Werevu wa kweli unatualika.

¹Sikilizeni! Werevu wa kweli unawaita,

utambuzi nao unapaza sauti yake.

²Kileleni juu ya vilima, njia zinapofika,

penye njia panda ndipo, unaposimama.

³Napo penye malango ya kutokea mjini,

hata penye milango ya kuingia unatangaza kwamba:

⁴Ninyi waume ninawaita,

ninawapalizia sauti, ninyi wana wa Adamu.

⁵Msipojua kitu, utambueni ubingwa!

Nanyi wapumbavu itambueni mioyo!

⁶Sikilizeni! Kwani nitasema mambo makuu,

nikifumbua midomo yangu, yatatoka maneno yanyokayo.

⁷Kwani kinywa changu kitayatamka yaliyo ya kweli,

maneno yasiyomcha Mungu huitapisha midomo yangu.

⁸Maneno yote ya kinywa changu yanaongoka,

hakuna hata moja lililopotoka la kudanganya watu.

⁹Yote pia humwelea mwenye utambuzi,

nao wenye ujuzi huona, ya kuwa yamenyoka.

¹⁰Yapokeeni mafunzo yangu, mwache fedha!

Maana ujuzi una kima kuliko dhahabu zilizochaguliwa.

¹¹Kwani werevu wa kweli ni mwema kuliko lulu,

nayo yote pia yapendezayo watu hayalingani nao.

¹²Mimi werevu wa kweli ninakaa pamoja na ubingwa,

nikapata kujua nayo mawazo ya moyo.

¹³Kumcha Bwana ni kuyachukia mabaya;

kujikuza kujivuna na kushika ufalme wao,

na kusema mapotovu ndiko, ninakochukia.

¹⁴Ninayo mashauri mema na ujuzi wa kweli,

tena ninao utambuzi na uwezo.

¹⁵Kwa msaada wangu wafalme hushika ufalme wao,

nao wakuu hutoa maongozi yaongokayo.

¹⁶Kwa msaada wangu watawalaji hutawala,

nao mabwana wakubwa na waamuzi wote wa nchi.

¹⁷Wanipendao ninawapenda,

nao wanitafutao kwa bidii toka asubuhi huniona.

¹⁸Mali na macheo ninayo,

hata malimbiko yenye utukufu na mtendo yaongokayo.

¹⁹Mazao yangu ni mema kuliko dhahabu,

ijapo ziwe zimetakata sana;

mtu anayoyapata kwangu ni mema

kuliko fedha zilizochaguliwa.

²⁰Ninashika njia iongokayo,

nikapitia katikati palipo sawa,

²¹niwapate mali wao wanipendao

na kuzijaza vyanja vyao.

²²Bwana aliniumba, niwe mwanzo wa njia yake,

hapo kale kabisa, alipokuwa hajatengeneza vingine;

²³nikawekwa kuwapo tangu kale, tangu mwanzo,

ulimwengu ulipokuwa haujawa bado.

²⁴Vilindi vilipokuwa havijawa bado, nilikuwa nimezaliwa,

nazo chemchemi zibubujikazo maji zilikuwa hazijawa bado.

²⁵Milima ilipokuwa haijawekewa misingi,

navyo vilima vilipokuwa havijawa bado, nilikuwa nimezaliwa.

²⁶Alipokuwa hajaiumba nchi na mbuga,

nao mwanzo wa mavumbi ulipokuwa haujawa bado,

²⁷alipozishikiza mbingu, ndipo, nilipokuwa naye,

ilikuwa hapo, alipoupima mviringo wake juu ya vilindi vya maji.

²⁸Alipoyashupaza mawingu huko juu,

visima vilivyoko vilindini viliposongana kwa nguvu,

²⁹alipoikatia bahari mipaka yake,

maji yake yasipite hapo, aliposema,

alipoishupaza nayo misingi ya nchi:

³⁰ndipo, nilipokuwa kwake kuzitazama kazi hizo,

nikawa mwenye furaha siku kwa siku

nikicheza mbele yake siku hizo zote.

³¹Nikacheza katika nchi yake, ilipokaa watu,

nikawafurahia hao watu.

³²Sasa wanangu, nisikilizeni!

Wenye shangwe ndio wazishikao njia zangu.

³³Yasikieni mafunzo, mpate kuerevuka kweli!

Msiyaache kabisa!

³⁴Mwenye shangwe ni mtu anisikiaye,

alalaye macho siku kwa siku penye malango yangu.

³⁵Kwani aliyenipata mimi amekwisha kupata uzima,

tena huona upendeleo kwake Bwana.

³⁶Lakini asiyenipata mimi huikorofisha roho yake mwenyewe,

kwani wote wanichukiao hupenda kufa.