Ruti alipookoteza kwake Boazi anahurumiwa.

¹Kulikuwa na mtu aliyekuwa fundi wa vita mwenye nguvu, naye alijuana sana na mumewe Naomi, alikuwa wa mlango wa Elimeleki, jina lake Boazi.

²Ruti wa Moabu akamwambia Naomi: Na niende shambani kuokoteza masuke nikimfuata mtu, nitakayempendeza machoni pake. Akamwambia: Nenda, mwanangu!

³Akaenda, akaja kuokoteza shambani akiwafuata wavunaji. Ikatukia kwa bahati, lile fugu la shamba kuwa lake Boazi aliyekuwa wa mlango wa Elimeleki.

⁴Ndipo, Boazi alipokuja toka Beti-Lehemu, akawaambia wavunaji: Bwana awe nanyi! Wakamwitikia: Bwana akubariki!

⁵Boazi akamwuliza kijana aliyewasimamia wavunaji: Huyu kijana wa kike ni wa nani?

⁶Yule kijana aliyewasimamia wavunaji akamjibu akimwambia: Huyu ni kijana wa Kimoabu aliyerudi na Naomi, alipotoka kwenye mbuga za Moabu.

⁷Alituambia: Na niokoteze na kukusanyakusanya penye miganda nikiwafuata wavunaji. Basi, akaja, akashinda hapa tangu asubuhi mpaka sasa; sasa anapumzika kidogo pale penye dungu.

⁸Ndipo, Boazi alipomwambia Ruti: Sikia, mwanangu! Usiende kuokoteza shambani pengine, wala usiondoke hapa, fuatana tu na vijana wa kwangu!

⁹Elekeza macho tu shambani, wanapovuna, uwafuate! Nimewaagiza hawa vijana, wasikusumbue. Ukiona kiu, nenda tu kwenye vyombo vyao, kanywe vijana hawa waliyoyachota!

¹⁰Ruti akamwangukia usoni pake na kumwimamia hapo chini, akamwambia: Mbona nimekupendeza machoni pako, unionee mema? Nami ni mgeni.

¹¹Boazi akamjibu, akamwambia: Nimesimuliwa yote pia, uliyomfanyizia mkweo, mumeo alipokwisha kufa, ya kuwa umemwacha baba yako na mama yako na nchi, uliyozaliwa, ukaja kwa ukoo wa watu, usiowajua zamani zote.[#Ruti 1:16-17.]

¹²Bwana na akurudishie hayo matendo yako, upate mshahara wako wote mzima kwake Bwana Mungu wa Isiraeli, kwa kuwa umekuja kumkimbilia mabawani pake.

¹³Akamjibu: Kumbe nimekupendeza machoni pako, bwana wangu, ukanituliza moyo, ukaniambia maneno yaliyoingia moyoni mwa kijakazi wako, nami si kama mmoja wao hawa vijakazi wako!

¹⁴Saa wanapolia chakula, Boazi akamwambia: Karibu hapa, ule huku chakulani, nacho kitonge chako ukichovye hapa sikini! Akakaa kando ya wavunaji, naye akamgawia bisi, akala, hata akishiba, nyingine akazisaza.

¹⁵Alipoondoka kwenda kuokoteza, Boazi akawaagiza vijana wake kwamba: Hata katikati ya miganda na aokoteze, msimkaripie.

¹⁶Namo migandani mtoe mengine, myaache, aje kuyaokoteza, msimkaripie.[#3 Mose 19:9.]

¹⁷Akaokoteza shambani mpaka jioni, akayapura maokotezo yake, yakawa kama frasila ya mawele.

¹⁸Akayachukua, akaja mjini. Mkwewe alipoyaona hayo maokotezo yake, akayatoa nayo, aliyoyasaza hapo, alipokula na kushiba, akampa.

¹⁹Mkwewe akamwuliza: Umeokoteza wapi leo? Umekwenda wapi kufanya kazi? Aliyekuonea mema na abarikiwe! Akamsimulia mkwewe, kama ni nani, ambaye amezifanya kazi zake kwake, akasema: Jina la huyo mtu, ambaye nimezifanya leo kazi zangu kwake, ndiye Boazi.

²⁰Ndipo, Naomi alipomjibu mkwewe: Na abarikiwe na Bwana! Kwa kuwa hakuacha kuwatolea mema, wala wazima, wala wafu. Naomi akamwambia tena: Mtu huyo ni ndugu yetu, naye ni mmoja wa waingiliaji wetu.

²¹Ruti wa Moabu akamwambia: Tena ameniambia: Fuatana na hawa vijana wa kwangu, mpaka watakapoyamaliza mavuno yangu!

²²Naomi akamjibu mkwewe Ruti: Inafaa, mwanangu, ukitoka pamoja na vijakazi wake, wasikukaripie halafu shambani.

²³Basi, akafuatana na vijakazi wa Boazi kwenda kuokoteza, mpaka walipoyamaliza mavuno ya mawele na mavuno ya ngano; kisha akakaa kwa mkwewe.