama machunguwa yaliyomo katika vyano vya fedha yalivyo,

ndivyo, lilivyo neno linalosemwa papasapo.

¹²Kama pete ya dhahabu na mkufu wa dhahabu tupu wa shingoni

ni maonyo ya mwerevu wa kweli yakiingia katika sikio lisikialo.

¹³Kama baridi ya theluji inavyofurahisha siku ya mavuno,

ndivyo, mjumbe mwelekevu anavyowafurahisha waliomtuma

kwani huzituliza roho za mabwana zake.

¹⁴Mawingu na upepo pasipo mvua

ni mtu ajivuniaye vipaji vya uwongo, asivyovitoa.

¹⁵Kwa uvumilivu hushindwa naye mwamuzi

nao ulimi mwororo huvunja mifupa.

¹⁶Kama umeona asali, ule na kuipima,

usije kuitapika, kama ulijishibisha sana!

¹⁷Kawilia kuingia nyumbani mwa mwenzio,

usije kumchokesha, akakuchukia.

¹⁸Nyundo ipondayo na upanga na mshale mkali

ni mtu amshuhudiaye mwenziwe ushahidi wa uwongo.

¹⁹Jino livunjikalo na mguu utegukao

ni kumwegemea mtu avunjaye maagano siku ya masongano.

²⁰Avuaye nguo siku ya baridi, au siki itiwayo katika magadi

ni mtu amwimbiaye mwenziwe nyimbo, moyo wake ukiwa mzito.

²¹Mchukivu wako akiwa ana njaa, mpe chakula!

Akiwa ana kiu, mpe cha kunywa!

²²Kwani hivyo utampalia makaa ya moto kichwani pake,

naye Bwana atakulipa hayo.

²³Upepo wa kaskazini huleta mvua,

nao ulimi usingiziao hukasirisha nyuso.

²⁴Kukaa darini pembeni ni kwema

kuliko kukaa na mwanamke mgomvi katika nyumba moja.

²⁵Kama maji ya baridi, roho iyatweteayo,

ni habari njema itokayo katika nchi ya mbali.

²⁶Kama chemchemi ivurugikavyo au kama kisima kiharibikacho

ni mwongofu atukutikaye machoni pake asiyemcha Mungu.

²⁷Kula asali nyingi hakufai,

lakini kuyachunguza mambo mazito huleta macheo.

²⁸Kama mji uliobomolewa kwa kukosa ukuta wa boma ulivyo,

ndivyo, alivyo mtu asiyejua kuiangalia roho yake.