Kuutukuza ukuu na wema wake Mungu.

¹Na nikutukuze, Mungu wangu, uliye mfalme! Na nilisifu Jina lako kale na kale!

²Na nikusifu siku zote, nisikome kulishangilia Jina lako kale na kale!

³Bwana ni mkuu, hushangiliwa sana, ukuu wake hauchunguziki.

⁴Kizazi kinasifia kizazi kingine kazi zako na kuyatangaza matendo yako yaliyo makuu.

⁵Urembo na utukufu ndio mapambo yako, mambo yako ya kustaajabisha na niyawaze moyoni!

⁶Watu na wayaongee ya nguvu zako yaogopeshayo, na niyasimulie matendo yako yaliyo makuu!

⁷Na waukumbuke wema wako mwingi, wautangaze, nao wongofu wako waupigie vigelegele!

⁸Bwana ni mwenye utu na mwenye huruma, tena ni mwenye uvumilivu na mwenye upole mkubwa.[#Sh. 103:8; 2 Mose 34:6.]

⁹Bwana huwaendea wote kwa kuwa mwema, yote aliyoyafanya huyaonea uchungu.[#Rom. 11:32.]

¹⁰Bwana, kazi zako zote na zikushukuru, nao wakuchao na wakutukuze!

¹¹Utukufu wa ufalme wako na wauongee! Na wasimuliane matendo yako yaliyo makuu!

¹²Hayo matendo yako makuu na wayajulishe wana wa watu, hata utukufu na urembo wa ufalme wako![#Sh. 145:5.]

¹³Ufalme wako ni ufalme wa siku zote za kale na kale, nao ubwana wako ni wa vizazi vyote kwa vizazi na vizazi.

¹⁴Bwana huwashikiza wote waangukao, huwainua wote walioinamishwa.[#Sh. 146:8; Luk. 1:52.]

¹⁵*Macho yao wote hukutazamia, nawe huwapa vilaji vyao, wanapoona njaa.[#Sh. 104:27-28; 136:25.]

¹⁶Unapokifumbua kiganja chako, huwashibisha wote waliopo, wapendezwe.[#Sh. 147:9.]

¹⁷Katika njia zake zote Bwana ni mwongofu, katika kazi zake zote ni mwenye upole.[#5 Mose 32:4.]

¹⁸Bwana yuko karibu kwao wote wamwitao, kwao wote watakaomwita kwa ukweli.

¹⁹Huyafanya yawapendezayo wamwogopao, huyasikia malalamiko yao, wakimlilia, huwaokoa.[#Fano. 10:24.]

²⁰Bwana huwalinda wote wampendao, lakini wote wasiomcha atawaishiliza.

²¹Kinywa changu sharti kiseme sifa za Bwana! Wote wenye miili ya kimtu sharti walitukuze Jina lake takatifu pasipo kukoma kale na kale!*