Ufunuo 2

Barua kwa wateule wa Efeso.

¹Malaika wa wateule walioko Efeso mwandikie: Ndivyo, anavyosema yeye anayezishika zile nyota saba mkononi mwake mwa kuume, anayekwenda katikati ya zile taa saba za dhahabu:[#Ufu. 1:13,16,20.]

²Nayajua matendo yako na usumbufu na uvumilivu wako; nakujua: huwezi kuwavumilia waovu, ukawajaribu wale wanaojisema kuwa mitume, lakini sio mitume; nawe uliwaona kuwa waongo.[#Ufu. 2:9,13,19; 3:1; 8:13; 1 Yoh. 4:1.]

³Ukavumilia ulipoumizwa kwa ajili ya Jina langu, hukuchoka.

⁴Lakini ninakuonya, ya kuwa umeuacha upendo wako wa kwanza.

⁵Kumbuka, uliyoyapoteza ulipoanguka! Kisha juta, uyafanye yale matendo ya kwanza! Usipoyafanya, nitakujia, niiondoe taa yako mahali pake, ukiwa hukujuta.[#Ufu. 2:16,22; 3:3,19.]

⁶Lakini neno hili unalo, ya kuwa unayachukia matendo yao Wanikolai, ninayoyachukia hata mimi.[#Ufu. 2:15; Sh. 139:21.]

⁷Mwenye masikio na asikie, Roho anayowaambia wateule! Mwenye kushinda nitampa kula matunda ya mti wa uzima ulioko katika paradiso ya Mungu.[#Ufu. 2:11,17,26; 3:5,12,21; 22:2; 1 Mose 2:9; 3:22,24.]

Barua kwa wateule wa Simirna.

⁸*Malaika wa wateule walioko Simirna mwandikie: Ndivyo, anavyosema yeye aliye wa kwanza na wa mwisho, aliyekuwa amekufa, akapata kuishi tena:[#Ufu. 1:11,17,18.]

⁹Nayajua matendo na maumivu yako na umaskini wako, lakini u mwenye mali nyingi. Nakujua, unavyotukanwa nao wajisemao kuwa Wayuda, lakini sio, ila ni wanafuzi wake Satani.[#Ufu. 3:9; 2 Kor. 11:14-15; Yak. 2:5.]

¹⁰Usiyaogope, utakayoteswa! Tazama, Msengenyaji atawatia wengine wenu kifungoni, mpate kujaribiwa. Nanyi mtaumizwa siku kumi. Uwe mwelekevu mpaka kufa! Ndipo, nitakapokupa kilemba cha uzima.[#Ufu. 3:11; Mat. 10:28; 2 Tim. 4:8.]

¹¹Mwenye masikio na asikie, Roho anayowaambia wateule! Mwenye kushinda hatapotolewa na kufa kwa pili.*[#Ufu. 20:14.]

Barua kwa wateule wa Pergamo.

¹²Malaika wa wateule walioko Pergamo mwandikie: Ndivyo, anavyosema mwenye ule upanga mkali wenye makali pande mbili:[#Ufu. 1:16; Yes. 49:2; Ebr. 4:12.]

¹³Napajua, unapokaa. Ni hapo, kiti cha kifalme cha Satani kilipo. Lakini unalishika sana Jina langu, hukukana, ya kuwa unanitegemea mimi, hata siku zile, shahidi wangu mwelekevu Antipa alipouawa huko kwenu, Satani anakokaa.[#Ufu. 3:8; 13:2.]

¹⁴Lakini ninayokuonya, ni machache, ya kuwa unao kwako wanaoushika ufundisho wa Bileamu aliyemfundisha Balaka kukwaza wana wa Isiraeli, akiwafundisha kula nyama za tambiko na kufanya ugoni.[#4 Mose 31:16; Yuda 11.]

¹⁵Vivyo hivyo hata wewe unao wanaoyashika mafundisho ya Wanikolai yaliyo hivyo.[#Ufu. 2:6.]

¹⁶Sasa juta! Usipojuta, nitakujia upesi, nipigane nao kwa upanga uliomo kinywani mwangu.[#Ufu. 1:16.]

¹⁷Mwenye masikio na asikie, Roho anavyowaambia wateule! Mwenye kushinda nitamgawia ile Mana iliyofichwa, kisha nitampa kijiwe cheupe, namo katika kijiwe hiki limeandikwa jina jipya lisilojulika kwa mtu, asipokuwa mwenye kulipata.[#Ufu. 3:12; Sh. 78:24; Yes. 62:2.]

Barua kwa wateule wa Tiatira.

¹⁸Malaika wa wateule walioko Tiatira mwandikie: Ndivyo, anavyosema Mwana wa Mungu aliye mwenye macho yaliyo kama moto unaowaka, ambaye miguu yake imefanana na shaba nyekundu:[#Ufu. 1:14-15.]

¹⁹Nayajua matendo yako ya kupenda na ya kumtegemea Mungu na ya kutumikia na ya kuvumilia kwako. Tena najua: kazi zako za mwisho ni nyingi kuliko za kwanza.

²⁰Lakini ninakuonya, ya kuwa humkatai mwanamke Izebeli anayejisema kuwa mfumbuaji, akiwafundisha na kuwapoteza watumwa wangu, wafanye ugoni, tena wale nyama za tambiko.[#Ufu. 2:4; 1 Fal. 16:31; 2 Fal. 9:22.]

²¹Nimempa siku za kujuta, lakini hataki kujuta na kuuacha ugoni wake.

²²Tazama, nitambwaga kitandani, nao waliofanya naye ugoni vilevile, waumizwe sana, wasipojuta na kuyaacha matendo yake.

²³Hata watoto wake nitawaua, wafe. Ndipo, wateule wote watakaponitambua, ya kuwa mimi ni mwenye kuyapeleleza mafigo, hata mioyo. Nami nitawapa ninyi kila mmoja, kama matendo yenu yalivyo.[#Sh. 7:10; Yer. 17:10.]

²⁴Wengine wenu ninyi, mlioko Tiatira, msioyafuata hayo mafundisho, msiovitambua vilindi vya Satani, nawaambia ninyi kwa mfano: Siwatwiki mzigo wa wengine,

²⁵ila hicho, mlicho nacho, kishikeni, mpaka nitakapokuja![#Ufu. 3:11.]

²⁶Mwenye kushinda na kuzishika kazi zangu mpaka mwisho nitampa kuwa mkuu wa wamizimu;

²⁷naye atawachunga kwa fimbo ya chuma, awapondeponde kama vyungu vya udongo.[#Ufu. 12:5.]

²⁸Kama nami nilivyopewa na Baba yangu, nitampa naye nyota ya mapema.[#Sh. 2:8-9.]

²⁹Mwenye masikio na asikie, Roho anayowaambia wateule![#Ufu. 3:6,13,22.]