Kutekwa kwa Demetrio

¹Katika mwaka wa mia moja sabini na mbili mfalme Demetrio alikusanya majeshi yake akaenda Umedi kujipatia msaada ili apigane na Trifoni.

²Arsake, mfalme wa Uajemi na Umedi, aliposikia kwamba Demetrio ameingia mipakani mwake, alituma kamanda mmoja amkamate mzima.

³Akaenda akalipiga jeshi la Demetrio, akamkamata, akamleta kwa Arsake, naye akamtia kifungoni.

Sifa ya Simoni

⁴Nchi ya Yuda ikakaa kwa amani siku zote za Simoni. Alilitafutia taifa mema, hata utawala wake na sifa yake iliwafurahisha siku zake zote.

⁵Jambo moja lililompatia sifa kubwa lilikuwa kuitwaa Yafa iwe bandari, na kuifanya kuwa mahali pa kuviingilia visiwa vya baharini.

⁶Aliipanua mipaka ya taifa lake

Na kuitawala nchi;

⁷Alikusanya mateka mengi,

Akamiliki Gazara, Bethsura na Ngomeni,

Akaitakasa ngome katika unajisi wake,

Wala hakuna mtu wa kumpinga.

⁸Walilima ardhi kwa amani,

Nchi ikatoa mazao yake,

Na miti ya bondeni matunda yake.

⁹Wazee waliketi njiani

Wakizungumza mambo mema ya kale,

Na vijana walijivika mavazi matukufu ya vita.

¹⁰Aliipatia miji chakula,

Na kutoa kwa wingi silaha za vita.

Sifa zake zilivuma hata miisho ya ulimwengu.

¹¹Alifanya amani katika nchi,

Israeli ikafurahi sana;

¹²Kila mtu alikaa chini ya mzabibu wake na mtini wake,

Wala hakuna wa kuwaogofya;

¹³Hakuna aliyebaki katika nchi kupigana nao;

Siku zile wafalme waliharibiwa.

¹⁴Alitia nguvu walioonewa katika watu wake.

Aliichungua sheria,

Akawaondoa waasi na waovu.

¹⁵Alipatukuza patakatifu,

Akaviongeza vyombo vya hekalu.

Maafikiano baina ya Simoni, Rumi na Sparta

¹⁶Habari za kufa kwake Yonathani zilipofika Rumi, na hata Sparta, walisikitika sana.

¹⁷Na mara waliposikia ya kuwa nduguye Simoni amekuwa kuhani mkuu mahali pake, akiitawala ile nchi na miji yake,

¹⁸walimwandikia juu ya vibao vya shaba kuyafanya tena yale mapatano ya urafiki ambayo walikuwa wamewathibitishia Yuda na Yonathani, ndugu zake;[#1 Mak 8:22]

¹⁹yakasomwa mbele ya mkutano Yerusalemu.

²⁰Hii ndiyo nakala ya barua waliyoileta Wasparta: Watawala wa Wasparta, na mji, kwa kuhani mkuu Simoni, na kwa wazee na makuhani na Wayahudi wengine, ndugu zetu, salamu.

²¹Wajumbe mliowatuma kwa watu wetu walituarifu habari za sifa yenu na utukufu wenu, nasi tulikufurahia kuja kwao.

²²Tumeyaandika maneno yao katika taarifa za mji kama hivi: Numenio mwana wa Antioko na Antipateri mwana wa Yasoni, wajumbe wa Wayahudi, wamekuja kwetu ili kufanya tena mapatano ya urafiki nasi.

²³Iliwapendeza watu kuwakaribisha watu hawa kwa heshima, na kutia nakala ya maneno yao katika taarifa za mji ili Wasparta wawe na kumbukumbu; wakaandika nakala ya maneno hayo kwa Simoni, kuhani mkuu.

²⁴Baada ya hayo, Simoni alimpeleka Numenio aende Rumi na ngao kubwa ya dhahabu ya uzani wa ratili elfu moja, ili kuuthibitisha ushirika wao.

Hati ya kumheshimu Simoni

²⁵Watu walipoyasikia hayo, walisema, Twawezaje kumshukuru Simoni na wanawe?

²⁶Yeye na ndugu zake na nyumba ya baba yake wametenda kwa ushujaa. Walifukuzia mbali adui wa Israeli, wakaipatia Israeli uhuru. Wakaandika juu ya vibao vya shaba, wakaviweka katika nguzo juu ya mlima Sayuni.

