ANTIOKO WA SABA ANATAMBUA VYEO VYA SIMONI NA KUMFUNGA TRIFONI KATIKA MJI WA DORI

Barua ya Antioko wa Saba

¹Antioko, mwana wa mfalme Demetrio, alipeleka barua toka visiwa vya baharini kwa Simoni, kuhani mkuu na mtawala wa Wayahudi, na kwa taifa lote,

²nayo iliandikwa hivi: Mfalme Antioko kwa Simoni, kuhani mkuu na mtawala, na kwa taifa la Wayahudi, salamu.

³Watu kadha wa kadha, waasi, wameushika ufalme wa baba zetu, nami nataka kuudai ufalme ili niufanye kama ulivyokuwa kwanza. Nimeajiri jeshi kubwa la askari wa mshahara, na kuweka tayari merikebu za vita.

⁴Nia yangu ni kuingia katika nchi ili niwafuatie wale walioiharibu nchi yetu na kuteka miji mingi ya ufalme.

⁵Basi, sasa nakuthibitishia idhini zote zilizotolewa na wafalme walionitangulia; tena, nakuachilia mambo mengine yoyote waliyokuachilia.

⁶Nakupa mamlaka ya kuchapa fedha za nchi yako kwa chapa chako mwenyewe.

⁷Yerusalemu na patakatifu pawe huru. Silaha zile ulizozitengeneza, na ngome ulizozijenga na kushika, ukae nazo.

⁸Madeni yote unayodaiwa na mfalme, na yote yatakayodaiwa, na yasamehewe kwenu, tangu sasa na sikuzote.

⁹Zaidi ya hayo, tutakapoushika tena ufalme wetu, tutakukuza sana, na taifa lako na patakatifu, ili ukuu wako ujulikane duniani kote.

¹⁰Ikawa, katika mwaka wa mia moja sabini na nne, Antioko aliingia katika nchi ya baba zake, na askari wote walimwendea, hata ni wachache tu waliobaki kwa Trifoni.

¹¹Antioko akamfukuza Trifoni, naye alikimbia kwa njia ya pwani akafika Dori,

¹²maana alijua ya kuwa anasongwa na mambo mabaya mengi, na askari wake wamemwacha.

¹³Antioko akajipanga mbele ya Dori, pamoja na askari elfu mia moja na ishirini na wapanda farasi elfu nane.

¹⁴Aliuzunguka mji pande zote, na merikebu zilisaidia kwa kuupiga toka baharini. Aliusonga mji kabisa, penye nchi kavu na bahari, asimwache mtu atoke wala kuingia.

Rumi yaunga mkono Wayahudi

¹⁵Huko nyuma Numenio na wenzake walirudi kutoka Rumi wenye barua kwa wafalme na kwa nchi zenye maneno haya:[#1 Mak 12:16]

¹⁶Lukio, balozi wa Warumi, kwa mfalme Tolemayo, salamu.

¹⁷Wajumbe wa Wayahudi waliotumwa na kuhani mkuu Simoni na taifa la Wayahudi wamefika kwetu, kama rafiki na washirika, ili kufanya tena yale mapatano ya urafiki ya zamani,

¹⁸nao wameleta ngao ya dhahabu ya uzani wa ratili elfu moja.

¹⁹Tumekata shauri, basi, kuandika kwa wafalme na kwa nchi wasiwafanyie dhara lolote, wala kupigana nao na nchi yao na miji yao, wala kufanya mapatano na wale wanaopigana nao.

²⁰Tumeona vema kuipokea ile ngao.

²¹Kwa hiyo, kama waasi wowote wametoroka nchi yao na kukimbilia kwenu, warudisheni kwa Simoni, kuhani mkuu, awaadhibu kwa sheria yao.

²²Maneno yayo hayo yaliandikwa kwa mfalme Demetrio, na Atale, na Arathe na Arsake,

²³na kwa nchi zote; na kwa Sampsame na kwa Wasparta, na kwa nchi za Delo, Mindo, Sikyoni, Karia, Samo, Pamfilia, Likia, Halikanaso, Rodo, Faseli, Ko, Side, Arado, Gotina, Nido, Kipro na Kirene.

²⁴Wakapeleka nakili yake kwa Simoni, kuhani mkuu.

Antioko wa Saba amtishia Simoni

²⁵Mfalme Antioko aliihusuru Dori mara ya pili, akiishambulia kwa askari wake tena na tena na kutengeneza mitambo ya vita; akamzuia Trifoni asitoke wala kuingia.

²⁶Simoni akampelekea watu wateule elfu mbili wa kumpigania, pamoja na fedha na dhahabu na silaha tele.

²⁷Lakini hakukubali kuvipokea, wala hakujali mapatano yao ya zamani, bali alijitenga naye.

²⁸Akamtuma Athenobio, mmoja wa rafiki zake, afike kwake na kumwambia, Ninyi mnashika Yafa na Garaza, na ngome iliyoko Yerusalemu, miji ya ufalme wangu.

²⁹Mmeharibu mipaka yake na kufanya hasara nyingi katika ufalme wangu. Mmejitwalia mahali pengi katika ufalme wangu.

³⁰Basi, sasa, rudisheni ile miji mliyoitwaa, na kodi ya mahali mliposhika nje ya mipaka ya Uyahudi,

³¹au, badala yake, nipeni talanta mia tano za fedha, pamoja na talanta nyingine mia tano kwa ajili ya hasara mliyofanya, na kwa kodi ya miji; ama sivyo, tutawajieni tupigane.

³²Athenobio, rafiki wa mfalme alipofika Yerusalemu na kuuona utukufu wa Simoni, na kabati yenye vyombo vya dhahabu na fedha, na fahari yake, alishangaa sana. Akamwarifu maneno ya mfalme.

³³Simoni akajibu akamwambia, Sisi hatukutwaa nchi ya watu, wala hatumiliki ardhi ya watu, ila urithi wa baba zetu tu, ambao kwa muda ulishikwa na adui zetu bila haki.

³⁴Basi, kwa kuwa tumepata nafasi ya kufaa, tunaushikilia urithi wa baba zetu.

³⁵Hata hivi, kwa habari za Yafa na Gazara, mnazozidai, tutatoa talanta mia moja kwa ajili yake ingawa zimepatia watu wetu na nchi yetu hasara nyingi.

³⁶Hakujibu neno, lakini alirudi kwa mfalme na hasira nyingi, akamwarifu maneno hayo, akamsimulia habari za fahari ya Simoni, na mambo yote aliyoyaona. Mfalme akakasirika sana.

Ushindi juu ya Kendebayo

³⁷Trifoni alipakia katika merikebu akakimbilia Orthosia.

³⁸Mfalme akamweka Kendebayo awe jemadari mkuu wa pwani, akampa askari na wapanda farasi.

³⁹Akamwagiza apige kambi mpakani mwa Uyahudi; tena, ajenge Kedroni na kuiimarisha milango yake na kupigana na watu wake, hali mfalme mwenyewe amfuatie Trifoni.

⁴⁰Kendebayo alifika Yamnia akaanza kuchokoza watu kwa kuingilia Uyahudi kila mara akikamata watu na kuwaua.

⁴¹Akajenga Kedroni, akaweka wapanda farasi huko na vikosi vya askari, ili wazishambulie njia za Uyahudi kama mfalme alivyoagiza.