Kuwa na Mungu kunapita mengine yote.

¹Mungu, wewe u Mungu wangu, ninakutafuta mapema; roho yangu ina kiu ya kunywea kwako, nazo nyama za mwili wangu zinakutunukia sana, hapa katika nchi kavu ichokeshayo kwa kuwa pasipo maji.[#1 Sam. 22:5; 23:14; 24:1; Sh. 42:3; 143:6.]

²Hivyo ndivyo, nilivyokutazamia Patakatifu pako, niione nguvu yako na utukufu wako.

³Kwani upole wako ni mwema kuliko uzima; kwa hiyo midomo yangu sharti ikusifu.

⁴Hivyo nitakutukuza siku zangu zote, nitakazokuwapo, Jina lako nitaliinulia mikono yangu.

⁵Hivi vinaishibisha roho yangu kama kiini cha mafuta, midomo yangu ikikupigia vigelegele, kinywa changu kikikushangilia.

⁶Ninapokwenda kulala ninakukumbuka, napo ninapoamka ninayawaza mambo yako.

⁷Kwani wewe ndiwe uliyenisaidia, namo kivulini mwa mabawa yako ninapiga shangwe.

⁸Roho yangu inagandamana nawe wewe, mkono wako wa kuume ukanishikiza.

⁹Lakini wao wanaoitafuta roho yangu, waiangamize, sharti washuke kuzimuni huko ndani ya nchi.

¹⁰Watu watawatoa, wauawe kwa ukali wa panga, kisha watakuwa chakula chao mbwa wa mwitu.

¹¹Lakini mfalme atafurahia kuwa wake Mungu, wote wamwapiao yeye watashangilia, kwani vinywa vyao wasemao uwongo vitafumbwa.