Jinsi majaribu ya uzinzi yanavyoponza watu.

¹Mwanangu, yaangalie maneno yangu,

uyashike sana maagizo yangu moyoni mwako!

²Yaangalie maagizo yangu! Ndipo, utakapopata uzima;

yaangalie maonyo yangu, kama unavyoangalia mboni ya jicho lako!

³Yafunge vidoleni pako,

tena yaandike katika kibao cha moyo wako!

⁴Uuambie werevu wa kweli: Wewe ndiwe umbu langu,

utambuzi nao uuite: Mpendwa wa kujuana naye!

⁵Ukuanglie, usitazame mwanamke mgeni,

wala usiyasikilize maneno yatelezayo ya mke wa mwingine!

⁶Kwani dirishani nyumbani mwangu

siku moja nilipochungulia penye vyuma vyake,

⁷niliwatazama wajinga, nikaona kijana mmoja aliyepotelewa na akili,

nikamtambua katikati yao wasioyajua bado mambo hayo.

⁸Alitembea barabarani hapo pembeni, yule alipokaa,

akaishika njia ya kutembea penye nyumba yake;

⁹ikawa jioni, jua lilipokwisha kuchwa,

hata ikawa usiku wa manane penye giza.

¹⁰Mara mwanamke anakuja kukutana naye,

alivaa nguo kama mgoni, nao moyo wake ulikuwa mdanganyifu.

¹¹Anapiga kelele pasipo kujizuia,

miguu yake haipendi kukaa nyumbani mwake;

¹²mara moja yuko barabarani, mara nyingine yuko uwanjani,

huvizia po pote penye njia panda.

¹³Basi, huyu akamshika, akamnonea,

akaushupaza uso wake akamwambia:

¹⁴Sina budi kutoa kipaji cha tambiko cha shukrani,

leo hivi ninavilipa viapo vyangu.

¹⁵Kwa hiyo nimetoka nyumbani, nikutane na wewe,

nikauchungulia uso wako, mpaka nikakuona.

¹⁶Kitanda changu nimekitandika mazulia

na mablanketi mororo yenye rangi ya Kimisri.

¹⁷Pangu pa kulalia nimepamwagia manukato,

manemane na liwa na dalasini.

¹⁸Haya! Njoo, tulileweshe na kukumbatiana hata asubuhi

tukifurahishana kwa mapendano!

¹⁹Kwani mume hayumo nyumbani mwake,

amekwenda safari, yuko mbali;

²⁰akachukua mfuko wa fedha mkononi mwake,

siku ya mwezi mpevu atarudi nyumbani mwake.

²¹Hivyo ndivyo, alivyomshinda kwa maneno yake mengi yatelezayo,

akamwangusha kwa huo utelezi wa midomo yake.

²²Mara akamfuata kama ng'ombe aendaye kuchinjwa,

kama mwenye wazimu aendaye kufungwa kwa kongwa,

²³mpaka mshale uyachome maini yake;

ni kama ndege akimbiliaye tanzi

pasipo kujua, ya kuwa anakwenda kuuawa.

²⁴Sasa wanangu, nisikieni,

yategeeni maneno yangu masikio yenu!

²⁵Uangalie moyo wako, usizielekee njia zake,

nawe usije kupotea penye mapito yake!

²⁶Kwani wengi aliwaangusha alipokwisha kuwatia vidonda,

wote waliouawa naye ni wengi sana.

²⁷Kuingia mwake ni kushika njia za kwenda kuzimuni

zitelemkazo kukufikisha penye vyumba vya kifo.