Vijana sharti wafuate mafundisho yenye ujuzi.

¹Wanangu, sikieni, baba akiwakanya!

Yategeni masikio, myajue yenye utambuzi!

²Kwani ninawapa ninyi mafundisho mema:

maonyo yangu msiyaache!

³Kwani nami nilipokuwa mwana wa baba yangu,

mtoto mnyonge aliyependwa sana na mama kwa kuwa wa pekee,

⁴baba alinifundisha, akaniambia:

Moyo wako sharti uyashike sana maneno yangu,

uyaangalie maagizo yangu! Ndipo, utakapopata uzima.

⁵Jipatie werevu wa kweli! Jipatie nao utambuzi!

Usiusahau! wala usiyageukie mgongo maneno ya kinywa changu!

⁶Usiuache! Ndipo, nao utakapokuangalia;

uupende! Ndipo, nao utakapokulinda.

⁷Mwanzo wa werevu wa kweli ndio huu: jipatie werevu wa kweli!

Jipatie utambuzi kwa kuyatoa mapato yako yote!

⁸Uutukuze! Ndipo, nao utakapokutukuza,

utakupatia macheo, ukiukumbatia.

⁹Kichwa chako utakivika kilemba kipendezachao,

utakugawia taji yenye utukufu.

¹⁰Sikia, mwanangu, uyapokee maneno yangu!

Ndipo, miaka yako ya kukaa uzimani itakapokuwa mingi.

¹¹Nimekuongoza katika njia ya werevu wa kweli,

nikakuendesha katika mapito yanyokayo;

¹²ukiyashika, nyayo zako hazitasongeka,

hata utakapopiga mbio hutajikwaa.

¹³Yashike kwa nguvu mafundisho yakuonyayo, usiyaache kabisa!

Yalinde, kwani ndiyo yaliyo uzima wako.

¹⁴Mapito yao wasiomcha Mungu usiyakanyage!

Wala usitembee katika njia ya wabaya!

¹⁵Ondoka hapo, ilipo, usiifuate!

Epuka hapo, ilipo, upapite!

¹⁶Kwani hawawezi kulala wasipokwisha kufanya mabaya;

usingizi huwapotelea, wasipokwisha kukwaza mtu.

¹⁷Kwani vilaji, wanavyovila, ni vya kumbeza Mungu,

nayo mvinyo, wanayoinywa, ni yenye makorofi.

¹⁸Lakini mapito ya waongofu huwa kama mwanga wa kucha,

huendelea ukiangaza, hata mchana wenyewe utimie.

¹⁹Njia yao wasiomcha Mungu huwa kama giza lenyewe,

wasijue, kama ni kitu gani kiwakwazacho.

²⁰Mwanangu, yasikilize maneno yangu

Yategee sikio, ninayokuambia!

²¹Usiyaache, yatoweke machoni pako!

Yaangalie moyoni mwako ndani!

²²Kwani hayo ndio uzima wao wayapatao,

tena ni dawa ya miili yao wote.

²³Kuliko yote, unayoyaanglia, ulinde moyo wako!

Kwani humo ndimo, uzima unamotoka.

²⁴Ondoa kwako upotovu wa kinywa,

ukiiepusha midomo yako kwenye mambo yasiyonyoka!

²⁵Yaelekeze macho yao kuyatazama yaliyoko mbele,

kope zako nazo ziyaelekee sawasawa yaliyoko mbele yako!

²⁶Miguu yako ishikishe mapito yaliyo malinganifu,

njia zako zote ziwe zimeshupaa!

²⁷Usigeukie kuumeni wala kushotoni,

upate kuiondoa miguu yako penye mabaya!