Mema, wabaya wayapatayo, hayakai; mema ya kweli ndiyo, waongofu wayapatayo.

¹Kwa ajili yao watendao mabaya usijichafushe moyo, wala wafanyao mapotovu usiwaonee wivu![#Fano. 24:19.]

²Kwani hunyauka upesi kama majani, kama machipuko mazuri ya uwandani watakauka.

³Mwegemee Bwana, ufanye mema! Kaa katika nchi, ujilishe mambo yaelekeayo![#Sh. 37:27,29.]

⁴Furaha zilizoko kwake Bwana na zikutoshe! Naye ndiye atakayekupa, moyo wako uyatakayo.

⁵Acha, Bwana akuchagulie njia, utakayoishika! Mwegemee tu, yeye atafanya![#1 Petr. 3:7.]

⁶Atautokeza wongofu wako, uwe kama mwanga; nayo mashauri yako yataangazika kama jua la mchana.[#Sh. 97:11; 112:4; Iy. 11:17.]

⁷Mnyamazie Bwana na kumngoja! Mwenzio akiona mema njiani, usiwake moto, ijapo awe mtu afanyaye madanganyo![#Sh. 73:3.]

⁸Tuliza ukali, uache kufoka! Usiwake moto, usije kukukosesha!

⁹Kwani wafanyao mabaya watang'olewa, lakini wao wamngojeao Bwana wataitwaa nchi.[#Sh. 37:11,22,29,34; Mat. 5:5.]

¹⁰Bado kidogo asiyemcha Mungu atakuwa hayupo tena; hapo, utakapopachungulia mahali pake, patakuwa hapapo.[#Sh. 37:35.]

¹¹Lakini wapole ndio watakaoitwaa nchi, kwa kupata matengemano mengi furaha zitawatosha.[#Sh. 37:9; Mat. 5:5.]

¹²Asiyemcha Mungu huwaza, jinsi atakavyomponza mwongofu, hukereza meno yake kwa ajili yake yeye.

¹³Lakini Bwana humcheka kwa kupaona, siku yake itakapofika.[#Iy. 18:20.]

¹⁴Wasiomcha Mungu huchomoa panga na kuzipinda pindi zao, wapate kuwaangusha walio wanyonge na wakiwa, nao wafuatao njia zinyokazo wawachinje.[#Sh. 11:2.]

¹⁵Lakini panga zao zitaichoma mioyo yao wenyewe, nazo pindo zao zitavunjika.

¹⁶Mema machache ya mwongofu ni mali, nazo zinapita mafuriko mengi yao wasiomcha Mungu.[#Fano. 15:16.]

¹⁷Kwani mikono yao wasiomcha Mungu itavunjwa, lakini wao walio waongofu Bwana huwashikiza.

¹⁸Bwana huzijua siku zao wamchao, nayo mafungu yao yatakuwapo kale na kale

¹⁹Siku zitakapokuwa mbaya, hawatatwezeka, ila watashiba vema nazo siku za njaa.[#Sh. 33:19.]

²⁰Kwani wasiomcha Mungu wataangamia, nao wamchukiao Bwana watatoweka, kama uzuri wa majani ya uwandani unavyotoweka; watatoweka kweli kama moshi.[#Sh. 68:3.]

²¹Asiyemcha Mungu hukopa, asiweze kulipa; mwongofu huweza kugawia na kuwapa watu.

²²Kwani wabarikiwao naye Bwana huitwaa nchi, lakini waapizwao naye watang'olewa.[#Mat. 25:34,41; Sh. 37:9.]

²³Mwendo wa mtu unashupazwa naye Bwana, akiwa anapendezwa na njia, yule anayoishika.

²⁴Kama anajikwaa, hataangushwa chini, kwani Bwana humshika mkono wake.[#Fano. 24:16.]

²⁵Nalikuwa kijana, nikaja kuwa mzee, lakini sijaona bado mwongofu aliyeachwa peke yake, wala watoto wake wakiombaomba chakula.[#Sh. 34:10-11.]

²⁶Kila siku anaweza kugawia wengine, hata kuwakopesha, nao watoto wake hubarikiwa.

²⁷Ondoka pabaya ufanye mema! Ndivyo, utakavyokaa kale na kale.[#Sh. 34:15.]

²⁸Kwani Bwana huyapenda yaongokayo, hatawaacha kabisa wao wamchao, watakuwa wamelindwa kale na kale, lakini watoto wao wasiomcha watang'olewa.[#Sh. 11:7.]

²⁹Walio waongofu wataitwaa nchi, wakae humo kale na kale.[#Yes. 60:21.]

³⁰Kinywa chake mwongofu hueleza yenye werevu wa kweli, ulimi wake husema yaongokayo.

³¹Maonyo ya Mungu wake yamo moyoni mwake, kwa hiyo hatikisiki atakapokwenda pote.[#Sh. 40:9.]

³²Asiyemcha Mungu humwotea mwongofu akitafuta kumwua.[#Sh. 10:8-10.]

³³Lakini Bwana hatamwacha mkononi mwake; hata akihukumiwa naye yule, hatamhesabu kuwa mbaya.[#Sh. 34:22.]

³⁴Ishike njia yake Bwana na kumngojea! Ndipo, atakapokukweza, uitwae nchi; nako kung'olewa kwao wasiomcha utakufurahia.[#Sh. 37:9.]

³⁵Nimeona mtu asiyemcha Mungu, akawa mkorofi, akawa mnene sana kama mtamba wenye majani mengi.[#Iy. 5:3-5; 20:6-7; Ez. 31:3-14.]

³⁶Lakini nilipomtazama, siku zilipopita, alikuwa hayupo, nikamtafuta, lakini hakuoneka.[#Sh. 37:10.]

³⁷Jilinde, ukae na kumcha Mungu, uyatazamie yanyokayo! Kwani mtu aliye hivyo mwisho hutengemana.[#1 Mose 39:8-9.]

³⁸Lakini wapotovu huangamizwa wote pamoja, mwisho wao wasiomcha Mungu ni kung'olewa.

³⁹Wokovu wao waongofu hutoka kwake Bwana, yeye ni nguvu yao siku, wanaposongeka.[#Sh. 46:2.]

⁴⁰Bwana huwasaidia na kuwaopoa, huwaopoa mikononi mwao wasiomcha Mungu; kwa kuwa humkimbilia, huwaokoa.[#Luk. 18:7-8.]