Mifano 26

Wajinga na wavivu na waongo hawaheshimiwi.

¹Kama theluji isivyopatana na kiangazi,

kama mvua isivyopatana na mavuno,

ndivyo, macheo yasivyopatana na mpumbavu.

²Kama ndege anavyojiendea tu, kama kinega anavyoruka,

ndivyo, kiapizo cha bure kilivyo, hakimfikii aapizwaye.

³Mjeledi humpasa farasi, nayo hatamu humpasa punda;

ndivyo, fimbo inavyoipasa migongo ya wapumbavu.

⁴Usimjibu mpumbavu na kuufuata ujinga wake,

usije nawe mwenyewe kufanana naye!

⁵Tena umjibu mpumbavu na kuufuata ujinga wake,

asijiwazie mwenyewe kuwa mwerevu wa kweli!

⁶Mwenye kujikata miguu au mwenye kujinywesha makorofi

ni mtu apelekaye habari kwa kutuma mpumbavu.

⁷Kama miguu ya kiwete isivyotumika,

ndivyo, fumbo lilivyo kinywani mwa wapumbavu.

⁸Kama kutupa kifuko cha vito katika chungu ya mawe kulivyo,

ndivyo, kumpa mpumbavu macheo kulivyo.

⁹Mwiba uliochoma mkono wa mlevi

ni fumbo lililomo vinywani mwa wapumbavu.

¹⁰Fundi hutengeneza yote mwenyewe,

lakini mpumbavu atafutaye watu wa mshahara

huwapa kazi ya mshahara walio wapitaji tu.

¹¹Kama mbwa anavyoyarudia matapiko yake,

ndivyo, mpumbavu anavyoufanya ujinga wake mara ya pili.

¹²Kama unaona mtu aliye mwerevu wa kweli machoni pake mwenyewe,

basi, mpumbavu hutegemeka kuliko huyo.

¹³Mvivu husema: Simba yuko njiani,

kweli simba yuko barabarani katikati.

¹⁴Mlango hupinduka kwa bawaba zake,

naye mvivu hujipindua kitandani pake.

¹⁵Mvivu akiutia mkono wake katika bakuli

hushindwa kuurudisha kinywani mwake.

¹⁶Mvivu ni mwerevu wa kweli machoni pake

kuliko watu saba wanaojua kujibu vizuri.

¹⁷Akamataye masikio ya mbwa apitaye

ni mtu ajitiaye katika magomvi yasiyo yake.

¹⁸Kama mwenye wazimu alivyo

atupaye mishale yenye moto ya kuua watu,

¹⁹ndivyo, alivyo mtu amdanganyaye mwenziwe,

akasema: Je? Mimi sikumchekesha tu?

²⁰Kwa kukosa kuni moto huzimika,

vivyo kwa kukosa msingiziaji ugomvi hukoma.

²¹Makaa hufaa juu ya makaa yawakayo, nazo kuni hufaa motoni;

ndivyo, mtu mgomvi anavyofaa kuchochea magomvi.

²²Maneno ya msingiziaji ni kama vyakula vya urembo

vinavyoshuka kuingia tumboni ndani.

²³Kama fedha zenye mitapo zilizobandikwa juu ya kigae

ni midomo isemayo maneno yapendezayo sana, moyo ukiwa mbaya.

²⁴Kwa maneno ya modomo yake mchukivu hujificha,

namo moyoni mwake umo udanganyifu, alioutia humo.

²⁵Akisema maneno mazuri mno, usimtegemee!

Kwani moyoni mwake yamo matapisho saba.

²⁶Uchukivu hujificha katika ujanja,

lakini shaurini ubaya wake huumbuliwa.

²⁷Achimbaye mwina hutumbukia mwenyewe mle ndani,

naye aporomoshaye jiwe hupondwa nalo.

²⁸Ulimi wenye uwongo huwachukia, uliowaumiza,

nacho kinywa kisemacho mororo huangamiza.