Werevu na ujinga wanawaalika watu.

¹*Werevu wa kweli ulijenga nyumba yake,

ukazichonga nguzo zake saba.

²Ukachinja nyama wake, ukaziandalia mvinyo zake,

ukatandika nayo meza yake.

³Kisha ukatuma vijakazi wake kualika wageni

mjini po pote palipoinukia kwamba:

⁴Aliye mjinga aje kuingia humu!

Nao wasiojua kitu ukawaambia:

⁵Njoni, mle vilaji vyangu!

Nyweni nazo mvinyo, nilizoziandalia!

⁶Ninyi wajinga, uacheni ujinga, mpate uzima,

mwendelee katika njia ya utambuzi!

⁷Amkanyaye mfyozaji hujipatia matusi,

naye aonyaye mtu asiyemcha Mungu hutiwa soni naye.

⁸Usimwonye mfyozaji, asikuchukie!

Mwonye mwerevu wa kweli naye atakupenda.

⁹Aliye mwerevu wa kweli mwerevushe,

ndipo, atakapoendelea kuerevuka zaidi.

Aliye mwongofu mfunze!

Ndipo, atakapoendelea kujipatia ujuzi.

¹⁰Kumcha Bwana ndio mwanzo wa werevu wa kweli,

tena kumjua Mtakatifu ndio ujuzi.*

¹¹Kwani kwa msaada wangu siku zako zitakuwa nyingi,

nayo miaka yako ya kukaa mwenye uzima itaongozeka.

¹²Ukiwa umeerevuka kweli, umejipatia mapato ya werevu wa kweli;

ukiwa u mfyozaji, basi, utatwikwa peke yako huo mzigo wako.

¹³Mwanamke aitwaye ujinga hupiga kelele;

yeye aliye mjinga asiyejua maana ya kitu cho chote

¹⁴hukaa mlangoni pa nyumba yake katika kiti

mahali pa mjini panapoinukia,

¹⁵awaalike wote wapitao njiani

nao wanaokwenda katika njia zao zinyokazo,

¹⁶akisema: Aliye mjinga aje kuingia humu!

Nao wasiojua kitu huwaambia:

¹⁷Maji yaliyoibiwa ni matamu,

navyo vilaji vinavyoliwa na kufichaficha hupendeza!

¹⁸Naye mjinga hajui, ya kuwa ndiko, mizimu iliko,

ya kuwa wao walioalikwa naye hufika katika makorongo ya kuzimuni.