²⁷Hii ndiyo nakala ya maandishi: Siku ya kumi na nane ya Eluli, mwaka wa mia moja sabini na mbili, ndio mwaka wa tatu wa Simoni, kuhani mkuu, jemadari wa Israeli,

²⁸katika mkutano mkuu wa makuhani wa watu, na wakuu wa taifa, na wazee wa nchi, shauri hili lilikatwa:

²⁹Mara nyingi, wakati wa vita katika nchi, Simoni, mwana wa Matathia, wa ukoo wa Yoaribu, na nduguze, walijihatarisha nafsi zao wakiwapinga adui za taifa lao, ili patakatifu na sheria isidhuriwe; wakalikuza taifa lao kwa utukufu mwingi.

³⁰Yonathani aliliunganisha taifa kwa umoja, akawa kuhani mkuu wao, akaga dunia.

³¹Adui zao walipokusudia kuiingilia nchi yao ili kuiharibu kabisa, wakainyosha mikono yao juu ya patakatifu,

³²Simoni aliondoka akalipigania taifa lake. Alitumia mali yake nyingi katika kuwapatia silaha watu hodari wa taifa lake, na kuwapa ijara yao.

³³Akaiimarisha miji ya Uyahudi, na Bethsura mipakani mwa Uyahudi, silaha za adui zilipowekwa akiba zamani, akaweka kikosi cha Wayahudi kuilinda.

³⁴Akaiimarisha Yafa, iliyopo pwani, na Gazara katika mipaka ya Ashdodi, walipokaa adui zamani, akaweka Wayahudi huko, pamoja na vifaa vyote walivyovihitaji.

³⁵Watu walipouona uaminifu wa Simoni, na utukufu waliolitafutia taifa lake, walimfanya kiongozi wao na kuhani mkuu, kwa sababu ya hayo yote aliyoyafanya, na ya haki na uaminifu aliokuwa nao daima kwa taifa lake, na kwa sababu alijitahidi kwa kila njia kuwakuza watu wake.

³⁶Katika siku zake mambo yalifanikiwa mikononi mwake na mataifa waliondolewa katika nchi yao. Nao pia waliondolewa waliokuwamo katika mji wa Daudi, Yerusalemu, ambao walikuwa wamejifanyia ngome na kutoka humo kila mara kutia unajisi mipaka ya patakatifu na kuuharibu usafi wake.

³⁷Akawakalisha Wayahudi ndani yake, akaiimarisha kwa ajili ya usalama wa nchi na mji, akaongeza urefu wa kuta za Yerusalemu.

³⁸Kwa sababu ya mambo hayo mfalme Demetrio alimthibitisha katika cheo chake cha kuhani mkuu,

³⁹akamfanya mmoja wa rafiki zake, akamfanyia heshima nyingi,

⁴⁰kwa sababu alisikia kwamba Wayahudi wametajwa na Warumi kuwa rafiki na washarika na ndugu, hata wajumbe wa Simoni walipokewa kwa heshima kuu.

⁴¹Kwa hiyo, Wayahudi na makuhani waliona vema Simoni awe kiongozi wao na kuhani mkuu daima, mpaka nabii wa kweli atokee.

⁴²Tena, awe jemadari wa kuwaagiza kazi zao, awe juu ya nchi na juu ya silaha na juu ya ngome.

⁴³Iwe kazi yake kupatunza patakatifu, na wote wamtii, na taarifa zote za nchi ziandikwe kwa jina lake. Naye avikwe urujuani na kuvaa dhahabu.

⁴⁴Wala isiwe halali mtu yeyote miongoni mwa watu au miongoni mwa makuhani adharau jambo lolote katika hayo, wala kukaidi amri yake yoyote, wala kufanya mkutano pasipo idhini yake, wala kuvaa urujuani au kujifungia bizimu ya dhahabu.

⁴⁵Na yeyote atakayokaidi mambo hayo au kuyadharau atakuwa na hatia.

⁴⁶Watu wote waliona vema Simoni aamriwe mambo hayo.

⁴⁷Simoni akaitikia, akakubali kuishika huduma ya kuhani mkuu, kuwa jemadari na mtawala wa Wayahudi na wa makuhani, na kuyasimamia yote.

⁴⁸Wakaamuru hayo yaandikwe juu ya vibao vya shaba, na viwekwe katika ua wa patakatifu, mahali pa kuonekana na wote,

⁴⁹tena, nakala zake zitiwe katika chumba cha hazina, ili Simoni na wanawe wawe nazo.